ZËRI hap dyert e kopshtit të "ferrit", si u dhunua 3-vjeçarja që kur prindërit ia besuan "STINËVE"
TIRANË- Kopshti “Stinët” i kishte dyert e hapura edhe sot, gjashtë ditë pasi në dhomën ku fëmijët duhet të bëjnë gjumin e mesditës, iu thye këmba një prej vogëlusheve, kujdesi i të cilës, i është besuar këtij institucioni. Zëri.ai ishte sot brenda ambienteve të kopshtit, ku sapo u përpoqëm të kërkonim një prononcim nga edukatoret dhe administratoret e “Stinët”, na u mbyll dera.
“Një sekond, do presësh pak,”- ishin fjalët që na u thanë dhe më pas duke pritur, personi me të cilin u gjendëm përballë ishte djali i administratores. I ri në dukje, djali i administratores Entela Danushi këmbënguli në faktin që e ëma nuk prononcohej për arsye shëndetësore dhe për faktin se po e përjetonte mjaft keq dhunimin e vajzës 3-vjeçare që sot dergjet me këmbë të thyer në spital.
Të riut iu bashkangjit dhe babai që i qëndroi të njëjtit version, përsa i përket heshtjes së drejtueses së këtij institucioni, por edhe duke dhënë versionin e tyre mbi ngjarjen.
“Lina nuk është më në punë, ngjarja ka ndodhur në datën 1 dhe edukatorja është larguar. Ka qenë një gabim, neglizhencë dhe dhunë nga ana e edukatores. Ne kemi kamera kudo dhe monitorojmë gjithçka, qëllimi ynë është zbardhja e kësaj ngjarjeje. Nuk i kemi borxh askujt. Ky është një rast i izoluar dhe nuk na ka ndodhur kurrë më parë. Prononcimin e plotë, preferojmë ta japim në prokurori,”- ishin fjalët e thëna prej tyre, në mënyrë të përmbledhur.
Pas kësaj, djali dhe babai zbritën shkallët dhe u përballën me efektivë të forcave të rendit. Dyert e kopshtit u mbyllën dhe ata prindër që kishin sjellë fëmijët si çdo ditë, u larguan bashkë me ta, edhe pse jo të kënaqur.
Zëri.ai ka siguruar dhe disa video që tregojnë se edukatorja Majlinda Dehima (Lina) ka një qasje aspak miqësore kundrejt fëmijëve. Në njërën prej tyre, ajo qëllon karrigen me vizore, në një tjetër e kap vajzën nga krahu, ndërsa në momentin që ndodhet pranë shtratit të vajzës, e vogla nis të qajë.
Ajo që konstatohet nga pamjet është shumë e paqartë, por administratorët e kopshtit ‘Stinët’ pretendojnë se edukatorja e ka tërhequr nga këmba, dhe ky ka qenë momenti kur ka ndodhur dhe thyerja. Ata këmbëngulin se lajmërimi i prindit është bërë në çast.
Tashmë rasti po hetohet dhe është në duart e prokurorisë, por përfundimi është: Një fëmijë i trembur, i dhunuar psikologjikisht dhe me këmbë të thyer që ka nevojë për drejtësi!
A është heshtja e administratores zgjidhja? 6 ditë pasi ngjarja kishte ndodhur, vetëm sot u bë e mundur mbyllja e këtij kopshti. Përgjigjia ndaj prindërve që u besojnë gjakun e tyre çdo ditë, është minimumi i detyrimit që ka ky institucion!
Shënim: Vogëlushen te 'Stinët' e "dhunuan" të gjithë!
TIRANË- "Stinët", një kopësht privat operonte në periferi të kryeqytetit, i fshehur mes ndërtesave, i harruar edhe nga Ministria e Arsimit. Deri më datë 1 nëntor! Prindërit e kishin besuar gjënë e tyre më të çmuar tek edukatorja Majlinda Dehima, por si “shpërblim” morën vetëm dhunë, për “vëmendjen” e edukatores.
E mitura, vetëm 3 vjeç, kishte nisur të qante dhe të ‘shqetësonte’ edukatoren. Ndaj si zgjedhjen më të mirë për t’i marrë vëmendjen kishte gjetur dhunën. Shuplaka, tërheqje zvarrë dhe qëllim me vizore. Të paktën kaq janë dokumentuar sepse mund të ketë edhe më shumë.
Nga pamjet që ka siguruar "Zëri.ai" brenda kopshtit, në një moment, edukatorja duke që tërheq zvarrë nga krahu të miturën, episod që mund të jetë përsëritur në momentin që ajo është zgjuar nga gjumi. Kamera, edhe kësaj here e vendosur në një kënd që sërish fsheh krimin e edukatores, nuk kap asnjë zhurmë, derisa ajo i afrohet fëmijës…
Rezultati; një këmbë e thyer dhe dy prindër të dërrmuar teksa mendojnë dhe do vazhdojnë të mendojnë tmerrin që kaloi e vogla e tyre.
Me të drejtë … siç do të bënim të gjithë në vendin e tyre, kthejmë sytë nga shteti që të vendosë drejtësinë. Por tek cili? Tek zëvendës-shefi i Komisariatit nr.1 që as nuk i ka parë kamerat siç duhet, apo tek 2 kolegët e tij që gjithashtu injoruan denoncimin e familjarëve. Po Ministria e Arsimit? Ministria e Arsimit dhe e Sportit "lau gojën" sot me një njoftim zyrtar, të thatë duke u shfajsuar se kopshti në fjalë vepronte në kushtet e paligjshmërisë, pasi ishte pa licencë. Madje lajmëruan se kishin ngritur edhe një Task-Torcë për verifikimin e subjekteve që ushtrojnë aktivitetin në shërbimet për fëmijët. Por për rastin konkret çfarë u bë?
Edhe sot, disa orë pas publikimit të pamjeve, kopshti ishte i hapur.
"Zëri.ai" shkoi vetë sot në mëngjes, ku në kopësht hynin ende fëmijë. Kishte ende prindër që besonin tek fëmijët e tyre në një ambient që vetëm pak ditë më parë iu thye këmba një fëmijë. Vetëm 3 vjeç! Dhunë psikologjike, fizike dhe një dëmtim që i ka penguar vrapin e moshës së voglës. Sot, disa nëna shkuan për të protestuar tek kopshtit që i ishte vënë dryni. Nesër, do të bëhen edhe dy-tri lajme të tjera për ngjarjen, e pasnesër do të harrohet sërish. Fëmjët do të jenë sërish të pambrojtur brenda mureve të kopshtit, larg syrit të prindërve dhe në mëshirë të disa zonjave që paguhen për t’u dhënë dashuri, jo për t’i dhunuar.
Kështu që të gjithë ju edukatorë e mësues, që sot vishni përparëse të bardha, mos i nxini me turp! Mos ua përlotni sytë të vegjëlve që rriten çdo ditë para syve tuaj, kaq pak, a e bëni dot?!/Zëri.ai
Dhunoi 3-vjeçaren, edukatorja: Doja të kisha vëmendje, ajo vetëm qante
TIRANË- Zbardhet dëshmia e edukatores Majlinda Dehima, e cila dhunoi një 3-vjeçare në ambientet e kopështit "Stinët". Në rrëfimin që ka bërë në Prokurorinë e Tiranës, ajo ka pranuar se e ka dhunuar të miturën sepse kishte nisur të qante. Madje, më pas, shtoi se menjëherë pasi i kishte pikasur këmbën e dëmtuar, kishte njoftuar Drejtoreshën e kopështit, duke ngritur më pas edhe versione se si mund të ishte dëmtuar e mitura. Duke hequr kështu çdo përgjegjësi nga vetja e saj. Sipas edukatores, mundësia e vetme ku fëmija mund ta ketë thyer këmbën është pikërisht krevati. Në dëshminë e saj, ajo tha se krevati ka hapësira ku herë pas here fëmijët në mënyrë të pavullnetshme i futin këmbët dhe përdridhen duke u rrezuar.
"Vajza mund të jetë dëmtuar tek krevati. Vura në dijeni edhe Drejtoreshën. Vajzën e qëllova sepse doja të kisha vëmendje, pasi ajo gjithë kohës vetëm qante,"-tha Majlinda Dehima. Aktualisht, ajo është e lirë, pasi ndaj saj është vendosur "procedim në gjendje të lirë", ndërkohë që e vogla është në spital.
Dhunimi i një vogëlusheje 3-vjeçare në koshtin “Sinët’, në Tiranë shkaktoi një reagim të fortë public. Ngjarja e rëndë referuar dhe pamjeve filmike është kryer rreth orës 10 të paradites në datën 1 Nëntor, ndërkohë që prindërit janë njoftuar vetëm në orën 15:00 pasi këmba e vajzës kishte pësuar shumë enjtje. Rasti u denoncua publikisht në emisionin “STOP”, ku përmes pamjeve filmike dhe fotografive u qartësua dhuna psikologjike dhe fizike ndaj fëmijës. Dhuna rezulton se është kryer nga edukatorja Majlinda Dehima, e cila ditën e sotme u shoqërua në Komisariat. Disa orë më vonë, Polica në një njoftim zyrtar deklaroi se ka vendosur të hetojë në gjendje të lirë edukatoren, si dhe pezullimin nga detyra të zëvendës-shefit të Komisariatit nr.1 në Tiranë, Rustem Dervishit dhe 2 vartësit e tij, Ylli Çako dhe Ergys Brahimaj. Ndërkohë Ministria e Arsimit në reagimin e saj bëri me dije se kopshti ishte pa licencë, por ndaj drejtoreshës së këtij kopshti nuk është marrë ende asnjë masë./Zëri.ai
Edukatorja dhunoi 3-vjeçaren, kopshti “Stinët”: Po hidhet baltë mbi punën tonë
TIRANË- Kopshti “Stinët” në Tiranë ka reaguar pas denoncimit se edukatorja Majlinda Dehima, ka dhunuar një vajzë 3-vjeçare, e cila aktualisht ndodhet në spital me këmbë të thyer. Kopshti pretendon se në pamjet e publikuara edukatorja ka ruajtur qetësinë dhe ka gjuajtur me vizore në karrige e tavolinë dhe nuk ka ushtruar dhunë te e mitura. Po ashtu në reagim thuhet se është hedhur baltë mbi punën dhe përkushtimin e tyre.
"Duke ju kërkuar ndjesë për pamjet e transformuara nga emisioni “stop” duke hedhur baltë mbi punën dhe përkushtimin tonë, e vërteta është kjo si në video. Edukatorja për të mbajtur qetësinë dhe fokusin ka gjuajtur në karrige dhe tavolinë, jo tek vajza e cila siç duket edhe në këtë video, është e qetë duke punuar. Nëse doni të bëni një denoncim bëheni me pamje të sakta,"-thuhet në reagim.
Dhunimi i të miturës, referuar dhe pamjeve filmike është kryer rreth orës 10 të paradites në datën 1 Nëntor, ndërkohë që prindërit janë njoftuar vetëm në orën 15:00 pasi këmba e vajzës kishte pësuar shumë enjtje.Rasti u denoncua publikisht në emisionin “STOP”, ku përmes pamjeve filmike dhe fotografive u qartësua dhuna psikologjike dhe fizike ndaj fëmijës. Dhuna rezulton se është kryer nga edukatorja Majlinda Dehima, për të cilën Policia njoftoi se ka nisur një procedim në gjendje të lirë. Ndërkohë Ministria e Arsimit në reagimin e saj bëri me dije se kopshti ishte pa licencë, por ndaj drejtoreshës së këtij kopshti nuk ka ende një masë./Zëri.ai
"Mos më dhuno, jam i vogël"/ Skandali ndaj 3-vjeçares, nëna e fëmijë në protestë
TIRANË- Pas ngjarjes së rëndë ku një vajzë 3-vjeçare përfundoi në spital me këmbë të thyer, pas dhunës së ushtruar, në kopshtin “Stinet”, qytetarët janë mbledhur në protestë para ambienteve të institucionit privat. Fëmijët u panë me pankarta në duar, ku disa prej tyre mbajnë mbishkrimet: “Vij të mësoj dhe argëtohem, jo të dhunohem!”, “Mos më dhuno, unë jam i vogël”, “Dhuna nuk ka justifikimi”, "I kam frikë monstart".
Prindër të fëmijëve, kanë protestuar duke kërkuar zbardhjen e rastit dhe duke u shprehur se duhet të merren masa të rrepta ndaj edukatoreve dhunuese, që të shërbejnë si shembull për mos patur përsëritje. Të pranishëm në protestë janë edhe prindër, të cilët nuk i kanë fëmijët në kopshtin "Stinët". Gjatë protestës prindërit kanë kërkuar vendosjen e kamerave në kopshtet private. Gjithashtu teksa kanë folur të shokuar për mediat qytetarët kanë zbuluar se kjo ky nuk është denoncimi i parë që vjen kopshti "Stinët".
“Për këdo fëmijë, është rast shokues. Fëmijën tim e çoj në kopsht shtetëror fëmijën tim, të ky kopsht ka pasur denoncime dhe më parë. Kopshtet duhet të monitorohen me kamera që shihet gjithçka çfarë ndodh. Duhet të bëhen kontrolle në kopshte dhe duhet të merren masa më të rrepta. Nuk dihet se çfarë do të bëja nëse diçka do t’u ndodhte fëmijëve të mi”, tha një nënë.
"Jam e shokuar dhe me aq informacione sa kam habitem me prindërit e fëmijëve që janë pjesë e këtij kopshti, të cilët nuk ndodhen këtu. Akoma nuk e kuptoj se si sot i sollën fëmijët në ambjentet e këtij vendi, deri në orën 10:00. Unë si prind do të kisha bërë vetgjyqësi, nëse do i kishte ndodhur fëmijës tim,"-u shpreh një nga banoret.
"Jam njohur me rastin përmes rrjeteve sociale. Nuk duhet toleruar në asnjë mënyra dhuna ndaj fëmijëve. Kur kam parë videon nuk kam fjetur gjumë. Fëmijët I sjellim për t’I edukuar dhe jo për t’i dhunuar. Të ky kopësht me aq sa pashë sot në rrjetet sociale, ka pasur edhe raste të tjera dhune. Është një nga kërkesat e para që duhet të bëj, që edhe kopshtet shtetërore të jenë me kamera, ku çfarëdo që të ndodhë të jenë pamjet aty”, është shprehur një prej qytetareve.
Dhunimi i një vogëlusheje 3-vjeçare në koshtin “Sinët’, në Tiranë shkaktoi një reagim të fortë publik. Ngjarja e rëndë referuar dhe pamjeve filmike është kryer rreth orës 10 të paradites në datën 1 Nëntor, ndërkohë që prindërit janë njoftuar vetëm në orën 15:00 pasi këmba e vajzës kishte pësuar shumë enjtje. Rasti u denoncua publikisht në emisionin “STOP”, ku përmes pamjeve filmike dhe fotografive u qartësua dhuna psikologjike dhe fizike ndaj fëmijës. Dhuna rezulton se është kryer nga edukatorja Majlinda Dehima, e cila ditën e sotme u shoqërua në Komisariat. Disa orë më vonë, Polica në një njoftim zyrtar deklaroi se ka vendosur të hetojë në gjendje të lirë edukatoren, si dhe pezullimin nga detyra të zëvendës-shefit të Komisariatit nr.1 në Tiranë, Rustem Dervishit dhe 2 vartësit e tij, Ylli Çako dhe Ergys Brahimaj. Ndërkohë Ministria e Arsimit në reagimin e saj bëri me dije se kopshti ishte pa licencë, por ndaj drejtoreshës së këtij kopshti nuk është marrë ende asnjë masë./Zëri.ai
6 ditë pas ngjarjes/ Shoqërohet në Polici edukatorja që dhunoi 3-vjeçaren
TIRANË- Majlinda Dehima, edukatorja që dhunoi 3-vjeçaren në kopshtin privat “Stinët”, është shoqëruar në ambientet e Policisë, gjashtë ditë pas ngjarjes së rëndë. Vetëm një ditë pas denoncimit në emisionin “Stop”, dhe pas reagimit të Ministrisë së Arsimit, Policia e Shtetit ka marrë vendimin të shoqërojë në komisariat Dehimën.
Ajo pritet të merret në pyetje në lidhje me dhunën e ushtruar mbi 3-vjeçaren, gjë që solli dhe thyerjen e këmbës së të voglës. Ngjarja ka ndodhur që në datën 1 nëntor, por vetëm një ditë më parë u bë publik si rast.
Zëri.ai ishte mëngjesin e sotëm pranë ambienteve të kopshtit “Stinët” që gjendet në zonën e Ali Demit, ku konstatuam se aktiviteti vijonte normalisht, por pranë godinës kishte disa punonjës policie./Zëri.ai
Dhunimi i 3-vjeçares, sot protestë para kopshtit “Stinët”: Të mbyllet!
TIRANË- Një protestë do të mbahet pasditen e sotme pranë kopshtit “Stinët” në Tiranë, ku ndodhi rasti i rëndë i dhunimit të një vajze 3 vjeçare, e cila përfundoi në spitalin e Traumës me këmbën e thyer. Thirrja për protestë është bërë nga aktorja Eliona Pitarka në rrjetet sociale, dhe më pas ka marrë një mbështetje të gjerë nga dhjetëra profile të tjera. Protesta do të mbahet përpara kopshtit në orën 16:00, në rrugën Kushtrimi i Lirisë, ku do të kërkohet mbyllja e kopshtit.
Pavarësisht ngjarjes së rëndë që ndodhi në këtë institucion, aktiviteti deri në mëngjesin e sotëm, ishte duke vijuar normalisht.
Dhunimi i të miturës, referuar dhe pamjeve filmike është kryer rreth orës 10 të paradites në datën 1 Nëntor, ndërkohë që prindërit janë njoftuar vetëm në orën 15:00 pasi këmba e vajzës kishte pësuar shumë enjtje./Zëri.ai
I thyen këmbën 3-vjeçares duke e dhunuar, kopshti ‘Stinët’ vijon aktivitetin normalisht
TIRANË- Zëri.ai ka shkuar mëngjesin e sotëm pranë kopshtit privat “Stinët” që ndodhet në rrugën “Kushtrimi i lirisë” në kryeqytet, në të cilin u dhunua një vajzë 3-vjeçare, ku si pasojë të miturës i është thyer këmba, dhe ndodhet në spitalin e Traumës ku do t’i nënshtrohet dhe një ndërhyrje kirurgjikale.
Në këtë kopsht vijon ende aktiviteti normalisht, siç shihet dhe nga pamjet e siguruara nga gazetarja e Zëri.ai, Florida Mingla. Gjatë ditës së sotme, pas publikimit të lajmit në emisionin Stop, në afërsi të kopshtit kanë qenë disa punonjës policie, por nuk dihet ende nëse prania e tyre lidhet me shoqërimin e edukatores që ka dhunuar të miturën apo drejtoreshës së kopshtit.
Ekspertë të fushës hodhën dyshime mbrëmjen e djeshme se rasti në fjalë mund të jetë tentuar të mbulohet nga mjekësia ligjore, dhe nga Komisariati i Policisë Gjyqësore, të cilat nuk kanë vepruar siç e parashikon ligji për rastin në fjalë. Pavarësisht denoncimit të familjarëve, ekspertët e mjekësisë ligjore, nuk kishin shkuar në spitalin e Traumës për të parë gjendjen e vajzës së dhunuar, ndërkohë që fillimisht prindërve iu ishte thënë nga drejtoresha e kopshtit se 3-vjeçarja ishte pickuar nga ndonjë inskekt.
Dhunimi i të miturës, referuar dhe pamjeve filmike është kryer rreth orës 10 të paradites, ndërkohë që prindërit janë njoftuar vetëm në orën 15:00 pasi këmba e vajzës kishte pësuar shumë enjtje.
Denoncimi i babait të vajzës: Ka qenë data 1 Nëntor 2023. Vajza u çua nga ime shoqe në orën 8 e 20 dhe ne ikëm në punë siç çdo ditë. Kur e çuam vajzën në mëngjes ishte në rregull, si çdo ditë tjetër. Në orën 3, njoftohet nusja që “hajde merre vajzën sepse ka dhimbje tek këmba dhe po grindet, diçka e ka pickuar”. Nusja niset direkt dhe kur mbërrin aty, goca ishte futur poshtë një tavoline. Këmba ishte e enjtur dhe ishte fryrë sa koka e vajzës.
Nusja kishte ndeshur edukatoren dhe drejtoreshën të cilat po e prisnin duke qarë. Thoshte me veten e vet se “çfarë i kam bërë unë vetes”. Nusja nuk e pati mendjen në ato momente se çfarë po ndodhte me edukatoren, por pa edhe drejtoreshën duke qarë dhe drejtoresha i tha që “hajde të hipim në makinë dhe ta çojmë direkt në pediatri”. U nisën në pediatric dhe më mori nusja direkt në telefon dhe më tha që po ikim në pediatri.
Kur shkova, mora fëmijën dhe u shokova kur i pashë këmbën që ishte e enjtur në një gjendje skandaloze. Më pas morëm letrën e hyrjes që ta kontrollojë mjekja dhe kur mjekja pa tha “që nuk është rast për mua, ka diçka tek këmba dhe nuk di të ju kthej përgjigje. Ju sugjeroj që të shkoni tek “Ushtaraku”. Kur mbërritëm në Urgjencën e “Ushtarakut”, u futëm brenda dhe kërkuam ndihmën e shpejtë dhe aty dolën mjekët që ishin specialist të kësaj fushe dhe në momentin që i bënë grafinë, grafia doli në një thyerje shumë të keqe, ishte thyer këmba, pjesa e kofshës në një gjendje skandaloze.
/Zëri.ai
