Trump 'zbulon' marrëveshjen: Izraeli dhe Libani bien dakord për armëpushim 10-ditor, nis nga sot
SHBA- Presidenti amerikan, Donald Trump, deklaroi se Izraeli dhe Libani kanë rënë dakord të avancojnë drejt një armëpushimi 10-ditor, i cili do të hyjë në fuqi në orën 17:00 sipas kohës së bregut lindor të SHBA-së. Përmes një postimi në Truth Social, Trump tha se foli me presidentin libanez Joseph Aoun dhe kryeministrin izraelit Benjamin Netanyahu dhe se secili prej tyre ra dakord për një armëpushim 10-ditor, i cili do të fillojë të enjten.
"Sapo pata biseda të shkëlqyera me Presidentin e Libanit, Joseph Aoun, shumë të respektuar, dhe Kryeministrin Bibi Netanyahu, të Izraelit", shkroi ai. "Këta dy udhëheqës kanë rënë dakord që, me qëllim arritjen e PAQES midis vendeve të tyre, ata do të fillojnë zyrtarisht një ARMPUSHIM 10-ditor në orën 17:00 sipas orës lindore.", shkruan Trump.
Trump shtoi se i ka ngarkuar zëvendëspresidentit të SHBA-së J. D. Vance dhe sekretarit të Shtetit Marco Rubio, në bashkëpunim me kreun e Shefave të Shtabit të Përbashkët Dan Caine, të punojnë së bashku me të dyja palët për arritjen e një paqeje të përhershme.
Presidenti Trump foli të enjten në telefon me homologun e tij libanez, Presidentin Joseph Aoun, i cili "shprehu falënderimet e tij për përpjekjet që Trump po bën për të arritur një armëpushim në Liban dhe për të siguruar paqe dhe stabilitet të qëndrueshëm, duke hapur rrugën për arritjen e procesit të paqes në rajon", sipas një njoftimi të telefonatës të siguruar nga zyra e presidentit libanez. /ZËRI
Lufta “pothuajse e përfunduar"? Priten bisedime SHBA-Iran
SHBA-Negociatat në Pakistan mund të rifillojnë që brenda dy ditëve të ardhshme, tha Donald Trump në një intervistë për ABC. Lufta është "pothuajse e përfunduar”, tha ai gjithashtu për televizionin Fox. Edhe nënpresidenti JD Vance u shpreh me një optimizëm të ngjashëm.
Më herët, përfaqësues të Pakistanit dhe Iranit kishin deklaruar se negociatat mund të vazhdojnë gjatë kësaj jave në Pakistan. Megjithatë, nga qarqe qeveritare iraniane u tha se ende nuk ishte caktuar asnjë datë. Kundër një raundi të shpejtë të ri negociatash flet fakti se kryeministri i Pakistanit, Shehbaz Sharif, po nis një udhëtim disaditor në Arabinë Saudite, Katar dhe Turqi.
Bisedime të reja me Vance?
Raundi i parë i bisedimeve nuk pati pa sukses në fundjavë. Sipas Vance, megjithatë, gjatë negociatave janë shënuar edhe përparime. Ende nuk është arritur një marrëveshje, sepse "presidenti dëshiron vërtet një marrëveshje në të cilën Irani të mos zotërojë armë bërthamore”, tha nënpresidenti amerikan.
Vance mund të udhëheqë gjithashtu delegacionin amerikan në një raund të mundshëm të dytë negociatash me Iranin. Kështu raporton televizioni amerikan CNN. Përveç kësaj, në bisedime mund të marrin pjesë edhe i dërguari i posaçëm i SHBA-së, Steve Witkoff, si dhe dhëndri i Trumpit, Jared Kushner.
SHBA: Bllokada është zbatuar
Armëpushimi SHBA-Iran skadon javën e ardhshme. Sipas nënpresidentit amerikan Vance, ai po respektohet deri më tani. Megjithatë, Trump duket se nuk dëshiron ta zgjasë atë. Do të preferoja një marrëveshje, tha Trump në një intervistë për ABC.
Aktualisht, forcat e armatosura amerikane, sipas deklaratave të tyre, po e zbatojnë plotësisht bllokadën e porteve iraniane. Admirali amerikan Brad Cooper, komandant i US Central Command, tha se forcat amerikane e kanë ndalur plotësisht tregtinë ekonomike që zhvillohet përmes detit drejt dhe nga Irani. Sipas tij, kjo tregti përbën 90 për qind të ekonomisë iraniane. Gazeta Wall Street Journal raportoi se ushtria amerikane ka ndaluar tetë cisterna nafte dhe i ka detyruar ato të kthehen mbrapsht./DW
