Khamenei i vendosur: SHBA-të nuk fituan asgjë nga sulmet
IRAN- Udhëheqësi suprem i Iranit Ajatollah Ali Khamenei ka këmbëngulur se SHBA-të "nuk kanë arritur asgjë" nga sulmet ndaj objekteve bërthamore. Ajatollah Ali Khamenei tha se sulmet SHBA nuk “arritën asgjë domethënëse” për të prishur programin bërthamor të Iranit dhe e përshkroi hakmarrjen kundër një baze ajrore amerikane në Katar si një “goditje të rëndë”.
Reagimi vjen ndërsa Uashingtoni dyfishoi vlerësimin e tij se sulmet kishin dëmtuar rëndë objektet bërthamore të Iranit. Sekretari amerikan i Mbrojtjes, Pete Hegseth, tha se inteligjenca e mbledhur nga SHBA-të dhe Izraeli tregonte se operacioni "dëmtoi ndjeshëm programin bërthamor, duke e shtyrë atë prapa me vite".
Udhëheqësi suprem thuhet se është strehuar në një bunker dhe ka kufizuar komunikimet, gjë që ka ngjallur spekulime rreth vendndodhjes së tij. Autoritetet iraniane nuk zbuluan se nga po fliste ai të enjten, megjithëse një zyrtar i lartë pranoi se ai ishte në një vend të sigurt në fillim të kësaj jave.
Khamenei e përdori video-mesazhin për të kërcënuar se do të kryejë sulme të tjera ndaj bazave amerikane në Lindjen e Mesme nëse Irani sulmohet përsëri dhe shpalli fitoren ndaj Izraelit dhe SHBA-së.
Khamenei tha se Trump e kishte “ekzagjeruar” ndikimin e sulmeve në centralet bërthamore, duke shtuar: “Ata nuk mundën të arrinin asgjë dhe nuk e arritën objektivin e tyre”.
Irani ka pohuar se programi i tij bërthamor është vetëm për qëllime civile dhe se nuk është përpjekur kurrë të zhvillojë një armë bërthamore.
Kryeministri izraelit: Fitorja ndaj Iranit hap dyer të tjera për paqe
SHBA-Kryeministri i Izraelit Benjamin Netanyahu, ka reaguar sërish për fitoren ndaj Iranit, duke u shprehur se armëpushimi krijon mundësi të reja për marrëveshje paqeje që Izraeli nuk duhet t’i lërë pa u shfrytëzuar.
“Fitorja” e Izraelit kundër Iranit ofron mundësi për një “zgjerim dramatik të marrëveshjeve të paqes. Ne luftuam me trimëri kundër Iranit dhe arritëm një fitore të madhe. Kjo fitore hap derën për një zgjerim dramatik të marrëveshjeve të paqes,"-shprehet Netanyahu.
Kryeministri tha se tani ekziston një "dritare mundësie" për të mposhtur Hamasin dhe për të siguruar lirimin e pengjeve që mbahen aktualisht nga grupi terrorist në Rripin e Gazës.
“Së bashku me lirimin e pengjeve dhe mposhtjen e Hamasit , ekziston një dritare mundësie që nuk duhet humbur. Nuk mund të humbasim asnjë ditë të vetme”, shtoi ai.
Situata me Iranin dhe Gazën/ Netanyahu vizitë në SHBA, do të takohet me Trump
SHBA-Kryeministri i Izraelit, Benjamin Netanyahu do të udhëtojë për në Uashington për t’u takuar me Presidentin e SHBA-së Donald Trump.
Dy zyrtarë izraelitë thanë se diskutimet fillestare kanë ndodhur tashmë midis këshilltarëve të Netanyahut dhe zyrtarëve të Shtëpisë së Bardhë në lidhje me një vizitë të mundshme, megjithëse ende nuk është caktuar një datë. Mediat izraelite raportojnë se vizita pritet të zhvillohet në javën e dytë të korrikut. Ndërkohë Donald Trump tha se SHBA-të do të takohen me Iranin "javën tjetër".
Pas sulmit të SHBA-së ndaj Iranit të dielën në mëngjes, kryeministri izraelit Benjamin Netanyahu dhe presidenti amerikan Donald Trump ranë dakord të lëvizin drejt një përfundimi të shpejtë të luftës në Gaza dhe zgjatjes së Marrëveshjeve të Abrahamit, sipas një raporti në gazetën Israel Hayom. Siç raportohet, sipas planit, banorët e Gazës që dëshirojnë të emigrojnë do të përthithen nga vende të ndryshme të paspecifikuara./ZËRI
Sulmi i SHBA ndaj objektivave bërthamore në Iran, Pete Hegseth: Sukses historik
SHBA- Sekretari amerikan i Mbrojtjes, Pete Hegseth, në një konferencë për styp i ka cilësuar sulmet amerikane ndaj centraleve bërthamore iraniane në fundjavë "historikisht të suksesshme".
Duke folur nga dhoma e informimit të Pentagonit, Hegseth hodhi dyshime mbi një vlerësim fillestar nga Agjencia e Inteligjencës së Mbrojtjes, duke vënë në dukje se ai ishte "paraprak" dhe "i zbuluar sepse dikush kishte një axhendë për të turbulluar ujërat dhe për ta bërë të dukej sikur ky sulm historik nuk ishte i suksesshëm".
Hegseth tha gjithashtu se nuk ishte në dijeni të ndonjë informacioni që sugjeronte se Irani kishte zhvendosur ndonjë pjesë të uraniumit të tij të pasuruar në mënyrë të lartë. Agjencia Ndërkombëtare e Energjisë Atomike (IAEA) ka thënë se stoku prej 400 kg i Iranit me uranium të pasuruar 60% nuk mund të llogaritet më.
“Ky ishte një sulm historikisht i suksesshëm. Herë pas here, informacioni i klasifikuar rrjedh ose shitet për qëllime politike, në përpjekje për ta bërë presidentin të duket keq, dhe ajo që po ndodh në të vërtetë është se ju po minoni suksesin e pilotëve tanë të jashtëzakonshëm”, tha Hegseth.
Presidenti Donald Trump dhe kabineti i tij kanë sulmuar gazetarët që raportuan mbi raportin fillestar të DIA-s./ZËRI
Irani zhvendosi uraniumin para sulmit amerikan? Trump: S' është e vërtetë, asgjë nuk doli jashtë
SHBA-Presidenti amerikan Donald Trump sapo iu është përgjigjur edhe thashethemeve se një pjesë e uraniumit të pasuruar të Iranit është hequr nga centrali bërthamor i Fordow. Trump, tha se asgjë nuk është hequr nga objektet bërthamore të Iranit në një postim në rrjetin social Truth.
“Makinat dhe kamionët e vegjël në vend ishin ato të punëtorëve të betonit që përpiqeshin të mbulonin pjesën e sipërme të boshteve. Asgjë nuk u nxor nga objekti. Do të zgjaste shumë, do të ishte shumë e rrezikshme dhe shumë e rëndë dhe e vështirë për t’u lëvizur!” shkruan Trump.
Deri në sulmet e para izraelite ndaj objekteve të pasurimit më 13 qershor, Irani kishte pasuruar uranium në pastërti 60 për qind, një rritje e madhe në rreth 90 për qind, që është e gradës për bomba, dhe shumë mbi kufirin prej 3.67 për qind të vendosur nga marrëveshja e vitit 2015, të cilën Irani e respektoi deri një vit pasi Trump u tërhoq.
Efekti i sulmeve të SHBA-së dhe Izraelit në objektet bërthamore të Iranit mbetet për t'u përcaktuar. Trump, vazhdon të jetë i bindur se sulmet ndaj objekteve bërthamore të Iranit "i shkatërruan ato plotësisht” dhe e kthyen programin bërthamor të Teheranit "në disa dekada prapa”. Ndërkohë sipas raportit të shërbimeve sekrete prej bombardimeve janë shkatërruar vetëm hyrjet e objektit Fordo, por jo vetë ndërtesat nëntokësore./ZËRI
Mesazhi i parë i Khameneit pas armëpushimit: Urime për fitoren ndaj Izraelit!
TEHERAN- Udhëheqësi Suprem i Iranit, Ajatollah Ali Khamenei, theu "heshtjen" e tij pas dy javësh që nuk është dukur në publik. Që nga nisja e sulmit nga Izraeli, nga mediat e huaja u raportua se Khamenei fshihej nën një bunker dhe nuk kishte komunikim me asnjë nga krerët e Ushtrisë së tij.
"Urime për fitoren ndaj Izraelit,"-shkruhet në një mesazh të publikuar në rrjetin "X". Më pas shtoi: Shtetet e Bashkuara nuk arritën asnjë rezultat strategjik nga kjo luftë, tha udhëheqësi 86-vjeçar. Sipas tij, Uashingtoni u përfshi në konflikt jo për arsye të interesave të veta, por sepse besonte se nëse nuk do ndërhynte, Izraeli do të shkatërrohej plotësisht. Madje akuzoi Donald Trump për “teatralizëm”.
Duke iu drejtuar një mesazhi të gjitha drejtimeve, Khamenei paralajmëroi se “çdo veprim agresiv i ardhshëm kundër Iranit do të ketë një kosto të rëndë”. Ai tha se Teherani ka aftësinë të arrijë përsëri baza të rëndësishme amerikane nëse ndërmerren veprime të reja agresive.
Mungesa e tij kishte shkaktuar habi dhe shqetësim në Iran. Por tani duket se çdo gjë është kthyer në normalitet./ZËRI
CIA thotë se objektet bërthamore të Iranit kanë pësuar 'dëmtime serioze'
IRAN- Drejtori i CIA-s, John Ratcliffe lëshoi të mërkurën një deklaratë duke thënë se agjencia kishte siguruar "një sërë provash të besueshme" që tregojnë se Programi Bërthamor i Iranit ishte dëmtuar rëndë nga sulmet e fundit. Deklarata vjen një ditë pasi CNN dhe media të tjera raportuan një analizë paraprake të Agjencisë së Inteligjencës së Mbrojtjes, të prodhuar afërsisht 24 orë pas sulmeve, e cila zbuloi se bombardimet amerikane me shumë gjasa e kanë vonuar aftësinë e Iranit për të prodhuar një armë bërthamore vetëm me disa muaj, por nuk e kanë shkatërruar.
Shtëpia e Bardhë e ka kundërshtuar këtë vlerësim, duke e quajtur atë “të gabuar”. Presidenti Donald Trump ka thënë se sulmet “shkatërruan” aftësinë e Iranit për të prodhuar një armë bërthamore. Drejtoresha e Inteligjencës Kombëtare, Tulsi Gabbard, postoi gjithashtu në X të mërkurën se “inteligjenca e re” mbështeste idenë se objektet bërthamore të Iranit u “shkatërruan” në sulme.
“Inteligjenca e re konfirmon atë që Presidenti i SHBA-së e ka deklaruar disa herë: objektet bërthamore të Iranit janë shkatërruar. Nëse iranianët zgjedhin të rindërtojnë, ata do të duhet t’i rindërtojnë të treja objektet (Natanz, Fordoë, Esfahan) tërësisht, gjë që ka të ngjarë të zgjasë me vite,”- postoi Gabbard në X të mërkurën, pa dhënë prova.
Ndërkohë, shkalla e dëmit është ende e panjohur, pasi nuk ka qasje në objektet iraniane.
Pranimi i parë i Teheranit
Nga ana e tij, Teherani bëri pranimin e parë nëpërmjet një zëdhënësi të Ministrisë së Jashtme iraniane se objektet bërthamore të vendit pësuan "dëme serioze" nga sulmet ajrore amerikane, megjithatë, pa dhënë detaje të mëtejshme./ZËRI
Shkatërrim i plotë apo vetëm dëme të vogla, ç'ka ndodhur në Iran?
SHBA- Presidenti i SHBA-së, Donald Trump, vazhdon të jetë i bindur se sulmet ndaj objekteve bërthamore të Iranit "i shkatërruan ato plotësisht” dhe e kthyen programin bërthamor të Teheranit "në disa dekada prapa”. Në takimin e NATO-s në Hagë, Trumpi tha se regjimi iranian: "nuk do të ndërtojë më bomba për një kohë të gjatë".
Po ashtu Trump i quajti njoftimet e New York Times dhe CNN, se prej sulmeve programi bërthamor i Iranit ishte penguar vetëm për disa muaj si "lajme të rreme" dhe përdori fyerje ndaj gazetës dhe stacionit televiziv.
Dëmtime jo shkatërruese
New York Times dhe CNN kishin njoftuar se sipas vlerësimeve fillestare të shërbimeve sekrete bombardimet amerikane gjatë fundjavës nuk arritën t'i shkatërronin objektet bërthamore nëntokësore të Iranit. Sipas raportit të shërbimeve sekrete prej bombardimeve ishin shkatërruar vetëm hyrjet e objektit Fordo, por jo vetë ndërtesat nëntokësore. Fotografi satelitore e centralit bërthamor Fordo në Iran, ku janë shënuar me jeshile: hyrja e shkatërruar për në objektin nëntokësor, me të kuqe krateret që supozohet se janë shkaktuar prej bombave. Raporti pesëfaqësh i shërbimeve sekrete supozon gjithashtu se para se të nisnin sulmet Irani i kishte zhvendosur rezervat e tij të uraniumit të pasuruar në zona të tjera, shkruan New York Times.
Vlerësim i kujdesshëm nga Izraeli
Izraeli dha një vlerësim të kujdesshëm lidhur me efektin e sulmeve.
"Është ende shumë herët për të gjykuar rezultatet e operacionit”, tha zëdhënësi i ushtrisë izraelite, Effie Defrin. Por ai shtoi: Unë besoj se i kemi dhënë një goditje serioze programit bërthamor. E kemi kthyer atë disa vite prapa.
Irani flet për dëme të rënda
Ministria e Jashtme iraniane deklaroi se dëmet në impiantet bërthamore ishin të rënda. Një zëdhënës i tha Al Jazeeras se nuk mund të jepte asnjë detaj, por se sulmet prej bombave bunkerë-shkatërruese ishin të forta dhe dëmet të rënda.
IAEA kërkon të inspektojë
Sqarime për gjendjen mund të japë Agjencia e OKB-së për Energjinë Bërthamore, IAEA. Ajo po këmbëngul që t'i lejohet sa më shpejt të jetë e mundur hyrja në impiantet bërthamore të sulmuara. Shefi i IAEA-s, Rafael Grossi, tha se kthimi i inspektorëve të tij ka përparësi kryesore. Ata duhet të vlerësojnë efektet e sulmeve dhe të verifikojnë rezervat e uraniumit të pasuruar, tha ai në një konferencë për shtyp pas një takimi të Kabinetit Austriak të Sigurisë në Vjenë. Kjo përfshin edhe tri impiantet e pasurimit të uraniumit.
Grossi pranoi se inspektimi i objekteve të dëmtuara nga lufta është i vështirë. Kurse radio-televizioni shtetëror i Iranit IRIB njoftoi se parlamenti në Teheran kishte vendosur që ta pezullojë përkohësisht bashkëpunimin me IAEA-n me seli në Vjenë./DW
