Orban mbështet Le Pen: Jam Marine!
BUDAPEST- Kryeministri hungarez Viktor Orban ka mbështetur Marine Le Pen, e cila u dënua nga një gjykatë franceze sot me akuzën për shpërdorim të fondeve publike. Në rrjetin social "X", Orban ka shprehur hapur mbështetjen e tij ndaj koleges së tij.
“Unë jam Marine”, ka shkruar Orban në “X” në frëngjisht, me etiketën e llogarisë zyrtare të Le Pen në të njëjtin rrjet social.
Politikania franceze e të djathtës ekstreme, Marine Le Pen është shpallur fajtore për përvetësim të fondeve të Parlamentit Evropian për një periudhë 12-vjeçare. Ajo u largua nga seanca gjyqësore pa bërë asnjë koment. Madje pa e mbaruar gjyqtari shqiptimin e dënimit. Le Pen, e cila ka garuar kundër presidentit aktual, Emmanuel Macron më 2017 dhe 2022, konsiderohej figura favorite për t’u bërë gruaja e parë presidente e Francës. Por tani ajo nuk mund të garojë për asnjë pozitë politike publike./ZËRI
PËRMBLEDHJA- Gjithë çfarë duhet të dimë për gjyqin e Marine Le Pen!
PARIS– Udhëheqësja franceze e ekstremit të djathtë, Marine Le Pen, u dënua për përvetësim të parave të Bashkimit Europian dhe u dënua duke iu ndaluar garimi për poste publike për të paktën 5 vjet. Gjykatësi gjithashtu i dha Le Pen një dënim me katër vjet burg, por 2 vjet do i kalojë me byrzyluk elektronik, ndërsa dy të tjerët iu pezulluan. Po ashtu, u dënua dhe me një gjobë prej 100,000 euro.
Por si arritëm këtu? Dhe çfarë është në rrezik? Për çfarë u akuzua Le Pen?
Le Pen, partia e saj "National Rally" (RN) dhe rreth dy duzina politikanë të tjerë të partisë u akuzuan nga prokurorët për devijimin e mbi 4.1 milion euro të fondeve të Parlamentit Evropian. Paratë duheshin përdorur për të paguar stafin në Parlamentin Europian, por Le Pen e përdori për partinë në Francë. Të pandehurit thanë se paratë ishin përdorur në mënyrë legjitime.
Çfarë do të thotë vendimi për shpresat presidenciale të Le Pen?
Vendimi i jep një goditje masive Le Pen, e cila ka garuar tre herë në zgjedhjet presidenciale. Së fundmi, sondazhet kanë treguar se Le Pen ishte kryesuese në garë, madje RN është partia më e madhe e vetme në parlament falë mbështetjes së zgjeruar mes votuesve më të rinj. Por zakonisht në shumicën e rasteve në Francë, dënimet nuk zbatohen derisa të ketë mbaruar edhe procesi i apelimit. Megjithatë, nëse gjyqtarët aplikojnë një ekzekutim të përkohshëm - siç kanë bërë tani - dënimi fillon menjëherë. Ndalimi i përkohshëm i ekzekutimit nuk do të bëjë që Le Pen të hiqet nga vendi i saj në parlament derisa të përfundojë mandati i saj, megjithëse do ta pengojë atë të kandidojë në çdo garë të re elektorale. Ndalimi i përkohshëm pesëvjeçar i ekzekutimit do të bllokojë kandidimin e saj në zgjedhjet e vitit 2027.
A ia ka hequr shpresat dënimi?
Jo domosdoshmërisht. Shpresa më e mirë e Le Pen për të kandiduar është që të qëndrojë në shfuqizimin e dënimit në apel përpara zgjedhjeve të 2027. Procesi i apelimit në Francë mund të zgjasë me muaj apo edhe vite.
Çfarë kanë thënë Le Pen dhe të tjerët për gjykimin?
Le Pen ka akuzuar prokurorët se i caktuan "vdekjen e saj politike", duke argumentuar se kërkesa për ekzekutim të përkohshëm ishte "krejtësisht joproporcionale". Ajo dhe aleatët e saj pretendojnë ka nisur një gjueti shtrigash për të mbajtur "RN" larg pushtetit, duke i bërë jehonë dhe duke hequr paralelizma edhe me problemet ligjore të Donald Trump. Por nuk është vetëm Le Pen dhe aleatët e saj që kanë shprehur shqetësimin për atë që ata e shohin si tejkalim të kompetencave të gjyqësorit. Kryeministri Francois Bayrou dhe ministri i Drejtësisë Gerald Darmanin, si dhe disa rivalë të krahut të majtë, kanë sinjalizuar "siklet" që gjyqtarët - në vend të votuesve - vendosin se kush mund të kandidojë për postin e presidentit. Kjo ka bërë që prokurorët dhe një gjyqtar të marrin kërcënime me vdekje.
Çfarë do të bëjë "RN" tani?
Udhëheqësit e RN kishin thënë se nuk prisnin që Le Pen të përjashtohej, por nëse kjo ndodh, atëherë presidenti 29-vjeçar i partisë, Jordan Bardella do të ishte kandidati i tyre për vitin 2027. Bardella kritikoi vendimin e gjykatës të së hënës, duke thënë: Sot nuk është vetëm Marine Le Pen ajo që u dënua padrejtësisht. Ishte demokracia franceze, ajo që u vra./ZËRI
Vendimi i Marine Le Pen e fut në kaos "National Rally", por mund të nxisë ekstremin e djathtë
FRANCË- Parisi është tronditur nga një "tërmet politik" që është pothuajse i sigurt se do t'i japë fund ambicieve të Marine Le Pen për zgjedhjet presidenciale të 2027-ës dhe e fut partinë e saj të ekstremit të djathtë në kaos, teksa po synonin marrjen e pushtetit në Francë. E ndaluar nga kandidimi për poste politike për 5 vjet me efekt të menjëhershëm pasi u dënua për përvetësim të fondeve evropiane për partinë e saj, e ardhmja politike e Le Pen tani vihet në dyshim. Ajo ndoshta nuk do të jetë në gjendje të zhvillojë një fushatë të katërt për presidencën në dy vjet.
Dënimi i Le Pen dhe 24 anëtarëve të tjerë të partisë për përvetësim të fondeve të Parlamentit Evropian është një goditje e madhe për partinë e saj, e cila prej kohësh është përpjekur të paraqitet si alternativa e ndershme dhe e pastër ndaj politikanëve të shkollës së vjetër.
"Koka lart, duar të pastra" ishte dikur një slogan i Frontit Kombëtar të ekstremit të djathtë, si një qasje për t'u distancuar nga mënyrat e shtrembëruara të politikanëve tradicionalë të pangopur. Ndëshkimi i Le Pen – të cilin ajo e kishte krahasuar më parë me një “dënim politik me vdekje” – është edhe më i dëmshëm personalisht sepse ajo filloi karrierën e saj politike duke veshur petkun e një kryqtareje kundër korrupsionit, pasi tha në një debat televiziv: Të gjithë kanë marrë para përveç Frontit Kombëtar… Francezët u lodhën duke parë paratë që i merr politika.
Presidenti i partisë, Jordan Bardella, 29 vjeç, i cili është popullor, por i papërvojë, tani mund të bëhet një figurë zëvendësuese për garën presidenciale, por asgjë nuk është e sigurt. Ndërsa partia u takua për të diskutuar lidhur me krizën e sotme, ai tha se demokracia franceze ishte "ekzekutuar" nga vendimi "i padrejtë".
Si u zhvillua gjyqi?
Gjykata zbuloi se midis viteve 2004 dhe 2016, partia krijoi një sistem të gjerë mashtrimi në të cilin ata morën para të destinuara vetëm për asistentët e Parlamentit Evropian, por në vend të kësaj, Le Pen i përdori paraë për stafin që punonte për partinë në zyrën e saj qendrore në Francë – duke përfshirë një truprojë dhe sekretar privat. Mashtrimi u kushtoi taksapaguesve evropianë – përfshirë taksapaguesit francezë – të paktën 4 milionë euro.
Prokurori i shtetit francez i kishte thënë gjykatës se partia e Le Pen e trajtoi Parlamentin Evropian si një "lopë parash".
Gjatë gjykimit dy mujor, gjykata dëgjoi sesi sistemi ishte ngritur sistemi i përvetësimit të parave. Në një email për Le Pen, një punonjës partie, i cili supozohej të ishte punësuar si asistent për Parlamentin Europian për katër muaj, shkroi: Do të doja të shihja Parlamentin Europian dhe kjo do të më lejonte gjithashtu të takohesha me anëtarin e Parlamentit Europian me të cilin jam i lidhur.
"Partia tregoi përbuzje për fondet publike që vinin nga xhepat e votuesve të tyre,"- tha një prokuror i shtetit francez para gjykatës gjatë gjyqit.
Por ka të ngjarë që bërthama e votuesve të Le Pen të mblidhen pas saj. Vendimi dhe dënimi madje mund të rrisin mbështetjen politike për të djathtën ekstreme. Le Pen nuk u akuzua se i kishte futur këto para në xhepin e saj, përkundrazi i kishte kanalizuar në parti në e saj. Shpallja fajtore dhe dënimi i fortë, që e ndalon atë të kandidojë për postin me efekt të menjëhershëm, i shërben narrativës së saj të viktimizimit se ekziston një elitë që dëshiron ta zhdukë atë nga karriera politike.
Figura të larta partiake thanë se dënimi në fakt mund të rrisin mbështetjen për Tubimin Kombëtar në Francë. Sigurisht, Donald Trump ka treguar në SHBA se mund të ruani mbështetjen politike edhe me një dënim penal. Për më shumë se një dekadë, Le Pen është përpjekur ta bëjë partinë e saj të ekstremit të djathtë, një forcë të devotshme kundër imigracionit, të duket e zakonshme dhe e respektueshme për një elektorat më të gjerë. Kjo përpjekje tani është dëmtuar, edhe nëse ajo pozicionohet si viktimë.
Idetë e Le Pen – duke përfshirë rritjen e numrit të policisë dhe ndalimin e shamive myslimane në të gjitha vendet publike – kanë fituar vazhdimisht mbështetje në publikun francez dhe partia e saj u bë forca më e madhe në parlament pas zgjedhjeve të parakohshme parlamentare të vitit 2024.
Pyetja tani është se si partia do përgatitet për garën presidenciale të vitit 2027; dhe nëse duhet të kandidojë për herë të parë pa një Le Pen si kandidat – pa Marine, apo dhe pa babanë e saj të ndjerë, Jean-Marie Le Pen./ZËRI
Marrë nga The Guardian
Abuzoi me fondet e BE! Marine Le Pen dënohet me 4 vite burg, i ndalohet kandidimi në zgjedhjet 2027
FRANCË-Liderja e Ekstremit të Djathtë në Francë, Marine Le Pen dhe tetë eurodeputetë u shpallën fajtorë për përvetësim të fondeve të Bashkimit Europian. Le Pen është dënuar me 4 vjet burgim, si dhe ndalimi për të kandiduar për poste publike për pesë vjet, duke i vënë në rrezik karrierën politike, pasi i shuhen aspiratat për të marrë pjesë në garën presidenciale në Francë. Gjithashtu, Marine Le Pen është gjobitur edhe me 100 mijë euro gjobë.
Sa i përket dënimit me burg, Le Pen nuk do të shkojë në qeli, pasi i është konvertuar dhe për dy vite do të monitorohet me byzylyk elektronik. Liderja e Ekstremit të Djathtë në Francë pritet ta apelojë vendimin e Gjykatës së Parisit dhe ky vendim nuk do të zbatohet tani.
Ajo mohoi akuzat se ishte në krye të "një sistemi" që synonte të përfitonte nga paratë e parlamentit të BE për partinë e saj, duke argumentuar në vend të kësaj se ishte e pranueshme të përshtatej puna e ndihmësve parlamentar me nevojat e ligjvënësve të partisë së saj.
Le Pen i tha gjykatës: Unë absolutisht nuk ndjej se kam kryer parregullsinë më të vogël, lëvizjen më të vogël të paligjshme.
Le Pen dhe 24 kolegë të tjerë të Tubimit Kombëtar janë akuzuar për përvetësim të parave të destinuara për ndihmësit e Parlamentit Evropian për të paguar stafin që punonte për partinë gjatë një periudhe 4-vjeçare. Parlamenti Evropian vlerësoi se fondet e supozuara të përvetësuara arrinin në rreth 7 milionë euro.
Me çfarë akuzash përballet Le Pen?
Hetimi paraprak u hap pas një raporti nga Komisioni Kombëtar për Llogaritë e Fushatës dhe Financimin Politik. Organi është përgjegjës për monitorimin e shpenzimeve të kandidatëve. Në zgjedhjet franceze, kandidatëve u ndalohet të tejkalojnë një kufi të caktuar parash. RN (i njohur më parë si Fronti Kombëtar) u akuzua se midis viteve 2004 dhe 2016, kishte punësuar asistentë parlamentarë për të punuar vetëm për partinë e saj, por i paguante me fondet e BE-së. Në punë ajo kishte marrë një truprojë për të, e një për të atin Jean-Marie Le Pen./ZËRI
