Rubio: Ditët e ardhshme do të tregojnë nëse Putini është serioz për paqen
SHBA- Sekretari amerikan i Shtetit Marco Rubio tha të dielën se në ditët e ardhshme do të përcaktohet se sa serioz është presidenti rus Vladimir Putin për paqen në Ukrainë, ndërsa zyrtarët amerikanë nisen për në Arabinë Saudite për takime me zyrtarët rusë. Kryediplomati i Amerikës hodhi poshtë gjithashtu shqetësimet evropiane se janë përjashtuar nga bisedimet mes Rusisë dhe Shteteve të Bashkuara, duke thënë në një intervistë me CBS se procesi i negociatave është ende në fazat paraprake.
Më herët të dielën, agjencia Reuters njoftoi se zyrtarët amerikanë u kishin dorëzuar zyrtarëve evropianë një pyetësor ku ndër të tjera kërkonin të dinin ndër të tjera, se me sa trupa mund të kontribuonin për zbatimin e një marrëveshjeje paqeje.
Por asnjë aleat evropian nuk ishte ftuar në Arabinë Saudite, ku zyrtarët rusë dhe amerikanë pritet të nisin bisedimet në fillim të javës lidhur me rrugët për përfundimin e luftës në Ukrainë.
“Presidenti Trump bisdeoi me Vladimir Putinin javën e kaluar dhe Vladimir Putin u shpreh i interesuar për paqen, ndërsa presidenti shprehu dëshirën e tij që t’i jepet fund konfliktit në një mënyrë të qëndrueshme dhe që ruan sovranitetin ukrainas. Natyrisht kjo duhet të pasohet me veprime konkrete, kështu që javët dhe ditët e ardhshme do të përcaktojnë nëse është diçka serioze apo jo. Në fund të fundit, një telefonatë nuk sjell paqen”, tha Rubio në një intervistë për televizionin CBS.
I dërguari amerikane për Lindjen e Mesme, Steve Witkoff dhe këshilltari i Sigurisë Kombëtare, Mike Waltz, do të nisen për në Arabinë Saudite të dielën në mbrëmje, tha Witkoff në një intervistë për Fox News më herët gjatë ditës. Sekretari Rubio tha se ai ishte planifikuar gjithsesi të shkonte në Arabinë Saudite për shkak të një udhëtimi zyrtar në rajon. Përbërja e delegacionit rus ende nuk është finalizuar, tha Rubio.
A DO TË KETË ROL EVROPA NË BISEDIMET E PAQES?
Sekretari Rubio dhe këshilltari Witkoff hodhën poshtë shqetësimet se Ukraina dhe udhëheqësit evropianë nuk do të kenë rol në negociatat e paqes, pavarësisht se i dërguari i Trump për Ukrainën, Keith Kellogg, sugjeroi pikërisht një gjë të tillë në Konferencën e Sigurisë së Mynihut.
Witkoff tha në intervistën për Fox News se zyrtarët ukrainas kishin takuar disa zyrtarë amerikanë gjatë konferencës, ndërsa Presidenti Trump kishte biseduar me presidentin ukrainas Volodymyr Zelenskiy javën e kaluar. Rubio tha se ukrainasit dhe evropianët e tjerë do të jenë të përfshirë në çdo proces kuptimplotë negociatash.
“Nëse rezulton të jenë negociata reale dhe nuk jemi ende në atë pikë – por nëse kjo do të ndodhë, Ukraina do të duhet të jetë e përfshirë sepse ata janë ata që u pushtuan (nga Rusia) dhe evropianët do të duhet të përfshihen sepse kanë sanksione ndaj Putinit dhe Rusisë. Thjesht nuk jemi ende në atë pikë”, tha Rubio.
Ndërkohë Presidenti francez Emmanuel Macron do të mbajë të hënën një takim urgjent të nivelit të lartë të udhëheqësve evropianë për të diskutuar mbi luftën në Ukrainë dhe sigurinë evropiane, në përpjekje për një përgjigje konkrete për qasjen e Presidentit amerikan Donald Trump ndaj konfliktit.
Shqetësimi kryesor i tyre është se mund të humbin sigurinë se mund tp mbështeten tek mbrojtja ushtarake e Shteteve të Bashkuara dhe se Trump mund të arrijë një marrëveshje paqeje për Ukrainën me presidentin rus, me lëshime në kurris të Kievit dhe që mund të cenojë sigurinë më të gjerë kontinentale evropiane.
I pyetur nëse kishte diskutuar për heqjen e sanksioneve ndaj Rusisë gjatë një telefonate të shtunën me ministrin e Jashtëm rus Sergei Lavrov, Rubio nuk pranoi ta konfirmonte një gjë të tillë, duke thënë thjesht se ata "nuk hynë në detaje". Pas telefonatës, Moska tha se të dy kryediplomatët kishin diskutuar për heqjen e "barrierave të njëanshme" të vendosura nga administrata e mëparshme amerikane në marrëdhëniet me Rusinë. Rubio tha se ai kishte ngritur gjatë telefonatës çështjen e kushteve "të vështira" në të cilat funksionon ambasada amerikane në Moskë dhe kishte thënë se për të pasur përparim në arritjen e paqes në Ukrainë, si Rusia ashtu edhe SHBA-ja do të kenë nevojë për ambasada që funksionojnë siç duhet në vendet reciproke./VOA
U injoruan nga Trump/ Udhëheqësit evropianë thërrasin një takim urgjent për Ukrainën
PARIS- Një takim urgjent do të mbahet në Paris, nga presidenti Emmanuel Macron. Kryeministri britanik Keir Starmer, kancelari gjerman Olaf Scholz, sekretari i përgjithshëm i NATO-s Mark Rutte dhe presidentja e Komisionit Evropian (KE) Ursula von der Leyen do të marrin pjesë në një takim në Paris për të diskutuar mbi Ukrainën. Në deklaratë zyrtare thuhet se në takim do të marrin pjesë edhe zyrtarë nga Italia, Polonia, Spanja, Holanda dhe Danimarka.
Njoftimi i takimit erdhi një ditë pasi i dërguari i posaçëm i presidentit amerikan Donald Trump për Ukrainën, Keith Kellogg, tha se Evropa nuk do të kishte vend në tryezën e bisedimeve mes SHBA-së dhe Rusisë.
Pas njoftimit, kryetari i Dumës ruse Vyacheslav Volodin tha se ngjarjet në Mynih treguan se Bashkimi Evropian është i paaftë, nuk kupton se çfarë po ndodh në botë. Në një postim të titulluar "Histeria në Mynih" në Telegram, Vyacheslav Volodin tha se elitat politike evropiane kanë vetëm veten për të fajësuar për situatën.
Konferenca e Sigurisë së Mynihut përfundon sot pas një fundjave dramatike gjatë së cilës nënpresidenti amerikan J.D. Vance ofendoi liderët evropianë , duke i akuzuar ata për mbytje të fjalës së lirë dhe presidenti ukrainas Volodymyr Zelensky deklaroi se ishte koha për të krijuar një ushtri evropiane. Ndërsa liderët evropianë u përpoqën ta portretizonin veten si të bashkuar dhe se nuk mund të kishte bisedime paqeje në Ukrainë pa ta, sekretari i Shtetit i SHBA Marco Rubio foli me homologun e tij rus Sergei Lavrov. Palët kanë dërguar një delegacion në Arabinë Saudite javën e ardhshme./ZËRI
Furnizues strategjik për Perëndimin? Analiza e VOA: Ukraina dhe SHBA peshojnë marrëveshjen për mineralet
SHBA- Rezervat e mëdha me minerale të rralla i japin Ukrainës mundësitë për të qenë një furnizues strategjik për Perëndimin. Presidenti Donald Trump po shqyrton një marrëveshje që do të siguronte vazhdimin e mbështetjes amerikane për Ukrainën në luftën kundër Rusisë në këmbim të qasjet tek mineralet e saj. Siç njoftojnë korrespondentet e Zërit të Amerikës, Myroslava Gongadze nga Varshava, dhe Anna Chernikova nga Kievi, ky propozim po diskutohet gjatë Konferencës së Sigurisë në Munih.
Miniera Zavallivsky në Ukrainën qendrore ka një nga depozitat më të mëdha të grafinës në Evropë, një material kyç për bateritë e automjeteve elektrike dhe reaktorët bërthamorë. Kjo është një nga rezervat e mëdha të mineraleve të rralla që synojnë Shtetet e Bashkuara ndërsa përpiqen të ulin varësinë nga Kina për materiale të tilla.
Drejtuesit e minierës thonë se me investimet e duhura ajo mund të bëhet një lojtare globale në sektorin e grafinës.
“Bëhet fjalë për miliarda dollarë dhe vite investime. Qeveria ukrainase duhet të punojë ngushtë me partnerët amerikanë, evropianë dhe lojtarë të fuqishëm në mbarë botën për të bërë një lëvizje në këtë proces, për ta krijuar këtë bazë së bashku”, thotë Ostap Kostyuk, drejtues i minierës së grafinës, Zavallivsky.
Qeveria ukrainase thotë se vendi i saj ka depozita minerale të 22 nga 50 materialet strategjike të identifikuara si kritike nga Shtetet e Bashkuara. Po ashtu ka 25 nga 34 mineralet që Bashkimi Evropian i ka klasifikuar si tejet të rëndësishme. Bëhet fjalë për grafinë, litium, titanium dhe uranium, minerale thelbësore për industrinë e mbrojtjes, energjinë e gjelbër dhe industritë e teknologjisë së lartë. Ekspertët thonë se Ukraina ka potencial të lartë por kërkohen investime të mëdha për t’i shfrytëzuar këto rezerva. Zëri i Amerikës bisedoi me zonjën Mariia Kurylo, e cila është me Komisionin Shtetëror për Burimet Minerale.
“Projektet për mineralet e rralla jo vetëm që janë shumë të rëndësishme, por janë strategjike për zhvillimin, jo vetëm për partnerët perëndimorë por edhe për zhvillimin tonë”.
Kompania ukrainase BGV, e cila investon në miniera, thotë se ka shpenzuar 100 milionë dollarë në projekte të mineraleve kritike, por për të rritur operacionet kërkohen investime shtesë prej qindra miliona dollarësh. Zëri i Amerikës bisedoi me Serhii Voitsehovskyin, anëtar bordi i kompanisë ukrainase të investimeve minerare, BGV.
“Zhvillimi i minierës së grafinës në Balakhivka kërkon investim kapitali prej rreth 450 milionë dollarësh”.
Ndërsa Amerika dhe vendet e tjera perëndimore kërkojnë të ulin varësinë nga Kina për minerale kritike, Ukraina sheh një mundësi për të forcuar ekonominë dhe sigurinë e saj.
“Kemi një strategji që sjell përfitime në çdo aspekt. Partnerët kanë nevojë për këto materiale, që në të vërtetë janë produkte me vlerë të lartë”, thotë Serhii Voitsehovskyi me firmën BGV.
Amerika dhe Evropa janë përpjekur të ulin varësinë e tyre nga Kina, furnizuesi kryesor në botë me minerale të rralla. Roman Opimakh ka qenë drejtor i përgjithshëm i Shërbimit Gjeologjik të Ukrainës.
“Ukraina do të ndihmojë Evropën dhe Amerikën për të ulur varësinë nga Kina dhe pjesërisht nga Rusia. Në të njëjtën kohë forcon qëndrueshmërinë në vend. Investimet e shumta dhe furnizimet e larta mund të funksionojnë si një kupolë e hekurt për Ukrainën”.
Ai thotë se partneriteti është strategjik dhe ekonomik. Pavarësisht luftës dhe humbjeve të mundshme të territoreve, ai thotë se shumica e mineraleve kritike mbeten nën kontrollin e Kievit./VOA
Analiza e CNN: Telefonatat Trump-Putin shkaktojnë panik në Ukrainë
KIEV- Ukraina është në një gjendje paniku, sidomos pas njoftimit të Donald Trump, i cili foli me Vladimir Putin për të arritur armëpushim. Siç raporton CNN, Ukraina i ka quajtur gjithmonë zonat nën kontrollin rus "territore të pushtuara përkohësisht" dhe këmbëngul se kërkon t'i bëjë sërish pjesë të territorit të tyre. Megjithatë, presidenti amerikan, Donald Trump thotë se kjo nuk ka gjasa që të ndodhë.
Komenti i Donald Trump erdhi pas një telefonate 90-minutëshe me homologun e tij rus. Pak në Ukrainë besojnë se Trump do të negociojë me mirëbesim dhe të sigurojë pozita të mira për ta.
Ata dyshojnë se Putini dëshiron paqe
Yuliya Kazdobina, një eksperte e politikës së jashtme në institutin ukrainas Prism, i tha CNN se ajo nuk beson se lideri rus dëshiron paqen. Ekspertja thotë se Rusia ka një rekord të shkeljes së marrëveshjeve me Ukrainën në dekada.
“Në vitin 1994, Ukraina ra dakord të heqë dorë nga armët e saj bërthamore në këmbim të garancive nga Shtetet e Bashkuara, Mbretëria e Bashkuar dhe Rusia se do të respektonin sovranitetin dhe integritetin territorial të Ukrainës. Në vitin 2015, pas aneksimit të paligjshëm të Krimesë dhe ndezjes së konfliktit në Ukrainën lindore, Moska nënshkroi një marrëveshje armëpushimi, vetëm për ta shkelur atë në mënyrë të përsëritur dhe më pas filloi një pushtim në shkallë të plotë të Ukrainës 7vjet më vonë”, tha ajo.
Kazdobina i tha CNN se Rusia është me dy fytyra: Mund të jetë e lezetshme, por kur bëhet fjalë për të bërë lëshime dhe për të bërë paqe, nuk e bën kurrë.
Çfarë thotë Kievi?
Pas njoftimit të telefonatës Trump-Putin, presidenti ukrainas Volodymyr Zelenskyy theksoi se vendi i tij nuk do të pranonte një marrëveshje paqeje që SHBA-të do të lidhnin me Rusinë pa pjesëmarrjen e Kievit.
“Si vend i pavarur, ne thjesht nuk mund të pranojmë asnjë marrëveshje pa ne. Dhe këtë ua bëj shumë të qartë partnerëve tanë. Ne nuk do të pranojmë asnjë negociatë dypalëshe për Ukrainën pa ne,”- tha ai dhe pranoi se fakti që Donald Trump foli fillimisht me Vladimir Putinin nuk ishte “e këndshme”. Edhe ukrainasit kanë pikëpamje të ngjashme. Studenti Nazar Voloshenko tha se çdo bisedë që mund të çojë në humbjen e territoreve shtesë do të ishte katastrofike për vendin.
"Ne mund të mbetemi pa territoret e pushtuara përkohësisht, pa pjesë të rajonit Kherson, rajonit të Zaporizhia dhe Krimesë së shumëvuajtur. Ne duhet të marrim atë që me të drejtë është e jona,”- tha ai.
Forcat ruse tani mbajnë pothuajse 20% të territorit të Ukrainës, nga afërsisht 7% që kontrollonin para pushtimit. Vlerësohet gjithashtu se rreth 6 milionë njerëz, përfshirë 1 milionë fëmijë, jetojnë nën pushtimin rus, në një situatë që Kombet e Bashkuara e kanë cilësuar si "të mjerë për të drejtat e njeriut", pasi opozita është e shtypur, ndërsa ka akuza për shënjestrimin e komuniteteve apo individëve që Moska i konsideron si pengesë për procesin e rusifikimit.
Precedent i rrezikshëm
Këshilltari ekonomik Oleksandr Sokhatskyi tha për CNN se ai beson se çdo marrëveshje do të ishte e papranueshme nëse kufijtë e Ukrainës ndryshojnë nga ato që ishin para luftës, duke marrë parasysh koston njerëzore.
“Duke pasur parasysh sa viktima ka pasur tashmë kjo luftë dhe që ajo të përfundojë me kushtet e dikujt tjetër... atëherë pse vdiqën ata (ushtarët ukrainas) dhe pse i mbrojtën këto toka? Kjo do të krijojë një precedent dhe do t'i tregojë Rusisë se mund të sulmojë çdo vend, të pushtojë territore pa u ndëshkuar fare,"- tha ai.
Nga ana tjetër Putini i ka bërë vazhdimisht të qarta qëllimet e tij: ai dëshiron të fitojë kontrollin e të gjitha rajoneve lindore të Ukrainës, Donetsk dhe Luhansk. Por shumë në Ukrainë shqetësohen se, edhe nëse ai fillimisht bie dakord për një armëpushim, ai nuk do ndalet.
“Askush dhe asgjë nuk do ta ndalojë Putinin të na sulmojë përsëri dhe të pushtojë një ose më shumë rajone. Nëse Evropa dhe Amerika nuk na ndihmojnë, atëherë vendosja e paqes tani ka të ngjarë të çojë në një luftë tjetër pas disa vitesh.”/ZËRI
Zelenskyy mesazh Trumpit: Mos i beso Putinit, ai nuk dëshiron paqe!
KIEV- Presidenti ukrainas Volodymyr Zelenskyy tha se ishte i sigurt se Rusia do t'i shpallte luftë NATO-s nëse Donald Trump do reduktonte fondet amerikane për Aleancën e Atlantikut të Veriut. Zelenskyy pranoi se Trump ka aftësinë të bëjë presion ndaj presidentit rus drejt një marrëveshjeje armëpushimi, gati tre vjet pas fillimit të pushtimit rus të Ukrainës. Por, megjithatë e ka një paralajmërim.
"Mos i beso Putin (i drejtohet Trumpit). Ne besojmë se Putini do t'i shpallë luftë NATO-s,"- theksoi Zelenskyy në një intervistë që dha për rrjetin amerikan të lajmeve NBC, në margjinat e Konferencës së Sigurisë së Mynihut.
Presidenti ukrainas vlerësoi se Putini po pret me padurim një dobësim të NATO-s, diçka që mund të ndodhë nëse SHBA-ja tërhiqte mbështetjen e saj ushtarake në Evropë.
“Nuk e di nëse (rusët) do të duan 30% të Evropës, 50%, nuk e di. Askush nuk e di. Por me heqjen e mbështetjes ushtarake do ta kenë këtë mundësi,”- paralajmëroi Zelenskyy, ndërsa shtoi se ushtria ruse ka vendosur një numër të madh ushtarësh në territorin e Bjellorusisë.
Në të njëjtën kohë, duke iu referuar një projektmarrëveshjeje të dorëzuar nga Uashingtoni në Kiev për aksesin amerikan në mineralet ukrainase, Zelenskyy theksoi se marrëveshja nuk mund të nënshkruhet nëse Kievi nuk merr garancitë e sigurisë që kërkon nga SHBA.
Dje, të shtunën, presidenti ukrainas iu përgjigj negativisht propozimit të Uashingtonit për të shfrytëzuar mineralet kritike. Tre burime thanë se qeveria amerikane kishte propozuar marrjen në pronësi të 50% të mineraleve kritike të Ukrainës./ZËRI
Zelensky: Ukraina nuk është ftuar për bisedimet SHBA-Rusi në Arabinë Saudite
KIEV- Presidenti i Ukrainës, Volodymyr Zelensky, ka thënë se Kievi nuk është ftuar për të marrë pjesë në bisedimet mes Shteteve të Bashkuara dhe Rusisë, që pritet të zhvillohen në Arabinë Saudite, për përfundimin e luftës së Moskës në Ukrainë. Duke folur më 15 shkurt, Zelensky tha gjithashtu se Ukraina nuk do të bisedojë me Rusinë pa u këshilluar fillimisht me aleatët e vet evropianë.
"Ne nuk kemi asnjë dokument, asnjë ftesë. Për mua është e çuditshme të flas në këtë rast, në këtë mënyrë, nëse më parë nuk kemi zhvilluar asnjë bisedë mes vete si aleatë dhe partnerë strategjikë", tha ai gjatë Konferencës së Sigurisë në Munih.
"Për aq sa di unë, Rusia nuk është partneri ynë strategjik", shtoi ai.
Reagimi i Zelenskyt vjen pasi presidenti i Shteteve të Bashkuara, Donald Trump, do ta dërgojë një ekip zyrtarësh së lartë amerikanë në Arabinë Saudite, për t’i filluar bisedimet me Rusinë, thanë zyrtarët amerikanë për media të ndryshme.
Zyrtarët amerikanë thanë për gazetarë më 15 shkurt se sekretari amerikan i Shtetit, Marco Rubio, këshilltari i Sigurisë Kombëtare të Shtëpisë së Bardhë, Mike Waltz, dhe negociatori për Lindjen e Mesme, Steve Witkoff, do të marrin pjesë në bisedime. Keith Kellogg, i dërguari i Trumpit për Ukrainën dhe Rusinë, nuk pritet të marrë pjesë në bisedime, sipas mediave që cituan zyrtarë amerikanë.
Zyrtarët amerikanë nuk dhanë hollësi se kur do të zhvillohen takimet në Arabinë Saudite. Rubio mbërriti në Izrael mbrëmjen më 15 shkurtit, pasi mori pjesë në konferencën e Munihut. Mykhaylo Podolyak, këshilltar i lartë i Zelenskyt, tha se "nuk ka negociatorë që do ta përfaqësojnë Ukrainën në Arabinë Saudite".
"Sot, nuk ka asgjë në tryezën e bisedimeve që mund të diskutohet. Rusia nuk është e gatshme për negociata", tha ai për televizionin ukrainas pas komenteve të Zelenskyt më 15 shkurt.
Ndërkohë, liderët evropianë pritet të mblidhen javën e ardhshme në Paris për një takim urgjent në lidhje me luftën në Ukrainë.
Ky takim pritet të mbahet pas shqetësimeve se Uashingtoni do të lërë Evropën jashtë bisedimeve me Rusinë për t'i dhënë fund luftës në Ukrainë. Kellogg shkaktoi habi kur tha se Evropa mund të mos jetë në “tryezën”, nëse Shtetet e Bashkuara i ndërmjetësojnë bisedimet për t’i dhënë fund luftës së Rusisë në Ukrainë. Duke folur në një panel dreke në Konferencën e Sigurisë në Munih më 15 shkurt, Kellogg la të kuptohet se Uashingtoni synon të bëjë përparime të rëndësishme brenda disa javësh, duke theksuar se ai po vepron "me kohën e Trumpit".
Mes shqetësimeve në Kiev dhe Bashkimin Evropian se ata mund të anashkalohen pasi Trump foli me presidentin rus Vladimir Putin këtë javë dhe tha se Rusia dhe Shtetet e Bashkuara do të fillonin menjëherë negociatat, Kellogg theksoi se Ukraina dhe Evropa nuk do të përjashtohen.
"Duhet t’i përfshish aleatët. A do të luajnë rol ata? Sigurisht që po. Ne duam të sigurohemi që është një paqe e qëndrueshme dhe afatgjatë", shtoi ai.
Megjithatë, kur u pyet nëse mund të garantonte audiencën se "ukrainasit do të jenë në tryezë dhe evropianët do të jenë në tryezë", Kellogg u përgjigj: "Oh, mirë, sapo ndryshuat gjithë dinamikën".
"Përgjigja për pyetjen e fundit... është jo", tha ai, duke iu referuar me sa duket Evropës. "Përgjigja për pjesën e parë të asaj pyetjeje është po, sigurisht që ukrainasit do të jenë aty".
Departamenti amerikan i Shtetit tha më 15 shkurt se sekretari Rubio bisedoi në telefon me ministrin e Jashtëm rus, Sergei Lavrov, më herët gjatë ditës. Biseda e Rubios me Lavrovin “u bë në vazhdën e bisedimeve pas bisedës së presidentit Donald Trump me presidentin rus Vladimir Putin më herët këtë javë”, thuhet në një komunikatë të shkurtër. Presidenti i Ukrainës, Volodymyr Zelensky, dhe liderët e BE-së, kanë shprehur kundërshtimin e tyre ndaj zhvillimit të bisedimeve pa përfshirjen e negociatorëve të tyre.
Shefja e politikës së jashtme të BE-së, Kaja Kallas, bëri thirrje kundër një “zgjidhjeje të shpejtë” dhe një “marrëveshjeje të pistë” për përfundimin e konfliktit, duke këmbëngulur se asnjë marrëveshje paqeje nuk mund të zbatohet pa përfshirjen e Evropës dhe Ukrainës. Duke iu drejtuar konferencës së Munihut, Zelensky u bëri thirrje vendeve të Evropës për themelimin e një ushtrie të përbashkët, në rast të tërheqjes së mundshme të Shteteve të Bashkuara dhe përballë kërcënimeve të vazhdueshme nga Rusia.
“Ka ardhur koha, Forcat e Armatosura të Evropës duhet të krijohen”, tha ai.
“Nëse amerikanët vendosin të largohen, ta kufizojnë praninë e tyre, nuk është gjë e mirë, natyrisht, është e rrezikshme”, tha Zelensky. Në margjinat e konferencës së Munihut, vendet e industrializuara të G7-ës ritheksuan “mbështetjen e tyre të palëkundur për Ukrainën./REL
Konferenca e Sigurisë në Mynih, G7: Rikonfirmojmë mbështetjen e palëkundur për Ukrainën
MYNIH- Ministrat e Jashtëm të shtatë vendeve më të industrializuara (G7) rikonfirmuan “mbështetjen e tyre të palëkundur për Ukrainën”, pas një takimi në kuadër të Konferencës së Sigurisë në Mynih. Në takimin e kryediplomatëve të Shteteve të Bashkuara, Francës, Gjermanisë, Mbretërisë së Bashkuar, Kanadasë, Japonisë dhe Italisë, si dhe të BE-së, mori pjesë edhe ministri i Jashtëm ukrainas, Andrii Sybiha.
“Anëtarët e G7-s diskutuan luftën shkatërruese të Rusisë në Ukrainë. Ata nënvizuan angazhimin e tyre për të punuar së bashku për të ndihmuar për të arritur një paqe të qëndrueshme dhe një Ukrainë të fortë dhe të begatë dhe riafirmuan nevojën për të zhvilluar garanci të forta sigurie”, thanë ministrat në një deklaratë të përbashkët.
Ukraina ka mbrojtur veten kundër një pushtimi rus në shkallë të plotë për gati tre vjet me mbështetjen e Perëndimit. Vendet e G7 kanë ofruar mbështetje ushtarake dhe financiare për Kievin, përfshirë vënien në dispozicion të Ukrainës asetet shtetërore ruse të ngrira në Perëndim. Deklarata nuk përjashton sanksione të reja kundër Rusisë.
“Çdo sanksion i ri shtesë pas shkurtit duhet të lidhet me faktin nëse Federata Ruse hyn në përpjekje reale dhe me besim të mirë për t’i dhënë një fund të qëndrueshëm luftës kundër Ukrainës që i garanton asaj siguri dhe stabilitet afatgjatë si një vend sovran dhe i pavarur”, thuhet në deklaratën e përbashkët.
Shtetet gjithashtu u angazhuan për një paqe të qëndrueshme në Lindjen e Mesme. Ato mbështetën marrëveshjen e negociuar mes Izraelit dhe organizatës militante palestineze Hamas, e cila parashikon një armëpushim dhe lirimin e pengjeve të mbajtura nga Hamasi. Zyrtarët e lartë gjithashtu bënë thirrje për një rritje të ndihmave humanitare për Rripin e Gazës të shkatërruar nga lufta./ZËRI
Ekipi i Trump do të zhvillojë negociatatat për paqe mes Rusisë dhe Ukrainës në Arabinë Saudite
UASHINGTON- Zyrtarë të lartë të administratës së Presidentit amerikan Donald Trump do të fillojnë bisedimet e paqes me negociatorët rusë dhe ukrainas në Arabinë Saudite në ditët në vijim, sipas një ligjvënësi amerikan dhe një burimi që ka dijeni për planet. Sekretari i Shtetit Marco Rubio, Këshilltari për Sigurinë Kombëtare, Mike Waltz dhe i dërguari i Shtëpisë së Bardhë për Lindjen e Mesme, Steve Witkoff do të udhëtojnë në Arabinë Saudite, i tha ligjvënësi amerikan Michael McCaul agjencisë Reuters në Mynih. Një burim me njohuri për planet, konfirmoi se bisedimet do të mbahen.
Rusia filloi agresionin ndaj Ukrainës fqinje në shkurt 2022. Rusia ka nën kontroll rreth një të pestën e Ukrainës dhe ka kërkuar që çdo marrëveshje paqeje të parashikojë që Kievi të heqë dorë nga pjesë të territorit të saj dhe të ketë një status të përhershëm neutral.
Ukraina kërkon që Rusia të tërhiqet nga territori që ka marrë nën kontroll si edhe që të anëtarësohet në NATO ose të marrë garanci ekuivalente sigurie për të parandaluar një sulm të ngjashëm nga Moska në të ardhmen. Sekretari Rubio pati një telefonatë të shtunën me homologun e tij rus, Sergei Lavrov gjatë së cilës ata diskutuan për konfliktin në Ukrainë, thanë të dyja palët. Ata ranë dakord për kontakte të rregullta për të përgatitur një takim midis presidentit rus Vladimir Putin dhe Presidentit Trump, tha Ministria e Jashtme e Rusisë.
Ligjvënësi republikan McCaul, kryetar i Komisionit të Punëve të Jashtme të Dhomës së Përfaqësuesve, tha se siç e kishte kuptuar ai, Presidenti ukrainas Volodymyr Zelenskiy ishte ftuar për të marrë pjesë në bisedimet në Arabinë Saudite. Zoti McCaul tha se bisedimet kishin për qëllim organizimin e një takimi mes presidentëve Trump, Putin dhe Zelenskiy "për të sjellë përfundimisht paqen dhe për t'i dhënë fund këtij konflikti".
I pyetur për takimin e planifikuar midis zyrtarëve amerikanë dhe rusë në Arabinë Saudite, zoti Zelenskiy i cili ishte në Gjermani për të marrë pjesë në Konferencën e Sigurisë së Mynihut - u tha gazetarëve: "Ndoshta ka diçka (në) tryezë, por jo në tryezën tonë. Nuk kam parë asnjë ftesë ... (për) Ukrainën për t'u takuar me të dërguar të tjerë."
Ai tha të premten se do të vizitojë Emiratet e Bashkuara Arabe, Arabinë Saudite dhe Turqinë, por nuk tha se kur. Megjithatë, udhëheqësi ukrainas tha se nuk kishte plane të takohej me zyrtarë amerikanë apo rusë gjatë atyre vizitave.
Presidenti Zelenskiy tha më herët të shtunën se Ukraina nuk do të pranonte kurrë asnjë marrëveshje paqeje të arritur pas shpinës së saj ose pa përfshirjen e Kievit. Ukraina ka thënë vazhdimisht se dëshiron të hartojë një strategji të përbashkët me Shtetet e Bashkuara dhe Evropën, përpara çdo takimi Trump-Putin. Biseda e zotit Trump me presidentin rus të mërkurën dhe gjasat se mund të ketë lëshime ndaj Moskës për kërkesat kryesore të Ukrainës, shkaktoi shqetësim si në Kiev ashtu edhe mes aleatëve evropianë në NATO, të cilët thanë se druheshin se Shtëpia e Bardhë mund të bënte një marrëveshje pa to.
Zyrtarët evropianë thanë se çdo marrëveshje do të ishte e pamundur të zbatohej nëse ata dhe ukrainasit nuk përfshiheshin në negociata. Zoti Trump, duke folur para gazetarëve në Shtëpinë e Bardhë të enjten, tha se Ukraina do të kishte një vend në tryezë gjatë çdo negociate paqeje me Rusinë për përfundimin e luftës.
Negociatat për një marrëveshje kritike për mineralet e rralla vazhduan dhe zoti Zelenskiy që tha se një projekt-dokument nga Uashingtoni nuk përfshinte dispozitat e sigurisë që i nevojiten Kievit. Tre burime thanë se Shtetet e Bashkuara kishin propozuar marrjen në pronësi të 50% të mineraleve kritike të Ukrainës./VOA
