EUROPË- Një valë të nxehti po godet Evropën, duke shkaktuar zjarre, ndërprerje udhëtimesh dhe ndikime serioze në shëndetin publik të qytetarëve. Temperaturat arritën në 40 gradë Celsius në shumë pjesë të Evropës Jugore gjatë fundjavës ndërsa autoritetet në Spanjë, Portugali, Itali dhe Francë u bënë thirrje njerëzve të qëndrojnë zona të freskëta dhe të mbrojnë grupet vulnerabël.
Në Spanjë, zhiva arriti në 46 gradë Celsius, dhe ky qershor pritet të thyejë çdo rekord temperature. Në Portugali, qeveria i këshilloi qytetarët të shmangin daljen gjatë orëve më të nxehta të ditës, pasi u regjistruan raste të goditjes nga nxehtësia. Në Itali, po shqyrtohet një ndalim lokal i punës në terren, pasi spitalet kanë regjistruar një rritje të rasteve të goditjes nga nxehtësia, kryesisht tek të moshuarit, pacientët me kancer dhe të pastrehët. Qytetet e Milanos, Napolit, Romës, Firences dhe Venecias janë me "alarm të kuq".
Departamentet e urgjencës në spitalet italiane kanë raportuar një rritje prej 10% të rasteve të goditjes nga nxehtësia.
Në Venecia, turet me guidë janë falas për personat mbi 75 vjeç nëpër muze dhe ndërtesat publike me ajër të kondicionuar, ndërsa në Romë, pishinat janë falas për personat mbi 70 vjeç. Përveç kësaj, në Bolonjë janë krijuar "streha" për ata që kanë nevojë.
Temperatura rekord janë shënuar edhe në det! Temperatura në Mesdhe tejkaloi 26° Celsius në Ishujt Balearik, një limit që zakonisht regjistrohet në mesin e gushtit.
Në Turqi, një zjarr i madh shpërtheu në vendpushimin bregdetar të Foca-s, në Izmir, duke u përhapur me shpejtësi për shkak të erërave të forta. Më shumë se 175 shtëpijanë në rrezik dhe të paktën 550 persona u evakuuan. Autoritetet lokale thanë se shkaku i mundshëm i zjarrit ishte zjarrvënie e qëllimshme ose një defekt në një linjë të tensionit të lartë. Aeroporti i Izmirit u mbyll përkohësisht të dielën pasdite, ndërsa qindra pasagjerë mbetën të bllokuar.
Në Greqi, Kiosi u godit nga një zjarr i madh që ka shkatërruar mbi 47,000 hektarë pyje dhe tokë bujqësore. Në Atikë, zjarret në Palaia Fokaia dhe Thymari shkaktuan evakuime në pesë vendbanime, ndërsa temperatura tejkaloi 40°C.
Vala e të nxehtit po përhapet në veri, me Parisin që pritet të "kapë" 39 gradë Celsius, ndërsa Londra 35 gradë Celsius, temperatura rekord për këtë verë. Në Britani, Zyra Meteorologjike parashikon që e hëna mund të thyejë rekordin e qershorit nga viti 1976, kur temperatura arriti në 35.6 gradë Celsius.
Në Francë, 84 nga 101 rajone janë në "alarm portokalli" për valë të nxehti, me zjarre që shpërthejnë në rajonin Corbières të Aude, në jugperëndim, duke shkaktuar evakuimin e kampeve dhe të një manastiri./ZËRI
