BRITANI E MADHE- Momente paniku në aerportin e Luton në Londër ku ka rënë një zjarr i madh, dhe për këtë shkak janë pezulluar të gjitha fluturimet deri në pasditen e sotme.
Videot dramatike të shpërndara nga dëshmitarët në rrjetet sociale tregojnë zjarr në katin e fundit të parkingut, ku rreth 80% e zonës është e përfshirë nga flakët.
Dëshmitarët okularë e përshkruan skenën si kaotike, duke treguar se ka pasur shumë makina që kanë marrë flakë.
Shtëllungat e tymit mbuluan qiellin, ndërsa dëmet materiale janë të konsiderueshme.
Ngjarja ndodhi në Terminal Car Park 2 në Bedfordshire, teksa shërbimet e urgjencës, Shërbimi i Zjarrfikësve Bedfordshire shkuan menjëherë në ndihmë.
Pavarësisht pamjeve alarmante dhe kaotike si pasojë e zjarrit, fatmirësisht nuk raportohet për viktima. Aeroporti tha në një deklaratë: "Të gjitha fluturimet janë pezulluar aktualisht pasi shërbimet e urgjencës i përgjigjen zjarrit që është përhapur në Terminal Car Park 2.
Qasja në aeroport është aktualisht e kufizuar dhe ne kërkojmë që njerëzit të mos udhëtojnë në aeroport në këtë moment".
Në deklaratën e Aeroportit thuhej se stafi shtesë ishte në dispozicion për të ofruar ndihmë për pasagjerët./Zëri.ai
