SHBA-Donald Trump ka thënë se gjyqi i tij historik dhe dënimi penal kanë qenë “shumë të vështira” për gruan e tij, ish-Zonjën e Parë Melania Trump. Trump tha gjatë intervistës se beteja e tij ligjore në Nju Jork ka qenë veçanërisht e vështirë për gruan e tij. Gjyqi përfshinte detaje të çuditshme të takimit të supozuar mes zotit Trump dhe Daniels. Në mesine tyre thuhej se Trump e përshëndeti atë me pizhame mëndafshi në suitën e tij të hotelit dhe detaje të tjera për raportin intim, shkruajnë mediat e huaja.
Lidhja e supozuar me aktoren e filmave për të rritur Stormy Daniels ndodhi në vitin 2006, vetëm një vit pasi Trump ishte martuar me Melania dhe muaj pas lindjes së djalit të tyre, Barron.
"Ajo është mirë, por unë mendoj se është shumë e vështirë për të. Unë kam një grua të mrekullueshme që duhet t'i dëgjojë këto gjëra gjatë gjithë kohës. Ata e bëjnë këtë për këtë arsye," tha Trump për ish-zonjën e parë në një intervistë për "Fox and Friends".
Donald Trump u shpall fajtor nga Gjykata Federale e Manhatan për të gjitha akuzat në ngarkim të tij. Juria në Nju Jork e shpalli atë fajtor në lidhje me 34 akuza për falsifikimin e dokumenteve, një skemë kriminale të dhënies së ryshfetit për të ndikuar në rezultatin e zgjedhjeve të 2016-ës. Sipas urdhrit të gjykatës, Trump u përpoq të blinte heshtjen e Daniels në mënyrë që ajo të mos fliste publikisht për marrëdhënien që kishte pasur me të më herët, para zgjedhjeve të vitit 2016. /ZËRI
