IZRAEL- Një familje prej pesë anëtarësh, (Aviv Kuz, bashkëshortja e tij Livnat, vajza Rotem, dhe djemtë Yonatan dhe Yiftach) janë gjetur të vrarë në Izrael pas bombardimeve të militantëve të Hamasit. Lajmi është bërë me dije nga mediat vendase, të cilat raportojnë se në momentin që janë gjetur nga ekipet e emergjencave, ata ishin të përqafuar me njëri-tjetrin.
“Ata ishin të gjithë fëmijë të mrekullueshëm me zemra të mëdha. Ata kishin gjithë jetën e tyre përpara”, tha halla e tyre Adi Levy Salama për një media hebraike.
Salama tregoi se familja ishte kthyer në Kfar Aza pas disa vitesh në Boston.
“Ditën që u vranë, ne duhej t'i vizitonim. Aviv organizoi një festival vjetor të qifteve përgjatë gardhit me Gazën për t'u treguar atyre se ne thjesht duam të jetojmë në paqe, "tha ajo.
Livnat, e cila duhej të festonte ditëlindjen e saj të 50-të këtë muaj, lindi gjatë Luftës së Yom Kipur. Ajo ishte një dizajnere grafike që nisi një iniciativë edukative të quajtur Ëorkshop që integroi punimet e lashta me dorë në programet shkollore në rajonin Shaar Hanegev në jug të Izraelit.
Aviv ishte zëvendësdrejtor i një firme konsulence dhe gjithashtu merrej me punë bujqësore.
Vajza Rotem ishte një ushtare që trajnonte rekrutët e rinj. Djemtë Yonatan dhe Yiftach ishin studentë në shkollën me konvikt Kfar Hayarok në Ramat Hasharon dhe basketbollistë në programin e të rinjve Hapoel. Ata ëndërronin të shkonin profesionistë./Zëri.ai
