PARIS - Nga skela në majë të Notre-Dame de Paris, presidenti francez Emmanuel Macron u zotua të premten (8/12) se rindërtimi i katedrales së shkatërruar nga zjarri do të përfundojë sipas planit dhe do të rihapet për vizitorët pas një viti. Kulla e kambanores prej druri u shemb gjatë zjarrit që ra në monumentin e Parisit, kryeqytetit francez, më 15 prill 2019.
“Afatet do të respektohen. Franca do rindërtojë monumentet e saj më me tepër vlerë”, tha Macron. "Ky është një moment i rëndësishëm dhe emocional", shtoi ai, ndërsa u foli punonjësve të restaurimit në skela.
Kulla e lartë 96 metra nuk ishte pjesë e dizajnit origjinal të katedrales. Ajo u shtua gjatë restaurimit të shekullit të 19-të nga arkitekti Eugene Viollet-le-Duc. Pas zjarrit shkatërrues të vitit 2019, kambanorja u rindërtua në një mënyrë identike, pavarësisht debatit fillestar, nëse duhet t'i jepet një pamje më moderne.
Macron njoftoi gjithashtu një konkurs për artistët për të dizajnuar gjashtë dritare të reja xhami me njolla, si dhe krijimin e një muzeu ‘Notre Dame’. Notre Dame është vendosur të rihapet për shërbimet fetare dhe për publikun më 8 dhjetor 2024.
Rreth 500 punëtorë punojnë në kantier çdo ditë, duke u përpjekur për të rindërtuar katedralen, e cila ka dominuar zonën Ile de la Cite në lumin Seine, që nga Mesjeta. Të mërkurën u vendos kryqi i këmbanores. Gjatë vitit të ardhshëm, mobiljet, statujat dhe veprat e artit të katedrales do të restaurohen./ZËRI/
