GREQI- Dy të burgosur shqiptarë, 42 dhe 45-vjeç, kanë qenë protagonistë të një sherri të dhunshëm që ka ndodhur së fundi në burgun Nigrita Serres në Greqi. Teksa kanë qenë në një zonë të përbashkët-korridor të qendrës së paraburgimit, ata u përfshinë në një incident me një 30-vjeçar dhe një 42-vjeçar rom.
Si pasojë, 30-vjeçari mbeti i plagosur në gjoks nga një objekt i improvizuar i mprehtë (thikë) i sjellë nga 45-vjeçari, ndërsa 42- vjeçari mbeti i dëmtuar nga dhunë fizike me grushte e shkelma ushtruar nga bashkëmoshtari i tij shqiptar, i cili gjithashtu ka tentuar ta plagosë në pjesë të ndryshme të trupit me një send të mprehtë (brisk). Të plagosurve iu është dhënë ndihma e parë nga një mjek i qendrës së paraburgimit.
45-vjeçari shqiptar vuan dënimin me 10 vjet e 2 muaj për shkelje të ligjit për substancat e varësisë ndërsa 42-vjeçari shqiptar vuan dënimin me 16 vjet për vrasje në tentativë. 30- vjeçari rom vuan dënimin me 20 vjet e 7 muaj për vjedhje të dalluara, ndërsa 42-vjeçari rom vuan dy dënime me burg prej 9 vjet e 5 muaj dhe 7 vjet e 15 ditë për vjedhje të rëndë e vjedhje të thjeshtë.
