GAZA- Dy foshnja binjake të porsalindura u vranë në një sulm ajror izraelit në Gaza, ndërsa babai i tyre ishte në një zyrë të qeverisë lokale për të regjistruar lindjen e tyre. Djali dhe vajza, Asser dhe Ayssel, ishin vetëm katër ditësh kur babai i tyre Mohammed Abu al-Qumsan shkoi për të marrë certifikatat e tyre të lindjes.
Gjatë kohës që ai ishte duke i regjistruar fëmijët, fqinjët e telefonuan për t’i thënë se shtëpia e tyre ishte bombarduar. Nga sulmi mbeten të vrara edhe gruaja dhe nëna e tij.
Në një video të publikuar nga Sky News, shihet babai, i cili është në një gjendje të rënduar emocionale pasi merr vesh lajmin.
“Unë nuk e di se çfarë ndodhi. Më thanë se ishte një predhë që goditi shtëpinë. Nuk pata kohë as të festoja për lindjen e tyre”, ka thënë babai.
Ministria e shëndetësisë e Gazës e drejtuar nga Hamasi tha se 115 foshnja kanë lindur dhe më pas janë vrarë gjatë luftës. /ZËRI
