GAZA - Ministria e Shëndetësisë e Gazës e drejtuar nga Hamasi thotë se një sulm ajror izraelit vrau të paktën 70 njerëz në kampin e refugjatëve Al-Maghazi në qendër të enklavës. Një zëdhënës tha se numri i të vdekurve ka të ngjarë të rritet, duke pasur parasysh numrin e madh të familjeve që jetojnë në zonë.
Ushtria izraelite i tha BBC-së se po shqyrtonte raportet për sulmin. Ngjarjet vijnë pasi mediat izraelite dhe arabe thonë se Egjipti, i cili kufizohet me Rripin e Gazës, ka paraqitur një propozim të ri për një armëpushim midis Izraelit dhe Hamasit. Dhjetëra njerëz të plagosur u dërguan me urgjencë nga Maghazi në spitalin e afërt Al-Aksa, teksa pamjet tregojnë fytyrat e disa fëmijëve të mbuluara me gjak.
Ministria e Shëndetësisë thotë se tre shtëpi u goditën vonë të dielën. Sipas zëdhënësit të ministrisë Ashraf al-Qudra, një bllok banimi me popullsi të dendur u shkatërrua. Një baba tha se kishte humbur vajzën dhe nipërit e tij, duke shtuar se familja e tij kishte ikur nga veriu për siguri në Gazën qendrore. “Ata jetonin në katin e tretë të njërës prej ndërtesave”, tha ai. "Muri u shemb mbi ta. Nipërit e mi, vajza ime, burri i saj - ikën të gjithë”, shtoi ai. "Ne jemi të gjithë të shënjestruar. Civilët janë në shënjestër. Nuk ka vend të sigurt. Ata na thanë të largoheshim nga qyteti i Gazës - tani erdhëm në Gazën qendrore për të vdekur?", deklaroi burri.
Shoqata e Gjysmëhënës së Kuqe Palestineze thotë se sulmet ajrore intensive izraelite kanë çuar në mbylljen e rrugëve kryesore midis Maghazit dhe dy kampeve të tjera të refugjatëve, Al-Bureij dhe Al-Nuseirat, duke penguar punën e ambulancave dhe ekipeve të shpëtimit. Në një deklaratë për BBC, ushtria izraelite tha se kishte raportime për një incident në kampin Maghazi. “Pavarësisht sfidave të paraqitura nga terroristët e Hamasit që veprojnë brenda zonave civile në Gaza, IDF [Forcat e Mbrojtjes izraelite] janë të përkushtuar ndaj ligjit ndërkombëtar, duke përfshirë marrjen e hapave të mundshëm për të minimizuar dëmin ndaj civilëve”, u tha nga autoritetet.
Sipas Ministrisë së Shëndetësisë, më shumë se 20,000 njerëz janë vrarë - kryesisht fëmijë dhe gra dhe 54,000 janë plagosur në Gaza që nga 7 tetori, kur Hamasi dhe grupet e tjera palestineze sulmuan Izraelin, duke vrarë 1200 njerëz dhe duke marrë rreth 240 pengje. Më herët të dielën, kryeministri izraelit Benjamin Netanyahu tha se lufta kishte sjellë pasoja të rënda për vendin e tij.
Ushtria izraelite tha se më shumë se një duzinë ushtarësh ishin vrarë në Gaza që nga e premtja, teksa nga 7 tetori janë vrarë më tepër se 156 ushtarë izraelitë. E shtuna ishte një nga ditët e saj më vdekjeprurëse, por Netanyahu tha se nuk kishte zgjidhje, veçse të vazhdonte të luftonte. Hamasi sulmoi Izraelin, ndërsa ushtria izraelite ka hyrë tashmë në Gaza./ZËRI/
