SHBA- Në prapaskenën e një prej zhvillimeve më tronditëse në Lindjen e Mesme, një telefonatë e fshehtë mes Benjamin Netanyahu dhe Donald Trump duket se ka qenë momenti vendimtar që çoi në eliminimin e Ali Khamenei. Sipas një investigimi të fundit të Reuters, bëhet fjalë për një telefonatë mes liderëve, vetëm 48 orë para fillimit të sulmit, 28 shkurt.
Detajet zbulojnë se të dy liderët kishin në dorë informacione të sakta të inteligjencës për një takim kritik në Teheran, duke e parë atë si një mundësi të rrallë për një “sulm me prerje koke” ndaj udhëheqjes iraniane. Kjo është një taktikë e përdorur shpesh nga Izraeli, por shumë më rrallë nga Shtetet e Bashkuara.
Por, ajo që filloi si një diskutim strategjik, u shndërrua në një vendim që ndryshoi rrjedhën e konfliktit dhe fatin e Iranit. Informacione të reja të inteligjencës u bënë të ditur se takimi ishte zhvendosur nga nata e së shtunës në mëngjesin e së shtunës.
Netanyahu kishte argumentuar se nuk mund të kishte kurrë një mundësi më të mirë për të vrarë Khamenein dhe për t’u hakmarrë për përpjekjet e mëparshme iraniane për të vrarë Trumpin, thanë njerëz me njohuri për telefonatën. Një nga këto përpjekje të Iranit ishte edhe verën e vitit 2024, gjatë një fjalimi fushate.
Në momentin e telefonatës, Trump kishte miratuar tashmë një operacion ushtarak amerikan kundër Iranit, por ende nuk kishte vendosur se kur ose në çfarë kushtesh Shtetet e Bashkuara do të hynin në luftë. Shtetet e Bashkuara gjithashtu kishin rritur shumë praninë e tyre në Lindjen e Mesme dhe më të gjerë, kështu që një sulm (madje edhe një i njëanshëm) dukej pothuajse një përfundim i paracaktuar.
Reuters thekson se mbetet e paqartë nëse argumentet e Benjamin Netanyahu ndikuan drejtpërdrejt në vendimin e Donald Trump. Megjithatë, telefonata mes dy liderëve shihet si ndërhyrja e fundit e kryeministrit izraelit përpara se Shtëpia e Bardhë të merrte një vendim kritik.
Javën e kaluar Netanyahu e kishte hedhur poshtë si lajm të rremë pretendimin se “Izraeli e futi SHBA-në në luftë me Iranin”. Ai vazhdoi të bënte një pyetje retorike: “A beson dikush se ai mund t’i thotë Trumpit se çfarë të bëjë?”.
Ministri amerikan i Mbrojtjes Pete Hegseth konfirmoi gjithashtu këtë në mënyrën e tij, duke deklaruar në fillim të marsit se “Irani u përpoq të vriste Presidentin Trump dhe ishte që kishte fjalën e fundit”.
Sipas Reuters, Trump ka qenë duke shqyrtuar një sulm që në pranverën e vitit 2025. Pas sulmit të parë qershorin e kaluar, Trump kishte folur për eliminimin e aftësisë raketore, por pak më vonë, filluan të lindnin mendime për një sulm të dytë. Këtë herë, megjithatë, izraelitët donin ta vrisnin Khamenein dhe filluan ta planifikonin vetë.
Gjatë një vizite në dhjetor në Mar-a-Lago, Netanyahu i tha Trump se nuk ishte plotësisht i kënaqur me rezultatin e operacionit të përbashkët në qershor. Trump tregoi se ishte i hapur për një seri të re bombardimesh, por gjithashtu donte të provonte një raund tjetër bisedimesh diplomatike.
Në fund të fundit, dy ngjarje e shtynë Trumpin të godiste përsëri Iranin, sipas disa zyrtarëve dhe diplomatëve amerikanë dhe izraelitë.
Operacioni i SHBA-së më 3 janar për të kapur presidentin venezuelas Nicolas Maduro në Karakas, i cili përfundoi pa viktima amerikane dhe rrëzoi nga pushteti një armik të hershëm të SHBA-së, dhe po atë muaj, shpërthyen protesta masive antiqeveritare në Iran. Kjo shkaktoi një përgjigje të dhunshme nga Trupat e Gardës Revolucionare Islamike, duke rezultuar në vdekjen e mijëra njerëzve./Reuters
