SHBA- Aktorja Maggie Smith ka ndërruar jetë në moshën 89-vjeçare. Lajmin e ka bërë me dije familja e saj.
"Me pikëllim të madh duhet të njoftojmë vdekjen e Dame Maggie Smith. Ajo ndërroi jetë paqësisht në spital herët në mëngjes, e premte 27 shtator. Një person shumë privat, ajo ishte me miqtë dhe familjen deri në fund. Ajo largohet nga dy djemtë dhe pesë nipërit e dashur, të cilët janë shkatërruar nga humbja e një nëne dhe gjysheje të jashtëzakonshme,”-thanë djemtë e saj Toby Stephens dhe Chris Larkin në një deklaratë.
Maggie Smith, e lindur Margaret Natalie Smith më 28 dhjetor 1934 në Ilford, Essex, Angli, është një nga aktoret më të famshme britanike me një karrierë të lakmueshme që ka zgjatur më shumë se gjashtë dekada. Ajo u rrit në Oksford, ku mbaroi shkollën fillore dhe të mesme dhe shumë shpejt filloi karrierën e saj të aktrimit.
Fillimi i një karriere
Ajo filloi karrierën e saj teatrore në Oxford Playhouse në fillim të viteve 1950, dhe roli i saj i parë madhor erdhi me një produksion të New Faces të '56 në Londër. Ajo bëri debutimin e saj në film në vitin 1958 në filmin 'Nowhere to Go', i cili hapi derën për karrierën e saj të suksesshme në film. Një nga rolet e saj më të njohura ishte në "The Prime of Miss Jean Brodie" (1969), për të cilin fitoi çmimin e saj të parë Oscar për aktoren më të mirë. Në vitin 1978, ajo fitoi Oscarin e saj të dytë, këtë herë për aktoren më të mirë dytësore në filmin "California Suite".
Edhe pse ka fituar dy çmime Oscar, Maggie Smith është nominuar edhe për disa çmime të tjera prestigjioze, duke përfshirë çmimet BAFTA dhe Emmy, dhe me kalimin e viteve është cilësuar si një nga aktoret më të respektuara në historinë e filmit dhe teatrit britanik.
Por për brezine ri, Maggie Smith u bë e njohur për rolin e saj si Profesoresha "Minerva McGonagall" në Harry Potter. Ky rol i solli asaj popullaritet global dhe personazhi i saj, një profesoreshë e rreptë por e drejtë, u adhurua nga audienca e të gjitha moshave.
Jeta private
Maggie Smith ishte martuar dy herë. Martesa e saj e parë ishte me aktorin Robert Stephens, me të cilin pati dy fëmijë, Chris Larkin dhe Toby Stephens, të cilët gjithashtu u bënë aktorë të suksesshëm. Pas divorcit në vitin 1975, ajo u martua me skenaristin Beverley Cross, i cili vdiq në vitin 1998. Smith i mbijetoi kancerit të gjirit, por pavarësisht problemeve shëndetësore ajo vazhdoi të punonte./ZËRI
