KIEV - Kryeqyteti i Ukrainës, Kievi, është goditur nga raketat ruse, për herë të parë pas 52 ditësh luftë.
Kryetari i bashkisë së Kievit, Vitali Klitschko shkroi në Telegram se shpërthime të forta u dëgjuan në orët e para të mëngjesit të së shtunës, më 11 nëntor.
Informacioni paraprak sugjeron se sistemet e mbrojtjes ajrore ishin në gjendje të kapnin raketat.
Banorët janë urdhëruar të strehohen në strehimoret e sulmeve ajrore. Nuk ka pasur raporte fillestare për viktima pas sulmit ajror, raporton Reuters.
Në Odesa, qyteti bregdetar rreth 275 milje (442 km) larg nga Kievi, pati raportime për të paktën dy sulme me raketa.
Sipas kreut të administratës së rajonit, Oleg Kiper, tre persona u plagosën dhe një grua 96-vjeçare u shtrua në spital. Mësohet se gjendja e të moshuarës është e qëndrueshme.
Të mërkurën, zyrtarët ukrainas thanë se të paktën një person ishte vrarë pasi një raketë ruse goditi një anije civile që hynte në Odesa.
Një pilot 43-vjeçar i portit vdiq, ndërsa tre anëtarë të ekuipazhit filipinas dhe një punonjës porti u plagosën.
Në një takim të G7 në Japoni këtë javë, ministrat e jashtëm nga Britania, Franca, Gjermania, Italia, Japonia, Kanadaja dhe SHBA - si dhe përfaqësues të BE-së, thanë se e pranuan se Rusia është e përgatitur për një luftë të gjatë në Ukrainë.
Ata gjithashtu thanë se lufta Izrael-Gaza nuk duhet të shkëpusë vëmendjen nga mbështetja për Ukrainën dhe përsëritën se do të vazhdojnë të mbështesin Kievin ekonomikisht dhe ushtarakisht.
Kievi është gjithnjë e më i shqetësuar për "lodhjen nga Ukraina" midis vendeve perëndimore.
Duke folur ekskluzivisht për redaktoren e BBC-së për Evropën, Katya Adler, presidenti francez Emmanuel Macron tha se ishte detyrë e vendit të tij të ndihmonte Ukrainën. Megjithatë, Macron sugjeroi se mund të vijë një kohë për "negociata të drejta " me Moskën. Rusia ka pushtuar Ukrainën që në mars 2022./Zëri.ai/
