VATIKAN- Papa Françesku ka dalë për herë të parë në publik, pas daljes nga spitali. Ai u shfaq sot në sheshin e Shën Pjetrit në Vatikan me një karrocë me rrota, ku dhe u përshëndet me njerëzit, të cilët e pritën me brohoritma.
“Në ditën e jubileut të të sëmurëve dhe botës së shëndetësisë, i lutem Zotit që kjo prekje e dashurisë së tij të arrijë tek ata që vuajnë dhe të inkurajojë ata që kujdesen për ta. Lutem edhe për mjekët, infermierët dhe punonjësit e shëndetësisë, të cilët jo gjithmonë ndihmohen të punojnë në kushte adekuate dhe ndonjëherë janë edhe viktima të agresionit”, ishte mesazhi që ndau Papa në daljen e tij të parë publike.
Pas daljes nga spitali mjekët konfirmuan se gjendja klinike e Papa Françeskut është e qëndrueshme dhe kanë rekomanduar reduktimin e pjesshëm të terapisë me antibiotikë oralë dhe pushim të plotë. Me daljen nga spitali, agjenda e Papës ka ndryshuar ndjeshëm. Pjesëmarrja e tij në ritet e Pashkëve do të varet nga përparimi i shëndetit të tij. Ndërsa, për udhëtimin e planifikuar në Turqi në fund të majit, mjekët shprehen se ende nuk ka siguri nëse mund të realizohet.
Papa Françesku u shtrua në spitalin Gemelli më 14 shkurt me një infeksion të rëndë respirator, i cili kërkonte trajtim të përshtatur vazhdimisht. Papa është veçanërisht i ndjeshëm ndaj pneumonisë, një infeksion i mushkërive që mund të shkaktohet nga bakteret, viruset ose kërpudhat, pasi ka vuajtur nga pleuriti - një inflamacion i mushkërive - si i ri dhe i është hequr një mushkëri e pjesshme./ZËRI
