PALESTINË- “Nga lumi në det, Palestina do të jetë e lirë”, është thirrja e aktivistëve pro-palestinezë nga Londra dhe Roma në Uashington, mes një reagimi të fortë izraelit ndaj sulmit më të përgjakshëm në Gaza. Fraza i ka rrënjët në kartën e Hamasit. Megjithatë, AP shkruan se historia pas sloganit është shumë më e gjerë dhe fillon dekada më parë. "Nga lumi në det" bën jehonë në mitingjet pro-palestineze në kampuset universitare dhe në qytete të ndryshme, si një slogan që disa e kanë miratuar si thirrje për krijimin e një shteti të vetëm në territorin midis lumit Jordan dhe Detit Mesdhe.
Në vitin 2012, u bë e qartë se Hamasi kishte marrë përsipër sloganin në përpjekjen e tij për të pretenduar një tokë që përfshin Izraelin, Rripin e Gazës dhe Bregun Perëndimor. Ndërkohë shumë aktivistë palestinezë thonë se kjo është një thirrje për paqe dhe barazi pas 75 viteve të shtetësisë izraelite dhe dekadave të sundimit ushtarak izraelit mbi miliona palestinezë. Hebrenjtë dëgjojnë në slogan një thirrje të qartë për shkatërrimin e Izraelit.
"Mos kini dyshim se Hamasi e mirëpret atë brohoritje "nga lumi në det", sepse Palestina nga lumi në det nuk i lë Izraelit asnjë centimetër territor", thuhet në letrën e hapur të nënshkruar nga 30 agjenci mediatike çifute përreth botës.
Lumi Jordan rrjedh nëpër bregun lindor të Izraelit dhe Bregun Perëndimor të pushtuar rreth 320 kilometra i gjatë, deti është Mesdheu në perëndim dhe fraza për zonën "nga lumi në det" është bërë një thirrje lufte që ka një fuqi të re për të tronditur hebrenjtë dhe për t'i motivuar protestuesit pro-palestinezë pas sulmit të Hamasit në jug të Izraelit më 7 tetor dhe bombardimeve izraelite të Rripit të Gazës.
Luftëtarët e Hamasit kanë vrarë më shumë se 1400 njerëz në Izrael dhe kanë marrë të paktën 240 pengje me vete në Gaza, në ditën më të keqe të dhunës kundër hebrenjve që nga Holokausti. Izraeli u përgjigj me bombardime të rënda në Gaza dhe një ofensivë tokësore, e cila vrau më shumë se 11,000 palestinezë, sipas Ministrisë së Shëndetësisë të Gazës. Numri i të vdekurve pritet të rritet dhe rezultati është raundi më vdekjeprurës i konfliktit izraelito-palestinez në dekada./Zëri.ai
