KOSOVË- Kryeministri i Kosovës nuk ka gjetur një numër që do të përcaktonte marrëdhënien e tij me homologun shqiptar, Edi Rama. I pyetur në një intervistë në Qendrën Kulturore Shqiptaro-Amerikane Struga në SHBA, se si janë raportet e tij me kryeministrin e Shqipërisë, Edi Rama, nga 1 deri në 10, ai tha se në kuptimin e vizionit të përbashkët, nuk kanë dallime. Sipas Kurtit, aty ku dyshja pajtohen, nuk bëhet kurrë lajm, por mediat fokusohen vetëm tek diferencimet mes tyre.
“Nuk mund ta bëj një kuantifikim të tillë, por mund të them që kemi marrëdhënie të shkëlqyeshme midis dy qeverive. E kemi bërë tregun e përbashkët energjetik, kemi hapur 26 vendkalime të reja kufitare për 200 mijë banorët e zonës ndërmjet Kosovës dhe Shqipërisë, kemi mbajtur dy mbledhje të përbashkëta të qeverive me 58 matrrëveshje të reja dhe gjithashtu po bëjmë bashkëfinancime në kulturë, në ekonomi e kështu me radhë, me ç’rast Kosova ka edhe dy zyra të veçanta doganore në Porto Romano dhe në Durrës. Do ta bëjmë edhe hekurudhën Prishtinë-Durrës. Në kuptimin e projekteve zhvillimore të planeve të punës, të vizionit të përbashkët, nuk kemi dallime, por duhet ta keni parasysh që aty ku pajtohemi, s’bëhet kurrë lajm. Aty nga njëherë kur kemi dallim, ajo bëhet lajm dhe përpiqet që të eksploatohet në mënyrë të pamëshirshme. Unë besoj që dallimi i cili më së shumti është shpërdorur është ai rreth Ballkanit të Hapur, duke u përpjekur që atë dallim që e kemi për çështjen e Ballkanit të Hapur ta vendosin në çdo çështje e në çdo temë në mënyrë të padrejtë,”- tha Kurti.
