RUSI- Agjencia më e lartë hetimore e Rusisë po heton incidentin e sallës së koncerteve në Moskë si një sulm terrorist. Askush nuk e ka marrë përgjegjësinë për të shtënat dhe shpërthimet, dhe SHBA-ja ka thënë se nuk ka “asnjë tregues” se Ukraina ishte e përfshirë.
Zëdhënësi i Kremlinit Dmitry Peskov, në një deklaratë të transmetuar nga agjencia shtetërore e lajmeve ruse Tass, tha: “Në minutat e para të incidentit në bashkinë e Crocus, presidenti u njoftua për fillimin e të shtënave. Presidenti furnizohet vazhdimisht nga të gjitha shërbimet përkatëse me informacione për atë që po ndodh dhe masat që po merren. Presidenti ka dhënë tashmë të gjitha udhëzimet e nevojshme”
Zëdhënësja e Ministrisë së Jashtme të Rusisë ka thënë se nëse ‘SHBA-të e dinin me siguri se Ukraina nuk ishte e përfshirë, atëherë duhet të ndajnë çdo informacion që kishte’.
“Në çfarë baze zyrtarët në Uashington nxjerrin ndonjë përfundim në mes të një tragjedie për pafajësinë e dikujt?”- tha Maria Zakharova.
Po ashtu zëdhënësi i Këshillit të Sigurisë Kombëtare të SHBA-së, John Kirby, ka reaguar për sulmin në sallën e koncerteve në Moskë, duke i përshkruar imazhet si "të tmerrshme".
Ndërkohë drejtoria e Inteligjencës Ukrainase thotë se sulmi terrorist në Moskë është "një provokim i qëllimshëm nga Vladimir Putin".
"Ky është një provokim i qëllimshëm nga shërbimet speciale të Putinit, siç kishte paralajmëruar komuniteti ndërkombëtar", tha zëdhënësi i inteligjencës ushtarake ukrainase Andriy Yusov.
Të shtëna me armë zjarri janë raportuar në Moskë brenda sallës së një koncerti. Nuk ka një numër të saktë të viktimave, por deri tani raportohet për rreth 40 të vrarë dhe mbi 100 të plagosur. Ndërkohë raportohet se ka pasur edhe shpërthime, duke bërë që godina të përfshihet nga flakët./ZËRI
