BEIRUT – Një atmosferë festive mbizotëroi në Bejrut, ndërsa mijëra njerëz u grumbulluan në një shesh në periferinë jugore të kryeqytetit libanez të premten për të parë një fjalim televiziv të Hassan Nasrallah, udhëheqësi i grupit militant libanez Hezbollah.
Nasrallah u tall me Izraelin në komentet e tij, të cilat u transmetuan përmes një videoje. Ishte fjalimi i tij i parë drejtuar mbështetësve, që nga fillimi i luftës Izrael-Hamas, i shkaktuar nga aksioni vdekjeprurës i militantëve palestinezë më 7 tetor në Izraelin jugor.
Fjalimi erdhi një ditë pas përshkallëzimit më të madh në përleshjet midis Hezbollahut dhe forcave izraelite në kufirin Izrael-Liban që nga fillimi i luftës – dhe në të njëjtën ditë me një vizitë në Izrael të diplomatit më të lartë amerikan.
Sekretari amerikan i Shtetit Antony Blinken u takua me kryeministrin izraelit Benjamin Netanyahu për të kërkuar mbrojtje për civilët në luftimet me Hamasin, ndërsa trupat izraelite thanë se do nisin rrethimin e qytetit të Gazës.
Në fjalën e tij të gjatë, Nasrallah vlerësoi sulmin e Hamasit katër javë më parë, në të cilin militantët sulmuan fshatrat bujqësore, qytetet dhe postet ushtarake në Izraelin jugor. Më shumë se 1400 njerëz u vranë në Izrael nga ky sulm.
"Ky operacion i madh, në shkallë të gjerë ishte thjesht rezultat i planifikimit dhe zbatimit palestinez," tha Nasrallah. "Fshehtësia e madhe e bëri këtë operacion jashtëzakonisht të suksesshëm", shtoi ai.
Hassan Nasrallah tha gjithashtu se 7 tetori tregoi se Izraeli ishte “më i dobët se rrjeta e merimangës" dhe sipas tij, Izraeli nuk ka bërë ndonjë arritje edhe një muaj pas luftës.
Nasrallah kritikoi gjithashtu mbështetjen e fortë të SHBA-së ndaj Izraelit në bombardimet e Gazës, ku janë vrarë më shumë se 9,000 njerëz, kryesisht civilë. Ndërsa zyrtarët amerikanë në ditët e fundit kanë bërë presion publikisht për mbrojtjen e civilëve në Gaza, ata ende nuk kanë bërë thirrje për një armëpushim.
Udhëheqësi i Hezbollahut tha se presidenti amerikan Joe Biden gënjeu kur tha se Hamas ka prerë kokat e fëmijëve, pasi sipas tij, kjo nuk është e vërtetë. Nasrallah theksoi se Biden ka qëndruar i heshtur për mijëra fëmijë në Gaza, të cilëve “iu pre koka dhe gjymtyrët e tyre u copëtuan nga bombardimet izraelite’.
Fjalimi i Nasrallah ishte pritur gjerësisht në të gjithë rajonin si një shenjë nëse konflikti Izrael-Hamas do të kalonte në një luftë rajonale.
Udhëheqësit e Hamasit kanë bërë presion - ndonjëherë publikisht - që Hezbollahu të përfshihet në luftë. Nasrallah u takua javën e kaluar në Bejrut me zyrtarin e lartë të Hamasit, Saleh al-Arouri dhe me Ziad Nakhaleh të grupit aleat të Xhihadit Islamik.
Megjithatë, zyrtarët e Hezbollahut kanë shmangur publikisht vendosjen e një vije të kuqe specifike, duke thënë në mënyrë të paqartë se do t'i bashkoheshin luftës nëse shohin se Hamasi është në prag të humbjes.
Që nga fillimi i luftës, Hezbollahu, një aleat i Hamasit, kishte ndërmarrë hapa të llogaritur për të mbajtur ushtrinë izraelite në kufirin e tij me Libanin, por jo në atë masë sa të ndizte një luftë gjithëpërfshirëse.
Ushtria izraelite tha se shtatë nga ushtarët e tyre dhe një civil ishin vrarë në kufirin verior që nga e premtja. Më shumë se 50 luftëtarë të Hezbollahut dhe 10 militantë të grupeve aleate, si dhe 10 civilë, duke përfshirë një gazetar të Reuters, janë vrarë në anën libaneze të kufirit.
Izraeli e konsideron grupin militant shiit libanez të mbështetur nga Irani kërcënimin e tij më serioz aktual, duke vlerësuar se Hezbollahu ka rreth 150,000 raketa që synojnë Izraelin, si dhe drone e raketa tokë-ajër dhe tokë-det.
Mirëpo, një konflikt i plotë do të ishte gjithashtu i kushtueshëm për Hezbollahun, i cili u fut në një luftë 34-ditore me Izraelin në vitin 2006 që përfundoi me pasoja nga të dyja palët.
Një luftë e re gjithëpërfshirëse do të zhvendoste gjithashtu qindra mijëra mbështetës të Hezbollahut dhe do të shkaktonte dëme të mëdha, në një kohë kur Libani përballet me vështirësi të mëdha ekonomike./AP - Zëri.ai/
