BRITANI-Ndërsa Kate Middleton po largohej për në Pallatin Kensington, nga Klinika e Londrës në Mayfair, një grua që ka qenë ‘’hija’’ e saj për shumë vite është parë duke u larguar. Asistentja dhe stilistja personale e Kate, 36-vjeçarja Natasha Archer, ka qëndruar larg syrit të publikut. Marrëdhënia e saj me familjen mbretërore britanike zgjat pothuajse 20 vite, ku rreth gjysma e tyre janë në krah të Kate. Martesa e saj me fotografin mbretëror Chris Jackson, me të cilin ka dy fëmijë, e lidh atë me familjen mbretërore.
Archer, e cila është diplomuar në shkollën private Uppingham në Leicester, filloi të punojë për familjen mbretërore në vitin 2007, pasi u diplomua në King's College me një diplomë në spanjisht. Fillimisht ajo punoi në Pallatin Kensington për dy princat, William dhe Harry. Pas martesës së William me Kate, Archer filloi të punonte edhe për princeshën e re.
Në vitin 2014 ajo u promovua në stiliste personale të Kate. Grazia ka shkruar në atë kohë se ishte kërkesa e Elizabeth për ta bërë veshjet e Kate "më mbretërore". Ajo ka stiluar veshjen që ka veshur Kate gjatë turneut të saj me William në Australi.
Marrëdhënia e dy zonjave u bë më e ngushtë gjatë rrugës. Në të njëjtën kohë, asaj iu kërkua të përmirësonte stilin e William-it, duke "rifreskuar" imazhin e tij. Pas suksesit të turneut australian, shkruan Daily Mail, Archer filloi të inkurajonte Kate që të eksperimentonte më shumë me veshjet e saj. Një ekzemplar u pa në vitin 2016 gjatë vizitës në Kanada.
Dalëngadalë, por me siguri, Kate u bë një ikonë e modës, falë "vulës" së Archer. Në dhjetor 2018, u konfirmua se Archer ishte ftuar të bashkohej me Urdhrin Mbretëror Victorian në njohje të shërbimeve të saj për Familjen Mbretërore.
Natasha Archer ishte një nga të paktët njerëz jashtë familjes mbretërore që vizitoi Princeshën e Uellsit në spital dhe një nga të paktët që vizitoi Kate kur ajo lindi fëmijët e saj./ZËRI
