PAKISTAN- Ish-kryeministri i Pakistanit, Imran Khan, është dënuar me 14 vjet burg për një rast korrupsioni, vetëm një ditë pasi u dënua me 10 vjet për nxjerrje të sekreteve shtetërore. Gruaja e Khan, Bushra Bibi, gjithashtu u dënua me 14 vjet në këtë çështje. Gjithashtu gjyqtari i ndaloi të dyve të ushtronin poste politike për 10 vjet.
Dënimi, i dhënë në një seancë dëgjimore të mbajtur në burgun e Rawalpindi ku po mbahet Khan, përkeqëson më tej gjendjen e ish-kryeministrit, i cili ndodhet në burg që nga gushti dhe përballet me mbi njëqind akuza të ndryshme.
Gjykatësi kishte refuzuar kërkesën e avokatëve të Khan për të marrë në pyetje dëshmitarët në gjyq dhe avokatët e Khan nuk ishin të pranishëm të mërkurën kur u dha dënimi. Bibi iu dorëzua autoriteteve në burgun Adiala në Rawalpindi të mërkurën në mëngjes.
Vendimi i Toshakhana erdhi vetëm një ditë pasi një gjykatë speciale, e shpalli Khan fajtor për zbulimin e sekreteve shtetërore në lidhje me një kabllogram të ndjeshëm diplomatik që dyshohet se ishte zhdukur. Khan e kishte përshkruar gjyqin si një mashtrim dhe avokatët thanë se ai do të apelonte kundër vendimit.
Koha e të dy dënimeve të njëpasnjëshme u konsiderua si e rëndësishme nga vëzhguesit, duke ardhur vetëm një javë përpara se Pakistani të shkojë në zgjedhjet e përgjithshme të vonuara prej kohësh. Megjithëse Khan tashmë i është ndaluar të kandidojë, ai mbetet jashtëzakonisht i popullarizuar në mesin e votuesve.
Ky është dënimi i dytë i Khan në rastin Toshakaha, i cili lidhet me akuzat se ish-kryeministri bleu disa dhurata të bëra nga pushtetarët dhe zyrtarët e qeverisë me çmime të ulëta dhe më pas i shiti ato për një fitim të padeklaruar. Khan ka mohuar të gjitha akuzat./ZËRI
