SHBA- Dhoma e Përfaqësuesve miratoi me shumicë dërrmuese një projekt-ligj që do të ndalojë TikTok në Shtetet e Bashkuara nëse pronari kinez nuk e shet krijimin e tij tek dikush tjetër. Ndalimi i rrjetit social kaloi bashkë me votimin për paketën e ndihmës prej 95 miliardë dollarësh për Ukrainën, Izraelin dhe Tajvanin dhe ka marrë relativisht pak vëmendje.
Projektligji i TikTok u miratua me 360 vota kundër 58.
Brenda projektligjit të sanksioneve është një dispozitë që detyron kompaninë mëmë kineze të TikTok, ByteDance, t'i shesë aksionet e saj tek një entitet me bazë në SHBA brenda një viti ose ndryshe rrjeti social do të ndalohet të përdoret në SHBA. Rreth 150 milionë amerikanë janë në TikTok dhe ka frikë në rritje mes ligjvënësve për ndikimin që pronarët kinezë kanë në këtë kompani. Ligjvënësit kanë ngritur shqetësime për sigurinë kombëtare dhe privatësinë e të dhënave me TikTok. Mbështetësit e aplikacionit të rrjeteve sociale kanë vënë në pikëpyetje kushtetutshmërinë e kufizimit të të drejtave të fjalës së lirë së amerikanëve.
Wall Street ka nisur me parashikimet se kush mund ta blejë TikTok në rast të një shitjeje të detyruar të aksioneve nga pronari kinez ByteDance. Microsoft, Meta, Apple dhe Oracle janë shpallur si blerës potencial. Rumble, një konkurrent i YouTube i orientuar drejt fjalës së lirë, është diskutuar gjithashtu.
Por lajmi nuk është pritur mirë nga pala tjetër. Para se të miratohej projektligji, TikTok kishte lëshuar një deklaratë në të cilën fliste për një shkelje të të drejtave të fjalës së lirë, ndërsa CEO i kompanisë u kishte bërë thirrje përdoruesve amerikanë që menjëherë të bëjnë fushatë kundër detyrimit për ta shitur rrjetin social.
“Është për të ardhur keq që Dhoma e Përfaqësuesve po përdor ndihmat humanitare për të fshehur edhe një herë një projektligj ndalimi që i shkel të drejtat e fjalës së lirë të 170 milionë amerikanëve, po shkatërron 7 milionë biznese dhe po mbyll një kontribut prej 24 miliardë dollarësh, para që i shkojnë ekonomisë amerikane çdo vit”.
Por mesa duket ankesa e tyre ka përfunduar në vesh të shurdhët. Tani duhet të studiojnë tregun për blerës potencial./ZËRI
