PALESTINË-Forcat izraelite goditën të premten objektiva në gjithë territorin e Rripit të Gazës, përfshirë sulme ajrore në qytetin e Rafahut, ku tani është përqendruar ofensiva ushtarake e Izraelit. Mediat e huaja raportojnë se të paktën 12 persona u vranë në dy sulme ajrore të premten, mes së cilëve dy fëmijë dhe katër gra.
Palestinezët në qytetin kufitar të Rafahut kanë raportuar për luftime të ashpra në ditët e fundit ndërsa ushtria izraelite zgjeroi ofensivën e saj në jug, duke marrë nën kontroll të gjithë gjatësinë e kufirit të Gazës me Egjiptin. Luftimet në Rafah kanë nxitur më shumë se 1 milion palestinezë të largohen, shumica e të cilëve tashmë ishin zhvendosur më herët gjatë luftës. Ata tani kërkojnë strehim në kampet e improvizuara me tenda dhe zona të tjera të shkatërruara nga lufta, ku u mungon strehimi, ushqimi, uji dhe gjërat e tjera thelbësore për mbijetesë.
Lufta Izrael-Hamas ka vrarë më shumë se 36,000 palestinezë, sipas Ministrisë së Shëndetësisë./ZËRI
