GAZA- Hamas është i gatshëm që të lirojë 70 nga pengjet që mban prej datës 7 Tetor, në këmbim të një armëpushimi 5-ditor nga ana e Izraelit. Grupi i cilësuar nga shumë shtete si terrorist, ia ka bërë të ditur këtë ndërmjetësuesve të Katarit, që po tentojnë të negociojnë mes palëve.
Kërkesa për armëpushim bëhet në një kohë kur dy spitalet më të mëdhenj në Gaza janë jashtë funksionit, ndërkohë që numri i viktimave palestineze ka shkuar në mbi 11 mijë.
Kushtet në spitalin Al-Shifa, më i madhi në Gaza, janë "katastrofike" pasi njësitë thelbësore janë shembur, tha drejtori i institucionit për CNN. Foshnjat e lindura para kohe po mbështillen me fletë metalike për t'i mbajtur gjallë pasi janë hequr nga inkubatorët ku nuk ka më oksigjen.
Situata në spitalin Al-Shifa është pjesë e një krize të thelluar të kujdesit shëndetësor në Gaza, me Spitalin Al-Quds, i dyti më i madhi, gjithashtu jashtë shërbimit, sipas zyrtarëve. Enklava është gjithashtu në prag të ndërprerjes së komunikimit, tha një zyrtar palestinez.
Presidenti amerikan Joe Biden tha se spitalet duhet të mbrohen. Izraeli ka pretenduar se Hamasi ka qendra komanduese nën objektet mjekësore.
Sekretari i Shtetit i SHBA Antony Blinken pranoi mosmarrëveshjet brenda Departamentit të Shtetit mbi qasjen ndaj luftës. Email-i i tij për personelin vjen mes mosmarrëveshjeve në rritje në të gjithë administratën më të gjerë të Biden.
Një demonstratë pro-izraelite e planifikuar për të martën në kryeqytetin amerikan pritet të tërheqë dhjetëra mijëra pjesëmarrës. Departamenti Amerikan i Sigurisë Kombëtare e ka atë një ngjarje sigurie "Niveli 1", më e larta nga pesë kategoritë në sistemin "Vlerësimi i Ngjarjeve Speciale" të departamentit.
