PARIS - Yjet e Davidit janë gjetur të pikturuara në ndërtesa në zonën e Parisit. Liderët politikë thanë se këto akte, të kujtojnë vitet 1930.
Rreth 60 Yje të Davidit u pikturuan në mure në lagjen e 14-të të Parisit. Franca po përballet me një rritje të madhe të incidenteve antisemite.
Më shumë se 850 akte të tilla janë raportuar në Francë, që nga sulmet e Hamasit në Izrael më 7 tetor. Shifrat janë bërë publike nga ministri i Brendshëm, Gérald Darmanin.
Autoritetet e Parisit njoftuan se do të nisin një hetim për grafitet, që konsiderohen raciste. Një prej pronarëve të banesave tha se nuk mund ta kuptojë dot se përse janë bërë këto grafite dhe u shpreh i shqetësuar pse ka kaq shumë urrejtje.
Në një deklaratë, kryebashkiaku i qarkut 14 shkroi se grafitet të kujtojnë ngjarjet e viteve 1930, që çuan në shfarosjen e miliona hebrenjve.
Emmanuel Grégoire, zëvendësi i kryebashkiakes së Parisit, Anne Hidalgo, tha se yjet e Davidit do të hiqen dhe për ngjarjen do të nisë një hetim.
"Antisemitizmi vazhdon të vrasë. Ne nuk do të tolerojmë asnjëherë racizmin", tha Gregoire. Një grua u plagos rëndë, pasi u qëllua nga policia mëngjesin e kësaj të marte. Oficerët pretenduan se ajo po sillej në mënyrë kërcënuese dhe refuzoi të zbatonte udhëzimet policore.
Grafite të ngjashme u gjetën gjithashtu në periferi të Parisit, duke përfshirë lagjet Vanves, Fontenay-aux-Roses, Aubervilliers dhe Saint-Ouen. Yjet e Davidit shoqëroheshin me mbishkrime pro Palestinës.
Kryetari i bashkisë së Saint-Ouen, Karim Bouamrane, bëri thirrje që autorët e grafiteve antisemitike dhe raciste në qytet të ndiqen penalisht. Kryeministrja Elisabeth Borne dënoi grafitet, duke thënë se ishin akte të turpshme.
Një sondazh i BFMTV zbuloi se rritja e incidenteve antisemite shqetëson 83% të francezëve. Udhëheqësit politikë, përfshirë presidentin Emmanuel Macron, kanë paralajmëruar rrezikun e "importimit" në Francë, të tensioneve të luftës Izrael-Hamas.
“Rreth 400 njerëz janë arrestuar për akte antisemite këtë muaj”, tha në një deklaratë ministri i Drejtësisë Eric Dupond-Moretti.
Franca dhe vende perëndimore janë përballur me shumë incidente, që merrnin shkas nga lufta Izrael-Hamas./BBC-Zëri.ai/
