LONDËR- PARIS- Një nga tragjeditë më të mëdha të Kanalit Anglez u shënua dje. Një gomone u përpmbys pranë portit të Francës, ku humbën jetën 6 fëmijë, një grua shtatzëne dhe 5 të tjerë. Në mjetin e vogël lundrues ndodheshin 70 emigrantë.
Autoritetet franceze thanë se 10 nga emigrantët që humbën jetën ishin femra dhe besohet se janë nga Eritrea. Ministri i Brendshëm francez, Gérald Darmanin, tha se më shumë se 50 njerëz ishin shpëtuar, përfshirë dy të tjerë që janë në gjendje kritike nga “gomonia vdekjeprurëse” që u fundos në Cap Gris-Nez të martën në mëngjes.
Sipas zyrtarëve francezë, vetëm tetë nga 70 emigrantët kishin veshur jelek shpëtimi.
Pas vdekjeve të fundit, kryeministri po përballet me thirrjet për të hapur rrugë ligjore në mënyrë që refugjatët e mundshëm të mos detyrohen të bëjnë udhëtime të tilla të dëshpëruara përpara se të kërkojnë azil në Mbretërinë e Bashkuar. Darmanin bëri thirrje për negocimin e një traktati të ri migracioni midis Mbretërisë së Bashkuar dhe BE-së për të lehtësuar rrugën për azilkërkuesit.
Javën e kaluar më shumë se 2,000 njerëz që kërkojnë azil kanë mbërritur në Mbretërinë e Bashkuar me varka të vogla. Më shumë se 600 mbërritën më 28 gusht me 10 gomone, ndërsa 351 mbërritën më 2 shtator në gjashtë anije.
Tragjedia e fundit vjen pasi dy persona vdiqën më 11 gusht dhe 50 të tjerë u shpëtuan teksa tentonin të kalonin ujërat. Më 19 korrik, një person vdiq pasi u shpëtua nga Kanali; një person tjetër vdiq disa ditë më parë kur një varkë me 72 persona u shfry. Organizatat bamirëse kanë kërkuar rrugë të sigurta për azilkërkuesit nga Franca, në mënyrë që shumica dërrmuese e azilkërkuesve të mos kenë nevojë të hipin nëpër gomone.
Në vitin 2023, Britania e Madhe ra dakord t’i paguante rreth 476 milionë funte për tre vjet qeverisë franceze për të kontrolluar kufirin detar. Fatkeqësia më e rëndë detare në Kanal në 30 vjet ndodhi më 24 nëntor 2021, kur vdiqën 31 persona.
Ata kishin bërë vazhdimisht thirrje SOS në shërbimet e urgjencës në Francë dhe në Mbretërinë e Bashkuar, por asnjë ndihmë nuk u dërgua. Më shumë se 30 njerëz kanë vdekur tani në vendkalimet e Kanalit këtë vit. Vitin e kaluar mendohet se kanë vdekur ose janë regjistruar si të zhdukur 12 persona. /ZËRI
