Një histori e pabesueshme u zbulua në 24 orët e fundit në Algjeri: një burrë që u rrëmbye në vitin 1998 në moshën 19-vjeçare u mbajt për 26 vitet e fundit në një bodrum, vetëm 200 metra larg shtëpisë së familjes së tij. Përcaktues për t'i dhënë fund rrëmbimit të Omar Bin Omranit, në fakt ka qenë informacioni i vëllait të rrëmbyesit.
Në një video të lirimit të 45-vjeçarit Omran sot, duket se burri ishte i burgosur në një hapësirë të nëndheshme, nën stallën e rrëmbyesit të tij, i cili e kishte rrëmbyer 26 vjet më parë, ndërsa 19-vjeçari i atëhershëm algjerian po shkonte në shkollën e tij.
Pas lirimit, Omran u dërgua në spital ku iu nënshtrua analizave, ndërsa fqinji i tij 61-vjeçar i arrestuar pritet të dalë në gjykatë. Përveç rrëmbimit, 61-vjeçari i arrestuar akuzohet edhe për vrasjen e një qeni që ishte me Omranin në momentin e rrëmbimit të tij, teksa kafsha bredh rreth shtëpisë së rrëmbyesit një muaj pasi 19-vjeçari i atëhershëm u zhduk.
Raportet e mediave lokale thanë se 61-vjeçari ishte një nëpunës civil dhe jetonte vetëm në shtëpi, megjithëse shpesh shihej duke blerë furnizime që do të ushqenin dy persona. Shumica e familjes së Omranit kishin besuar se ai kishte vdekur gjatë luftës civile në Algjeri në vitet 1990. Vetëm nëna e tij, e cila vdiq në vitin 2013, besonte se djali i saj ishte gjallë. Ajo raportohet të ketë thënë pak para se të vdiste “ju lutem mos ndaloni së kërkuari Omarin. Jam i sigurt se ai është ende gjallë”.
Omran u tha të afërmve pas lirimit të tij se ai ndonjëherë i shihte ata duke ecur pranë ndërtesës në të cilin ishte i burgosur përmes një dritareje të vogël, por ai nuk mund të fliste me ta apo t'u telefononte, sepse, siç raportohet ai, ishte nën ndikimin e disa “magjive” edhe pse besohet se dobësia e tij është për shkak të gjendjes së keqe psikologjike në të cilën ishte gjatë gjithë këtyre viteve./ZËRI
