SHBA- Presidenti turk, Recep Tayyip Erdogan pritet të takohet privatisht me presidentin e SHBA-së, Donald Trump, në kuadër të samitit të NATO-s. Takimi është planifikuar për të martën në mbrëmje në Hagë. Burimet e "Bloomberg", të cilat folën në kushte anonimiteti, pretendojnë për një takim por nuk ka asnjë koment nga Shtetet e Bashkuara.
Takimi po përshkruhet në qarqet diplomatike si një përpjekje për të “rivendosur” marrëdhëniet dypalëshe, të cilat janë vënë në provë vitet e fundit nga një sërë mosmarrëveshjesh, duke përfshirë çështjet që lidhen me Sirinë, blerjen e sistemeve ruse S-400 nga Turqia dhe largimin e Ankarasë nga programi F-35.
Koha e takimit merr një rëndësi të veçantë, pasi zhvillohet në një kohë tensionesh më të gjera gjeopolitike në Lindjen e Mesme dhe me Donald Trump që kërkon një çtensionim të plotë të konflikteve ushtarake me Iranin./ZËRI
