SHBA- Pesë njerëzit më të pasur në Tokë janë bërë shumë më të pasur vitet e fundit. Që nga viti 2020 , vlera neto e këtyre miliarderëve është rritur me 114% në një total prej 869 miliardë dollarësh. Nëse trendet aktuale vazhdojnë, bota mund të shohë trilionerin e saj të parë në një dekadë.
Ndërkohë pesë miliardë njerëz janë bërë më të varfër, sipas institutit Oxfam. Do të duhen gati 230 vjet për të çrrënjosur varfërinë bazuar në trajektoren aktuale.
Oxfam u bëri thirrje ketë të hënë qeverive që të frenojnë pushtetin e korporatave duke thyer monopolet, vendosja e taksave mbi fitimin dhe pasurinë e tepërt, dhe promovimin e alternativave për kontrollin e aksionarëve, të tilla si format e pronësisë së punonjësve.
Në raportin e ekspertëve të tyre vlerësohet se nga 148 korporatat kryesore botërore realizuan 1.8 trilion Dollarë fitime, 52 për qind më shumë se mesatarja 3-vjeçare, duke lejuar pagesa të mëdha për aksionerët edhe pse miliona punëtorë u përballën me një krizë të kostos së jetesës pasi inflacioni çoi në ulje të pagave në terma realë.
Pesë njerëzit më të pasur
Elon Musk, i cili drejton disa kompani duke përfshirë Tesla dhe SpaceX, ka qenë fitues i madh në vitet e fundit. Pasuria e tij ishte 245.5 miliardë dollarë në fund të nëntorit, 737% më shumë që nga marsi 2020, pas llogaritjes së inflacionit.
Bernard Arnault, kryetar i gjigantit francez të mallrave luksoze LVMH, dhe familja e tij kishin një vlerë neto prej 191.3 miliardë dollarësh, 111% më shumë .
Themeluesi i Amazon, Jeff Bezos, kishte një pasuri prej 167.4 miliardë dollarësh, 24% më shumë, ndërsa pasuria e themeluesit të Oracle, Larry Ellison ishte 145.5 miliardë dollarë, 107% më shumë .
Lista e pesë njerëzve më të pasur u plotësua nga CEO i Berkshire Hathaway, Warren Buffett, pasuria e të cilit u rrit me 48% në 119.2 miliardë dollarë. Në përgjithësi, miliarderët panë se pasuria e tyre u rrit me 3.3 trilion dollarë, ose 34%, nga viti 2020, me pasurinë e tyre duke u zgjeruar tre herë më shpejt se norma e inflacionit, sipas Oxfam./ZËRI
