EGJIPT- Sarkofagu i humbur prej kohësh që i përket faraonit më të fuqishëm të Egjiptit të lashtë është gjetur më shumë se 3000 vjet pas vdekjes së tij. Bëhet fjalë për "Ramsesin e madh". Arkeologët duke riekzaminuar një kriptë misterioze graniti të gjetur nën dyshemenë e një qendre fetare në Egjipt kanë zbuluar se i përkiste Ramses II.
Egjiptologu Frédéric Payraudeau, mësues dhe studiues në Universitetin e Sorbonës në Francë, e bëri zbulimin këtë muaj pasi kontrolloi edhe njëherë një fragment graniti të zbuluar në nekropolin e Abydos në vitin 2009. Ai përcaktoi se guri, 152 centimetra i gjatë dhe 7 centimetra, ai përmbante një gdhendje ku shkruhej: Ramses II.
Arkeologët e kanë ditur prej kohësh se Ramses II u varros në një arkivol të artë, por sarkofagu i tij u vodh në Antikitet dhe më pas mumja e tij u zhvendos.
Ramses II ishte sundimtari më i fuqishëm dhe më i famshëm i Egjiptit të lashtë. I njohur për pasardhësit e tij si "Paraardhësi i Madh", ai udhëhoqi shumë ekspedita ushtarake dhe zgjeroi Perandorinë Egjiptiane, e cila në periudhën e mbretërimit të tij shtrihej nga Siria në lindje deri në Nubia në jug. Ai ishte faraoni i tretë i dinastisë së nëntëmbëdhjetë të Egjiptit. Shkencëtarët nga Egjipti dhe Anglia rikrijuan fytyrën e tij në vitin 2022 duke përdorur një model 3D për të rindërtuar tiparet e tij./ZËRI
