SHBA- Një takim tensionues! Kështu mund të përshkruhet përballja e Presidentit Donald Trump me Presidentin e Afrikës së Jugut, Cyril Ramaphosa, në Shtëpinë e Bardhë. Kur një gazetar e pyeti për helikopterin që i dhuroi Katari, Trump shpërtheu në ofendime dhe e quajti gazetarin e NBC që bëri pyetjen, duke e quajtur atë "të tmerrshëm" dhe "jo mjaftueshëm të zgjuar" për të bërë punën e tij.
Ai e akuzoi gazetarin se po e largonte vëmendjen nga çështje më urgjente, siç janë dhuna dhe ligjet raciste kundër fermerëve të bardhë në Afrikën e Jugut.
Presidenti i SHBA-së sugjeroi që NBC dhe Brian Roberts, drejtori ekzekutiv dhe kryetari i kompanisë të hetohen, duke e quajtur rrjetin një "turp".
"Për çfarë po flisni? ...Për çfarë po flisni? E dini... Duhet të largoheni që këtej...Zhduku trap! Çfarë lidhje ka kjo me avionin reaktiv të Katarit...? Po u japin Forcave Ajrore të Shteteve të Bashkuara një avion, dhe është një gjë e shkëlqyer... Po flasim për shumë gjëra të tjera, dhe ky NBC po përpiqet të largohet nga tema. Je një reporter i tmerrshëm. Së pari, nuk ke atë që duhet për të qenë reporter. Nuk je mjaftueshëm i zgjuar", shpërtheu Trump pas pyetjes së reporterit në lidhje me avionin.
"Duhet të kthehesh në studion tënde në NBC, sepse Brian Roberts dhe njerëzit që drejtojnë atë vend duhet të hetohen. Ata janë kaq të tmerrshëm në mënyrën se si e drejton atë rrjet. Dhe je një turp. Mjaft me pyetje nga ana jote", deklaroi ai më tej.
Ai e mbrojti dhuratën nga Katari, duke shtuar: "Por që ju të hyni në një temë rreth një avioni që iu dha Forcave Ajrore të Shteteve të Bashkuara, gjë që është një gjë shumë e mirë. Ata gjithashtu dhanë investime me vlerë 5.1 trilion dollarë përveç avionit."
Sipas CNN, duke cituar një zëdhënës të Departamentit të Mbrojtjes, Sekretari i Mbrojtjes i SHBA-së Pete Hegseth kishte pranuar një Boeing 747 nga Katari i cili, pasi iu nënshtrua modifikimeve të gjera për sigurinë dhe gatishmërinë për mision, pritet të përdoret nga Presidenti Trump.
Më herët, zëdhënësi i Pentagonit, Sean Parnell, konfirmoi pranimin e avionit, duke deklaruar se transferimi është në përputhje me të gjitha ligjet dhe rregulloret e SHBA-së dhe vuri në dukje se Departamenti i Mbrojtjes do të sigurojë që avioni të jetë i pajisur siç duhet për të shërbyer në një rol transporti presidencial, raportoi CNN.
Duke ndarë një postim në platformën e mediave sociale Truth Social, Trump deklaroi më parë se avioni ajror "NUK ishte PËR MUA!", por "një dhuratë për një komb".
"Boeing 747 po i jepet Forcave Ajrore të Shteteve të Bashkuara/Departamentit të Mbrojtjes, JO MUA! Është një dhuratë nga një komb, Katari, të cilin e kemi mbrojtur me sukses për shumë vite. Do të përdoret nga Qeveria jonë si një Air Force One i përkohshëm, derisa të mbërrijnë Boeing-ët tanë të rinj, të cilët janë shumë vonë në dorëzim", deklaroi Trump.
Sipas The Hill, vlera e avionit vlerësohet në 400 milionë dollarë, të cilat familja mbretërore e Katarit ia kishte ofruar si dhuratë Shteteve të Bashkuara.
