SHBA-Shefja e stafit të Shtëpisë së Bardhë, Susie Wiles, është diagnostikuar me kancer të gjirit në fazë të hershme. Lajmin e njoftoi presidenti i SHBA-së, Donald Trump.
Trump deklaroi se Shefja e Stafit të Shtëpisë së Bardhë, Susie Wiles, është diagnostikuar me kancer të gjirit në fazë të hershme, por do të vazhdojë të punojë nga Shtëpia e Bardhë ndërsa i nënshtrohet trajtimit. Trump e zbuloi diagnozën në një mesazh në mediat sociale, duke e lavdëruar Wiles si një këshilltare të afërt dhe duke shprehur besim në shërimin e saj.
"Susie Wiles është një Shefe e Stafit e jashtëzakonshme, një person i shkëlqyer dhe një nga njerëzit më të fortë që njoh, por, për fat të keq, ajo është diagnostikuar me kancer të gjirit në fazë të hershme dhe ka vendosur ta marrë përsipër këtë sfidë, MENJËHERË, në vend që të presë", tha Trump.
Presidenti tha se Wiles kishte filluar tashmë përgatitjet për trajtim dhe kishte mbështetjen e një ekipi të fortë mjekësor.
“Ajo ka një ekip mjekësor fantastik dhe prognoza e saj është e shkëlqyer! Gjatë periudhës së trajtimit, ajo do të kalojë praktikisht kohë të plotë në Shtëpinë e Bardhë, gjë që më bën mua, si President, shumë të lumtur!”, tha Trump.
Wiles është gruaja e parë që shërben si shefe e stafit të Shtëpisë së Bardhë. Kujtojmë se Wiles ndihmoi në drejtimin e fushatës së suksesshme të vitit 2024 përpara se t'i bashkohej Shtëpisë së Bardhë si shefe e stafit. Ky emërim e bëri atë gruan e parë që mbante këtë post. Që atëherë, Wiles është përpjekur të menaxhojë nga afër aktivitetet e përditshme brenda Krahut Perëndimor, duke i lejuar vetë Trumpit të veprojë kryesisht pa kufizime./ZËRI
