BEOGRAD- Një skandal ka ndodhur në Kongresin e 49-të të UEFA-s që zhvilloi takimin e radhës më 3 prill në Serbi. Flamuri i Kosovës u grabit nga ambientët e Kongresit dhe u dogj. Organizatorët serb, hoqën simbolet e Kosovës dhe lanë përfaqësuesit e FFK-së vetëm me simbolet e federatës. Ndërkohë që Federata e Futbollit në Kosovë (FFK) ka paralajmëruar një notë proteste në UEFA.
Ngjarja
Skandali ndodhi më 2 prill, para nisjes së Kongresit të UEFA-s në Beograd. E gjithë ngjarja u shpalos, pasi kreu i FFK-së, Agim Ademi pozoi me flamurin e Kosovës i cili ndodhej në ambientet ku do zhvilloheshin punimet e UEFA-s. Disa orë pas kësaj lajmi "mori dhenë" dhe organizatorët reaguan. Duke qenë se Federata Serbe ishte organizatorja, këta të fundit kanë hapur dyert për huliganët, të cilët jo vetëm që e kanë hequr flamurin e Kosovës, por edhe e kanë djegur. Më pas ata kanë publikuar video në rrjetet sociale.
Më 3 prill, përfaqësuesit e Kosovës, morën pjesë vetëm me simbolet e Federatës dhe jo me flamurin shtetëror. Pas këtij veprimi, FFK ka lajmëruar se do të dërgojë një notë proteste në UEFA, se përse ata e lejuan këtë skandal.
"Çdo veprim i mundshëm në fund të takimit kur presidenti i FFK-së nuk ishte më në sallë, nuk e ndryshon faktin se Kosova ishte dhe mbetet pjesë e barabartë e kësaj organizate ashtu siç është në familjen e futbollit evropian dhe botëror. Sigurisht, si gjithmonë, njerëz të caktuar ndjekin agjenda kundër Kosovës duke e hequr nga tryeza e deri në djegien e flamurit të shtetit tonë (siç ndodhi mbrëmë në Beograd nga tifozët e klubeve serbe), por Kosova si shtet është dhe mbetet realitet i pakthyeshëm. FFK-ja menjëherë do t'i dërgojë një notë proteste UEFA-s dhe institucioneve të tjera ndërkombëtare lidhur me këto veprime, të cilat janë kundër vlerave që promovon UEFA", shkruan mes të tjerash FFK-ja.
Fjala e Ceferin
Kreu i UEFA-s, Alesandër Ceferin gjatë fjalës së tij, solli edhe si shembull bashkorganizimit të Euro 2027 për U-21 nga Shqipëria dhe Serbia, duke “harruar” faktin se organizatorët serb, lejuan huliganët të djegin simbolet e Kosovës./ZËRI
