SHBA- Takime sekrete janë zhvilluar mes amerikanëve dhe rusëve në Zvicër përgjatë muajve të fundit. Takimet kanë pasur lidhje gjithmonë me luftën në Ukrainë. Këto detaje i ka zbuluar Reuters. Sipas tre burimeve të cituara nga agjencia e lajmeve, këto lloj takimesh kanë vijuar deri në javën e kaluar.
Sipas Reuters, pjesëmarrësit në këto takime, megjithëse kishin përvojë diplomatike dhe njohuri për çështjet e sigurisë, nuk ishin anëtarë të qeverisë amerikane apo ruse, por mbetet e paqartë nëse kanë shkuar në Zvicër me urdhër të Shtëpisë së Bardhë apo të Kremlinit. Mbetet gjithashtu e paqartë nëse Ukraina ishte e pranishme në këto takime dhe çfarë saktësisht u diskutua. Po sipas Reuters, një numër i vogël i këshilltarëve të Donald Trump ishin në dijeni të këtyre kontakteve.
Një nga burimet i përshkroi bisedimet në Zvicër si diskutime "Track Two", një term diplomatik për dialogun informal që synon përmirësimin e komunikimit dhe shkëmbimin e ideve, në vend të zhvillimit të propozimeve specifike. Dy burime folën për të paktën një takim në Gjenevë gjatë javës së kaluar.
“Megjithatë, këto kontakte nxjerrin në pah përpjekjet e prapaskenave të Shteteve të Bashkuara dhe Rusisë për të kërkuar mënyra për t'i dhënë fund luftës në Ukrainë, pavarësisht kontakteve zyrtare pothuajse të "ngrira" nën presidencën Biden,"- vëren Reuters.
Agjencia e lajmeve kujton se vetëm një muaj pasi Trump u kthye në Shtëpinë e Bardhë, ka një ndryshim të madh në qasjen amerikane ndaj luftës 3-vjeçare, me presidentin amerikan që u angazhua drejtpërdrejt me Vladimir Putin me synimin për të arritur një marrëveshje të shpejtë për t'i dhënë fund konfliktit.
Kontakte të ngjashme kishin ndodhur në vitin 2023 dhe në fillim të vitit 2024, kur Putini kishte dërguar një mesazh se ishte i gatshëm të diskutonte një armëpushim - kontakte që, megjithatë, nuk çuan askund./ZËRI
