SERBI- Djali i Presidentit të Serbisë, Aleksandër Vuçiç, Danilo Vuçiç është larguar nga Serbia për arsye sigurie pas protestave masive që po zhvillohen në vend. Danilo Vuçiç është fotografuar në Gjenevë të Zvicrës me pasaportë diplomatike në dorë.
Fotoja e tij po qarkullon në"X". Megjithatë, asgjë nuk është konfirmuar nga familja Vuçiç.
Për më shumë se dy muaj në Serbi, mijëra studentë dhe qytetarë të tjerë protestojnë dhe kërkojnë përgjegjësi penale dhe politike për tragjedinë e ndodhur në qytetin serb, Novi Sad, në nëntor të vitit të kaluar, ku si pasojë e shembjes së një pllake të madhe betoni janë vrarë 15 persona. Edhe pas vendimit të kryeministrit Vuçeviç për dorëheqje, përfaqësuesit e studentëve në Serbi kanë thënë se kërkesat e tyre nuk janë plotësuar dhe kanë paralajmëruar protesta të reja.
