SHBA- Me rikthimin e tij në Shtëpinë e Bardhë, presidenti amerikan Donald Trump ka premtuar se do të dëbojë miliona njerëz që jetojnë në Shtetet e Bashkuara pa leje. Në mesin e 1.4 milionë emigrantëve të paligjshëm, të cilët kanë marrë urdhra përfundimtare për dëbim nga Drejtoria e Emigracionit dhe Doganave (ICE), janë edhe 1 mijë e 874 shqiptarë dhe 118 qytetarë nga Kosova. Këta persona janë dëgjuar nga zyra e Emigracionit dhe janë vendosur që do të dëbohen për në atdhe.
Të paktën, kështu tregojnë të dhënat e publikuara nga "Fox News", duke cituar dokumentin zyrtar të ICE-së të lëshuar në nëntor të vitit që lamë pas. Administrata Trump, e cila mori detyrën këtë muaj, ka nisur një fushatë agresive për dëbimin e emigrantëve të paligjshëm.
Pas betimit në detyrë, Trump ka premtuar se do të rrisë në mënyrë drastike dëbimet, por po ashtu tha se për disa individë mund të mos jetë e sigurtë që do të rrinë në vendet e origjinës. Por, po ashtu, presidenti Donald Trump njoftoi se administrata e tij planifikon të dërgojë “kriminelët e huaj më të këqinj” në një qendër paraburgimi në Gjirin e Guantanamos, në Kubë. Në Guantanamo pritet që të ndërtohet një qendër për emigrantët me kapacitet deri 30 mijë persona. Baza detare amerikane në Gjirin e Guantanamos në Kubë, ku tashmë strehohen emigrantë do të jetë e ndarë nga burgu i sigurisë së lartë amerikane për të dyshuarit për terrorizëm dhe do të përdoret për Haitianët dhe Kubanët të kapur në det./ZËRI
