TIRANË- Policia ka zbardhur ngjarjen e rëndë që ndodhi mbrëmjen e të shtunës në zonën e Kamzës në Tiranë, ku një 27-vjeçare u vetëvra duke u hedhur nga pallati. Shkak për ndërmarrjen e këtij akti të rëndë, ka qenë një foto e saj intime që është publikuar në rrjetet sociale. Policia ka vënë në pranga për ngjarjen një 39-vjeçar, i cili dyshohet se është dhe personi i cili ka publikuar foton intime të të resë. Altin Çoku, akuzohet nga policia për shkaktim të vetëvrasjes. E reja u hodh nga kati i katërt i pallatit në Kamëz, mbrëmjen e të shtunës, dhe ndërroi jetë disa orë më vonë në spitalin e Traumës në Tiranë.
Njoftimi i policisë:
I publikoi një foto intime një 27-vjeçareje, e cila për këtë shkak dyshohet se u vetëhodh nga tarraca e katit të katërt dhe për pasojë humbi jetën, kapet dhe vihet në pranga 39-vjeçari.
Shërbimet e Komisariatit të Policisë Nr. 5, nisur nga dyshimet e krijuara mbi ngjarjen e ndodhur më datë 10.02.2024, në rrugën "Teuta", ku u vetëhodh nga tarraca e katit të 4-t, një shtetase, e cila si pasojë e dëmtimeve të marra humbi jetën, kanë vijuar veprimet hetimore të thelluara, në drejtimin e Prokurorisë pranë Gjykatës së Shkallës së Parë të Juridiksionit të Përgjithshëm Tiranë, për të bërë të mundur zbardhjen e rrethanave të ngjarjes.
Në vijim të veprimeve hetimore të kryera, specialistët për Hetimin e Krimeve në Komisariatin e Policisë Nr. 5 bënë ndalimin me iniciativë të shtetasit:
A. Ç., 39 vjeç, për veprën penale "Shkaktimi i vetëvrasjes".
Ky shtetas dyshohet se ka publikuar një foto intime të 27-vjeçares, e cila dyshohet se për këtë shkak është vetëhedhur nga tarraca e katit të 4-t dhe si pasojë e dëmtimeve të marra, ka humbur jetën.
Materialet procedurale i kaluan Prokurorisë, për veprime të mëtejshme.
-
E rëndë në Kamëz, bie nga kati i pestë i pallatit, vdes 27-vjeçarja
11 Shkurt, 11:30
/ZËRI
