TIRANË- Elvi Fundo publikoi në median e tij online lajmin se disa persona, dy më konkretisht, janë arrestuar nga SPAK sepse kanë marrë materiale shumë sensitive brenda dosjeve të SPAK. Aty përfshihen njerëz të rëndësishëm të politikës, kryesisht ish-anëtarë të qeverisë, por edhe emra të biznesit. Vetë Fundo ishte i ftuar në një lidhje live me emisionin “Opinion” për të sqaruar se çfarë ka ndodhur.
Ai tregoi se më 12 Mars mori tre materiale shumë sensitive, të cilat i janë shpërndarë disa gazetarëve. Materialet ishin pjesë e dosjeve hetimore që as personat vetë që janë nën hetim nuk janë në dijeni. Mes dosjeve që Fundo thotë se i erdhën në mesazh ishte një për një politikan, aktualisht deputet i parlamentit dhe kandidat për zgjedhjet e ardhshme si dhe ish-ministër, një tjetër për këqyrjen e një gruaje pranë një biznesmeni dhe vetë biznesmeni.
Fundo tha se i ka lexuar materialet dhe bëhet fjalë për dosje hetimore. “Hetim të kryer nga prokurorët e SPAK, materiale hetimore. Jo pjesë e dosjeve”, tha Fundo.
Gazetari tregoi se më pas ka komunikuar me numrin e panjohur. Por ndërkohë sipas Fundos, SPAK ka qenë në vëzhgim dhe pas disa orësh, po në datën 12 Mars është arrestuar personi që i ka dërguar materialet. Në të njëjtën kohë, atij i ka ardhur një urdhër nga prokurori Bledar Maksuti për ruajtjen e sekretit hetimor dhe ndalimin e publikimeve të akteve. Në “Opinion” ai tregoi kush janë arrestuar.
“Thotë që është ndaluar nga ana e Policisë Gjyqësore shtetasi Zambak Gjoni, i cili rezulton pronari i numrit të telefonit që më ka çuar mua mesazhin. Por rezulton të mos i ketë çuar vetëm në emrin tim. I ka çuar edhe në gazetarë të tjerë. I ka shpërndarë dy persona të tjerë të identifikuar, unë dhe një gazetar tjetër i opozitës. Ky person rezulton sipas kërkimeve që bëra më pas të ketë qenë ish-zyrtar së Drejtorisë së Burgjeve, ish-drejtori i Burgut të Vlorës. Ka rezultuar që është arrestuar edhe shtetasi Arnold Rrokaj që është arrestuar po në datën 13 Mars, të cilët kanë pasur dijeni apo kanë disponuar dokumente apo akte, sekrete hetimore, identitete, aktivitete etj., dhe thotë më pas prokurori urdhërohet ruajtja e sekretit hetimor, aktet”, tregoi Fundo.
Gazetari tregoi se dy të arrestuarit, njëri punonjës i “Burgjeve” dhe tjetri i IMT-së, kanë lidhje me një ish-zyrtar të lartë të burgjeve.
“Në bashkëpunim me të dyshohen dhe persona të tjerë të përfshirë. Ka pasur një grup që mblidhnin informacione dhe i përdornin informacionet, sekrete hetimore, dokumente prokurorie, i kanë marrë dhe mbledhur dhe ndoshta do të donin t’i përdornin për qëllime të caktuara kriminale. Ato sipas prokurorit Bledar Maksuti janë akt kriminal veprimet që kanë kryer. Se ti nuk mund të nxjerrësh dokumente nga SPAK dhe t’ia japësh gazetarëve”, tha ai.
Sipas gazetarit flitet që ka edhe dokumente dhe dosje të tjera që ky grup i caktuar i kryente për investigime private. Më pas ato mund të përdoreshin për shantazh, korrupsion apo për të tërhequr vëmendjen mediatike.
“Dy persona kanë pasur dokumente dhe flitet që ka dhe dosje e dokumente të tjera. Flitet se dyshohet se është një grup i caktuar i cili kryente investigime private dhe mblidhte dosje. Këto dosje i nderuar përdoren për shantazh, për korrupsion, për “spin”, për të tërhequr vëmendjen mediatike. Ne jemi mësuar me këto që një zhurmë e madhe heq një zhurmë më të madhe. Nëse do të dilte ai deputeti dhe ai hetimi atje dhe binte në duar të gabuara, do hiqej vëmendja nga shumë gjëra. Nëse do dilte ky biznesmeni atij biznesmeni mund t’i vinin gjobë, t’i merrnin dhe para. Nëse do dilte ajo zonja atje kushedi çfarë pasoja kishte se janë shumë dokumenta, kanë lidhje, me to mund të abuzosh sa të duash”, tha Fundo.
Sipas Fundos këto dokumente mund të kenë dalë si pasojë e ndonjë hakimi të brendshëm.
“Do të thotë që një person që punon brenda institucionit ka marrë dokumente. Nuk mendoj që është kaq i kollajtë. Mendoj që është atje brenda”, tha ai./tvklan.al
