VLORË- “Nëse shteti i fal, nuk i fal unë”, kjo është deklarata e fortë e vëllait të 26-vjeçares të përdhunuar disa ditë më parë në Vlorë nga katër persona. Ai ka treguar bisedën me të motrën pas ngjarjes, e cila i ka rrëfyer se kishte dalë me një person në lokal, ku kishte pirë diçka, ndërsa të tjerët i ishin bashkuar në hotel.
Vëllai I 26-vjeçares: Ata janë katër persona, nuk janë tre persona dhe nëse shteti i fal, nuk i fal unë. Nëse shteti apo gjykata do i fal, unë nuk i fal.
Po ashtu, në një intervistë në “Euronews Albania” ai ka ngritur dyshime në lidhje me hetimet që po ndjek Policia dhe drejtësia në Vlorë në lidhje me rastin e të motrës. Sipas tij, ekspertiza mjekoligjore i është bërë pas 5 ditësh, ndërkohë që duhet t’i bëhej brenda 72 orëve. Ndërsa shtoi se autoritetet në fillim raportuan se janë tre autorë me qëllim fshehjen e të katërtit.
Ndërkohë ka deklaruar se e motra është kërcënuar në spital për të tërhequr denoncimin ndaj njërit prej autorëve.
Vëllai I 26-vjeçares: Nuk e di kush ka vajtur te spitali dhe ka bërë kërcënim. Motra më tha që kishte shkuar nëna e njërit prej djemve për të hequr denoncimin. Pas zonjës, ka shkuar edhe një zotëri, i cili e ka kërcënuar motrën në spital.
Dy nga 4 të akuzuarit, Oltjan Tahiri dhe Albi Ceno aktualisht ndodhet në burg, kurse në kërkim vijojnë të jenë Gentjano Mehmeti dhe Viljon Kapaj. Zëri.ai e ka ndjekur ngjarjen që në nisje dhe ka investiguar që prej të hënës ngjarjen duke detyruar institucionet të bëjnë drejtësi./Zëri.ai
