RRËSHEN- Shmanget masakra në Rrëshen! Një vrasje me armë zjarri ka tronditur mesditën e kësaj të marte Rrëshenin, ku është ekzekutuar Martin Bardhi, një emër i njohur në botën e krimit, pasi ka qenë i dyshuar për disa ngjarje kriminale që kanë ndodhur më parë në qytet. Ngjarja ka ndodhur paraditen e sotme, pranë spitalit të qytetit të Rrëshenit, shumë pranë ambienteve të komisariatit të Policisë. Në orën 10.40, kur disa persona janë afruar dhe e kanë qëlluar për vdekje 62-vjeçarin Martin Bardhi. Ky i fundit ka ndërruar jetë në vend dhe është mbuluar më pas me një pëlhurë të bardhë.
Por qëllimi i vetëm i autorëve duket se ka qenë atentati pa marrë parasysh të tjerët që do të lëndonin. Plumbat që ishin për viktimën kanë kapur edhe 3 persona të tjerë, të cilët kanë qenë të ulur në një tavolinë me viktimën, në lokalin që ishte në pronësi të tij.
"Zëri.ai" ka identifikuar disa prej tyre. Bëhet fjalë për: Ilir Bardhokun, ish-drejtor shërbimesh në Bashkinë e Mirdirës; Olti Gjini, pronar i një lokali dhe një tjetër person, i identifikuar si Indrit Bardhi, i afërmi i viktimës. Të tre janë transportuar menjëherë për në spitalin e Traumës në Tiranë, ku edhe po marrin ndihmën e parë mjekësore. Por ende nuk dihet gjendja e tyre shëndetësore.
Sipas drejtorit të Policisë së Shtetit, Alfred Elezi viktima ka qenë në lokalin e tij me 3 të plagosurit e tjerë në një tavolinë. Elezi ka folur për mediat lidhur me ngjarjen e rëndë të ndodhur pak më parë në Rrëshen, ku mbeti i vrarë Martin Bardhi dhe u plagosën tre të tjerë. Sipas tij, 62-vjeçari ka qenë në tavolinë në lokalin e tij, së bashku me tre personat që kanë mbetur të plagosur.
“Në lokalin e tij është vrarë me armë zjarri shtetasi Martin Bardhi dhe janë plagosur tre të tjerë, që kanë qenë në tavolinë me të. Auotrët e ngjarjes kanë qenë dy persona të maskuar me fuoristradë, e cila pak pas ngjarjes, është djegur në fshatin Gëziq. Shërbimet tona kanë shkuar menjëherë në vendin e ngjarjes dhe ku është djegur mjeti. Shkuam menjëherë në vendin e ngjarjes dhe ku është djegur mjeti, territori po kontrollohet në mënyrë intensive. Ne po bëjmë veprimet e para, dihet konflikti që kanë pasur mes fisesh po punojmë për zbardhjen e ngjarjes. Të plagosurit janë nën kujdesin e mjekëve, ata ishin në tavolinë me viktimën. Këta të fundit kanë rrethuar zonën, ndërsa në ndihmë të tyre kanë shkuar forcat “RENEA” dhe Forcat e Ndërhyrjes së Shpejtë"-tha Alfred Elezi.
Por kush është Martin Bardhi dhe pse e donin të ekzekutuar?
62-vjeçari ka qenë një prej autorëve të të shtënave me armë ndaj Saimir Reçit, një ngjarje e ndodhur po ashtu në Rrëshen, në fillim të këtij viti. Saimir Reçi është nipi i Kastriot Reçit, i ekzekutuar në qendër të Rrëshenit në vitin 2020. Në ngjarjen e cila u regjistrua në 26 mars, është përfshirë edhe djali i Martin Bardhit, Erind Bardhi, si dhe një 28-vjeçar tjetër lidhje gjaku e familjes Bardhi. Ka qenë Erind Bardhi fillimisht, i cili është konfliktuar me Saimir Reçin në qendër të qytetit të Rrëshenit dhe pas këtij momenti ka shkuar në banesë për të marrë armën. Sipas Policisë, bashkë me babanë e tij, Martin Bardhin dhe një kushëri, qëlluan ndaj Reçit në dalje të qytetit, por makina e blinduar e shpëtoi këtë të fundit. Pak kohë më parë viktima e sotme u arrestua dhe më pas u la i lirë. Por megjithëse i shpëtoi akuzave të drejtësisë në lidhje me përplasjen me fisin Reçi, Bardhi nuk i ka shpëtuar plumbave të krimit, që pasojnë një seri hakmarrjes mes fiseve në Rrëshen./Zëri.ai
