TIRANË- Është shtyrë seanca e parë në themel për dosjen e “Sterilizimit”. Shkak mësohet të jetë bërë pretendimi i avokatit të ish-ministrit Ilir Beqaj, të cilët janë shprehur se nuk kanë marrë ende vendimin për rikualifikimin e veprës penale, nga “vjedhje”, në “vjedhje duke shpërdoruar detyrën”.
Pjesë nga biseda e zhvilluar në gjyq:
Ermal Yzeiraj, avokati i Ilir Beqaj: Kërkojmë aktin e shkruar nga ana e prokurorisë për rikualifikimin e akuzës. Ne nuk e dimë qëndrimin e Prokurorit lidhur me ndryshimin e akuzës nga shpërdorimi i detyrës në vjedhje duke shpërdoruar detyrën. Nga bashkëpunimi i thjeshtë në një formë më të lartë, ajo e grupit të strukturuar kriminal.
Ilir Beqaj: Deri dje pyeta ata të administratës në Durrës, por më thanë s’ka ardhur. Nisët një vendim të dhjetorit por jo rikualifikimin e akuzës. Pse s’e nisët?
Prokurori Edvin Kondili: Në dukje kjo është kërkesë për marrje vendimi, por në fakt në thelb është për shtyrje. Ndaj, kërkoj pezullim të afateve të paraburgimit dhe të arrestit shtëpiak për të pandehurit.
Seanca e radhës pritet të mbahet më 13 mars në orën 12:30. Lidhur me dy koncensionet në Shëndetësi, ish-ministri i Shëndetësisë Ilir Beqaj është vënë nën hetim nga SPAK prej më shumë se një viti. Beqaj është i dyshuar për shpërdorim detyre lidhur me 2 tendera të firmosura, për sterilizimin dhe check up. Këto 2 çështje janë duke u hetuar nga 3 prokurorë. Koncensionin e sterilizimit po e hetojnë prokurorët Edvin Kondilli dhe Ened Nakuçi, ndërsa atë të 'check up' po e heton prokurorja Elida Kaçkini.
Më 18 mars, SPAK njoftoi mbylljen e hetimeve, ndërsa iu komunikoi akuzat 8 personave të tjerë të përfshirë në dosjen e 2 koncensioneve. Por aktualisht, Beqaj është në burg që prej datës 4 korrik, pasi akuzohet edhe për abuzim me fondet e BE-së gjatë kohës së mbante postin e drejtorit të Agjencisë Shtetërore e Programimit Strategjik dhe Koordinimit të Ndihmës (SASPAC). Detyrë që e ka mbajtur pasi liroi postin si ministër i Shëndetësisë./ZËRI
