TIRANË- Zbardhen mesazhet e shkëmbyera mes vjehrrës së ministres së Shtetit për Sipërmarrjen dhe Klimën e Biznesit, Delina Ibrahimaj, Teuta Rino (Ibrahimaj) dhe Eri Koshaj, ish-drejtorit të Agjencisë së Trajtimit të Kredive. Mesazhet mes tyre janë shkëmbyer fill pas plagosjes së Koshajt nga djali i saj, Andri Ibrahimaj. Sipas fotove të siguruara nga "Newsbomb", më 20 nëntor nëna e Andri Ibrahimaj i shkruan drejtorit të ATK-së me pretendimin se po pyeste për ofertat e festave të nëntorit, por Koshaj e informon direkt se i biri e ka plagosur me thikë. Kjo e fundit interesohet me të birin për të mësuar anën e tij të historisë.
Teuta Rino: Djali si je? Ke ndonje te re nga puna? Si janë ofertat e festave të nëntorit dhe cilat ditë janë?
Eri Koshaj: E reja është që Andri më gjuajti me thikë sot! Nuk e kuptoj gjithë këtë mllef.
Sapo Koshaj i hap bisedën, Teuta Ibrahimaj futet në bisedë dhe nis të pyesë drejtorin e Agjencisë së Trajtimit të Kredive për atë që kishte ndodhur dhe më pas i përmend emrin e një tjetër personi, i cili rezulton gjithashtu i plagosur dhe ai. Në një moment, Teuta nis të 'hulumtojë' për shkakun e sherrit, duke dyshuar se mos Koshaj i ka ofenduar të shoqen, asokohe ministren e Ekonomisë dhe Financave, Delina Ibrahimaj.
"Ai sot do nisej me punë jashtë. Ronin e takova dhe nuk më tha gjë fare në drekë. Mos i keni sharë Delinën se vetëm për të bën sherr ai? Bobo, po pse moj zemër bëni fjalë me njëri-tjetrin. Ne prindërit jemi si vëlla e motër, ju??? Bobo sa më shqetësove. Po unë ty të kam shpirt. Të ka dëmtuar? Zemër të kërkoj falje për ç'ka ka ndodhur. Ju jeni vëllezër zemër,"- është një nga mesazhet që Teuta Ibrahimaj i dërgon Eri Koshaj, e mesa duket e verifikon situatën e krijuar me të birin.
"Fola me çunin. Ishte gozhdë e jo thikë, por i kishe sharë gruan o bir. Kush të falë për gjëra të tilla. Aq më tepër që ajo të ka ndihmuar. Gjithsesi harrojini këto gjëra. Ti e di që unë të kam si çunin tim edhe ty,"-i shkruan ajo në tentativë për të shuar gjakrat.
Ngjarja ka ndodhur më 20 Nëntor 2023, e më datë 29 Teuta i shkruan sërish Koshajt.
"Zemër si je? Kam qenë merak për ty. Të lutem mbylle këtë histori të hidhur për të dy palët. Ju duhet të jeni vëllezër e jo armiq. Të puth fort,"-shkruan ajo.
Megjithatë Koshaj duket se ka qenë i qartë dhe i vendosur, duke e denoncuar ngjarjen dhe materialet hetimore proceduriale i janë referuar Prokurorisë së Tiranës me datën 4 Dhjetor 2023. Megjithatë, përgjatë dy javëve nëna e Andri Ibrahimaj dhe persona të tjerë kanë ndërhyrë vazhdimisht me "këshillime" ndaj Eri Koshaj, që ai të mos e bënte kallëzimin.
"Biro po si ka mundësi të sillesh me mua në këtë mënyrë. Çfarë kërcënimesh të kam bërë unë ty mor djalë, që të kam trajtuar si çunat e mi? Sinqerisht nuk mendoja kurrë dhe nuk besoj që ti je Eri, djali i mikut tim, që kam dashur me gjithë zemër. Gjithsesi flm,"- shkruan sërish Teuta Ibrahimaj. Këtij mesazhi, Koshaj i përgjigjet me këto fjalë: Teuta po patët mundësi mos më shqetësoni më! E kam harruar këtë histori të shëmtuar, e ajo e falenderon dhe i shkruan se edhe ajo e ka harruar gjithë skenën e sherrit me thikë.
Çfarë ka ndodhur mes tyre?
Ngjarja ka ndodhur në rrugën “Tefta Pashko”, pranë “Pazarit të Ri” në kryeqytet, në orët e mbrëmjes së datës 21 nëntor të vitit të kaluar. Andri Ibrahimaj i kishte zënë “pritë” Koshajt dhe pas përplasjes verbale, ka nxjerrë thikën dhe e ka qëlluar në pjesën e shpinës, siç thuhet edhe në raportin mjekoligjor. Sipas dosjes së publikuar në media, Andri Ibrahimaj donte të dorëhiqej Koshaj në mënyrë që në vendin e tij të vendosej një miku i vet. Në një reagim për ngjarjen, Brahimaj konfirmon që kjo gjë ka ndodhur por shton se nuk ka lidhje me funksionin e saj si Ministre dhe se nuk ka ndodhur në zyra shtetërore. Ajo gjithashtu thekson se i vetmi ndikim që ka pasur, ka qenë që ka mundësuar që bashkëshorti i saj të mos e kallëzonte Koshajn dhe se ky i fundit nuk është shkarkuar nga detyra pas konfliktit./ZËRI
