Senatorja amerikane Elissa Slotkin ka reaguar për situatën e krijuar nga protestat në Shqipëri duke kërkuar respektimin e së drejtës për tubime paqësore dhe mbrojtjen e qytetarëve nga përdorimi i tepruar i forcës policore.
Në një deklaratë në rrjetet sociale, Slotkin bëri të ditur se ka marrë telefonata nga banorë të Miçiganit të shqetësuar për përshkallëzimin e dhunës në Shqipëri dhe në vende të tjera të Evropës.
Ajo theksoi se qytetarët shqiptarë kanë të drejtë të kërkojnë llogari nga përfaqësuesit e tyre të zgjedhur, ndërsa i bëri thirrje qeverisë të respektojë shtetin e së drejtës dhe të luftojë korrupsionin.
Senatorja u bëri apel të gjitha palëve të kontribuojnë në uljen e tensioneve dhe në gjetjen e një zgjidhjeje paqësore.
Reagimi i senatores amerikane Elissa Slotkin:
Gjatë ditëve të fundit, kam marrë një sërë telefonatash nga banorë të Miçiganit, të shqetësuar për përshkallëzimin e dhunës në Shqipëri, si dhe në vende të tjera evropiane.
Populli shqiptar ka të drejtë të protestojë në mënyrë paqësore dhe të kërkojë llogari nga zyrtarët e zgjedhur prej tij. Po ashtu, qeveria shqiptare ka detyrimin të respektojë shtetin e së drejtës, të mbrojë protestuesit nga përdorimi i tepruar i forcës policore, të luftojë korrupsionin dhe t’u përgjigjet shqetësimeve të qytetarëve. U bëj thirrje të dyja palëve të bëjnë gjithçka që munden për të ulur tensionet dhe për të gjetur një rrugë paqësore për të ecur përpara./ZËRI
