POLIÇAN- Banorët e Poliçanit dolën sërish në protestë kundër planit për shkrirjen e bashkisë, ndërsa tubimi u shoqërua me një zhvillim të fortë politik: anëtarët e Këshillit Bashkiak paraqitën dorëheqjen në mënyrë unanime, duke deklaruar se të njëjtin qëndrim ka mbajtur edhe lista pasardhëse e këshilltarëve.
Protesta u zhvillua në ditën e nisjes së programit "Besa", ndërsa pjesëmarrësit shprehën pakënaqësi për mungesën e deputetëve në qytet. Ata thanë se prisnin që përfaqësuesit politikë të dëgjonin shqetësimet e komunitetit, por kjo nuk ndodhi.
Kryetarja e Këshillit Bashkiak, Mimoza Kula, argumentoi se kundërshtimi ndaj reformës lidhet me pasojat që ajo mund të sjellë për qytetin. "Jemi kundër një reforme që mund të sjellë humbjen e vendeve të punës për shumë profesionistë dhe punonjës në administratë, sepse pas çdo vendi pune është një familje," u shpreh ajo.
Sipas Kulës, qëllimi i protestës nuk është mbrojtja e godinës së bashkisë, por ruajtja e institucionit dhe shërbimeve që ofrohen për qytetarët. "Ne nuk mbrojmë godinën, por mbrojmë institucionin. Këshilli Bashkiak ka vendosur unanimisht të kundërshtojë shkrirjen e Bashkisë Poliçan," deklaroi ajo.
Ajo paralajmëroi se kundërshtimi do të vazhdojë nëse reforma ecën përpara, ndërsa kritikoi edhe mungesën e deputetëve në takimet me banorët. "Sot ishte dita që deputetët duhej të dëgjonin qytetarët, por asnjë nuk erdhi në Poliçan," tha Kula.
Në përfundim, ajo u bëri thirrje edhe bashkive të tjera që mund të preken nga riorganizimi territorial t'i bashkohen protestës. "Mos e bëni këtë reformë. Ne do ta vazhdojmë protestën edhe përpara Parlamentit. Besën jua dhamë ne, por ju nuk e mbajtët ndaj nesh," përfundoi ajo./ZËRI
