Dialogu Kosovë-Serbi/ SHBA & BE dalin me deklaratë të përbashkët! THIRRJE palëve
SHBA- Shtetet e Bashkuara të Amerikës dhe Bashkimi Europian, kanë bërë thirrje këtë të premte për zbatim të “shpejtë dhe pa kushte” të Marrëveshjes për normalizim të marrëdhënieve mes Kosovës dhe Serbisë që dy vendet t’i kthehen dialogut.
Ky qëndrim është përfshirë edhe në deklaratën e përbashkët, të miratuar në samitin mes SHBA-së dhe BE-së, që është mbajtur më 20 tetor në Uashington, shkruan REL.
Të pranishëm në Samitin kanë qenë dhe Presidenti Joe Biden dhe Sekretari i Stetit Antony Blinken. Ndërkohë Bashkimi Europian përfaqësohej nga Presidentja e Komisionit Europian Ursula Von der Leyen, Presidenti i Këshillit Evropian Charles Michel, dhe përfaqësuesi i lartë i BE-së për Politikë të Jashtme dhe Siguri, Josep Borrell.
“Ne rikonfirmojmë përkushtimin tonë të përbashkët për stabilitetin në Ballkanin Perëndimor dhe mbështesim perspektivën evropiane të rajonit. Të gjithë partnerët duhet t'i vazhdojnë reformat e kërkuara, për të përparuar në rrugëtimin e tyre evropian, është thënë në pjesën e deklaratës kushtuar këtij rajoni, raporton REL.
Pastaj, në mënyrë të veçantë përmendet normalizimi i raporteve mes Kosovës dhe Serbisë, përmes dialogut të lehtësuar nga Bashkimi Evropian.
“Nënvizojmë nevojën që Kosova dhe Serbia, urgjentisht t’i ulin tensionet dhe shpejt, e pa kushte ta zbatojnë Marrëveshjen për rrugën drejt normalizimit të raporteve mes tyre dhe të kthehen në dialogun e lehtësuar nga BE-ja“, është thënë mes tjerash në deklaratë.
Kjo deklaratë e SHBA-së dhe BE-së vjen një ditë para vizitës së doplomatëve perëndimorë në Prishtinë e Beograd për të bindur palët që ti rikthehen dialogut.
Në takime do të marrin pjesë: Mirosllav Lajçak, emisar I BE-së për dialogun Kosvë-Serbi, I dërguari I SHBA-së për Ballkanin Perëndimor Gabriel Escobar, dhe zyrtarët e lartë nga Franca, Emanuel Bonne, Gjermania, Jens Plotner dhe Italia, Francesco Talo.
Tensionet mes dy vendeve u thelluan pas sulmit terrorist të 24 shtatorit ku mbeti i vrarë efektivi i Policisë së Kosovës, Afrim Bunjaku dhe u plagosën dy kolegët e tij. Në shkëmbim e sipër të zjarrit mes Policisë dhe terrorsitëve janë vrarë edhe tre nga këta të fundit. Përgjegjësinë për sulmin e ka marrë ish-nënkryetari i Listës Serbe, Millan Radoiçiç, i cili më pas ka hequr dorë nga të gjitha funksionet e parties. Ky i fundit ka mohuar përfshirjen e Beogradit zyrtar në ngjarje.
Kosova është në kërkim të ekstradimit të Radoiçiçit nga Serbia. Prishtina e fajëson Serbinë për sulmin e 24 shtatorit, por ajo i hedh poshtë të gjitha pretendimet. Diplomatët perëndimorë e kanë përmendur disa herë se zbatimi i Marrëveshjes së arritur më 27 shkurt në Bruksel është hap kyç për rrugën përpara drejt integrimeve evropiane.
Marrëveshja me 11 nene nuk e obligon Serbinë që ta njohë Kosovën, por kërkon nga të dyja vendet që t’i pranojnë dokumentet dhe simbolet e njëra-tjetrës, përfshirë: pasaportat, diplomat dhe targat./Zëri.ai
Stano: Diplomatët e BE-së dhe SHBA-së takime me Kurtin dhe Vuçiç!
PRISHTINË- Të dërguarit e BE-së, të SHBA-ve, por edhe këshilltarët e sigurisë së liderëve të Francës, Gjermanisë dhe Italisë do të vijnë nesër në Prishtinë dhe më pas do të udhëtojnë në Beograd.
Në lidhje me këtë vizitë, zëdhënësi i BE-së Peter Stano, tha për agjencinë e lajmeve Beta se Miroslav Lajçak, Gabriel Escobar dhe këshilltarët për sigurinë, do të zhvillojnë bisedime me Kurtin dhe Vuçiç, me pritshmëri të larta, se të dyja palët do të vazhdojnë procesin e normalizimit të marrëdhënieve dhe të zbatojnë detyrimet e tyre, pa vonesa e kushte.
Në të njëjtën kohë, zëdhënësi i Përfaqësuesit të Lartë të BE-së, Josep Borrell, deklaroi se autoritetet serbe do të duhet të zbardhin sulmin e ndodhur në Banjskë të Zveçanit.
Sipas diplomatëve ndërkombëtarë, Prishtina dhe Beogradi duhet ta kenë parasysh, se dialogu shërben, që Kosova dhe Serbia të japin një shembull për të ardhmen europiane të tyre dhe rajonit.
Nesër, më 21 tetor, pesë diplomatë perëndimorë do mbërrijnë në Kosovë dhe Beograd, në përpjekje për të bindur Prishtinën dhe Beogradin të ulen në bisedime./Zëri.ai/
Diplomatët nesër në Kosovë, Lajçak: Të dyja vendet të rifuten në dialog
PRISHTINË – Emisarët europianë dhe ata amerikanë, pritet që nesër, më 21 tetor të vizitojnë Prishtinën dhe Beogradin, ndërsa në fokus të takimeve pritet të jetë rikthimi i Kosovës dhe Serbisë në procesin e dialogut.
Në këtë vizitë, do të jenë edhe këshilltarët për politikën e jashtme dhe për sigurinë të presidentit francez, kancelarit gjerman dhe kryeministrit italian, Emmanuel Bonn, Jens Plettner dhe Francesca Tal. Pritet që diplomatët të takohen fillimisht me Albin Kurtin në Prishtinë dhe më pas me Vuçiç në Beograd.
Në lidhje me këtë vizitë të diplomatëve, i dërguari i BE për dialogun Kosovë-Serbi, Miroslav Lajçak u shpreh se janë duke u bërë përpjekje për të rifutur vendet në dialog.
Gjithashtu, zëdhënësi i Përfaqësuesit të Lartë të BE-së, Josep Borrell, deklaroi se Serbia duhet të dënojë ashpër sulmin në Banjskë të Zveçanit, duke dërguar autorët përpara drejtësisë.
Media serbe “Novosti”, sipas burimeve të saj, shkruan se edhe Vuçiç pritet të ketë presion të shtuar, teksa do i kërkohet që të zbatojë plotësisht Marrëveshjen e Ohrit, që ka nënshkruar dhe gjithashtu të vendosë sanksione ndaj Rusisë. Edhe mediat serbe raportojnë se diplomatët perëndimorë do i tërheqin ‘veshin’ Vuçiçit, për sulmin terrorist në Banjskë.
Nesër, më 21 tetor, pesë diplomat perëndimorë do mbërrijnë në Kosovë dhe Beograd, në përpjekje për të bindur Prishtinën dhe Beogradin të ulen në bisedime./Zëri.ai/
Diplomatët perëndimorë 'zbarkojnë' në Kosovë me kërkesa dhe afate specifike
PRISHTINË – Të dërguarit perëndimorë, që do të vijnë nesër në Prishtinë, por do shkojnë edhe në Beograd, pritet që t’i kërkojnë Kosovës dhe Serbisë, që të angazhohen në mënyrë serioze, për zbatimin e Marrëveshjes së Ohrit. SHBA, Gjermania dhe Franca duan vazhdimin e dialogut dhe pritet të ketë presion mbi kryeministrin e Kosovës Albin Kurti dhe presidentin serb Aleksandër Vuçiç, për zbatimin e marrëveshjeve.
Ngjarjet e fundit në Kosovë, të cilat kanë ndryshuar në mënyrë dramatike atmosferën politike, do t'i detyrojnë diplomatët të kërkojnë veprime konkrete: që Beogradi të dënojë fuqishëm dhe pa mëdyshje incidentin e fundit të armatosur në Banjskë, si dhe që të dyja palët të zbatojnë marrëveshjet. Diplomatët pritet të mbërijnë me kërkesa dhe afate specifike, por gjithashtu mund të njihen edhe me pasoja, në rast se refuzohet të zbatohet marrëveshja për normalizim.
Të shtunën, fillimisht në Prishtinë, e më pas në Beograd, do të mbërrijë një grup prej pesë delegatësh - Miroslav Lajçak, në emër të Bashkimit Evropian, Gabriel Escobar (SHBA), Emanuel Bon (Francë), Jens Pletner (Gjermani) dhe Francesco Talo (Itali).
Zëdhënësi i Bashkimit Evropian, Peter Stano, tha për Agjencinë Beta se përfaqësuesit ndërkombëtarë po shkojnë në bisedime me kryeministrin e Kosovës Albin Kurti dhe presidentin serb Aleksandar Vuçiç, me pritshmëri të qarta që të dyja palët të vazhdojnë procesin e normalizimit të marrëdhënieve dhe të zbatojnë detyrimet e tyre pa vonesë.
Johanna Deimel, një analiste e pavarur gjermane për Ballkanin Perëndimor dhe Evropën Juglindore, tha për median në gjuhën serbe “Demostat” se fakti që në Prishtinë e Beograd vijnë 5 diplomatë perëndimorë, tregon sesa me rëndësi është për ta, normalizimi i raporteve në Ballkanin Perëndimor.
Një presion pritet të ketë edhe mbi presidentin serb Aleksandër Vuçiç, që të nxjerrë përpara drejtësisë autorët e sulmit të 24 shtatorit. Fakti që Vuçiç udhëtoi për në Pekin dhe jo në Samitin e Procesit të Berlinit në Tiranë dhe se ai injoroi BE-në e vendet fqinje, mund të shtojë gjithashtu presionin mbi të.
Sipas portalit serb, perëndimorët do të vëzhgojnë me kujdes sesa i besueshëm është Vuçiç. Nëse vërehet se ai nuk plotëson kushtet që kërkon BE dhe SHBA, mund të ketë edhe sanksione ndaj njerëzve të tij më të afërt. Parlamenti Evropian tashmë ka miratuar Rezolutën për Kosovën dhe kërcënoi me masa të mundshme ndëshkuese. Por, edhe Albin Kurti duhet të plotësojë kushtet e Perëndimorëve, nëse nuk dëshiron që BE të mbyllë vizat për qytetarët e Kosovës.
Sipas analistes Johanna Diemel, vetëm normalizimi dhe zbatimi i asaj që tashmë është diskutuar dhe rënë dakord do të ndihmojë të dy vendet në përparimin e mëtejmë.
“Çdo gjë tjetër do të thotë regres dhe qëndrim në një konflikt të ngrirë. Rritja e numrit të ushtarëve të KFOR-it në terren do të thotë më shumë siguri për Kosovën dhe, në të njëjtën kohë, një hap prapa për sa i përket sovranitetit të saj, si dhe rritje të pranisë së NATO-s në kufirin me Serbinë. Shumë gjëra janë në lojë - për Serbinë, për Kosovën, për rajonin. Gjithçka pritet ta shpalosë pesëshja diplomatike”, përfundon Diemel.
Nesër, më 21 tetor, pesë diplomat perëndimorë do mbërrijnë në Kosovë dhe Beograd, në përpjekje për të bindur Prishtinën dhe Beogradin të ulen në bisedime. /Zëri.ai/
Vizita e diplomatëve në Kosovë, Kurti: Nuk ka normalizim pa siguri
PRISHTINË – Pesë përfaqësues ndërkombëtarë do të vizitojnë nesër Prishtinën, të cilët pritet që të vijnë me kërkesa dhe afate specifike për Kosovën dhe Serbinë. Në lidhje me vizitën e diplomatëve, Kurti tha se nuk mund të ketë normalizim të raporteve me Serbinë, pa pasur siguri në Kosovë.
“Se çfarë do të kërkojnë dhe do të ofrojnë diplomatët e huaj në Prishtinë, këtë do ta marrim vesh nesër. Unë mund të them se nuk mund të kemi normalizim pa siguri. Siguria e Kosovës duhet të jetë prioritet për institucionet e shtetit, për popullin dhe shoqërinë”, tha Kurti.
Nesër, më 21 tetor, në Kosovë dhe Serbi, i dërguari i Bashkimit Evropian për dialogun, Mirosllav Lajçak, së bashku me emisarët e Gjermanisë, Francës, Italisë dhe Shteteve të Bashkuara do të takohet në Prishtinë me kryeministrin e Kosovës, Albin Kurti, dhe në Beograd me presidentin serb, Aleksandar Vuçiç.
Së bashku me Lajçakun, në vizitë do të jenë edhe këshilltari për siguri dhe politikë të jashtme i presidentit të Francës, Emanuel Bonne, këshilltari i kancelarit gjerman, Jens Plotner dhe i kryeministres së Italisë, Francesco Talo. Me ta do të jetë në delegacion edhe i dërguari i posaçëm amerikan për Ballkanin Perëndimor, Gabriel Escobar.
BE ka deklaruar se qëllimi kryesor i vizitave të diplomatëve në Kosovë dhe në Serbi është që të vazhdohet dialogu, në mënyrë që palët të zbatojnë detyrimet nga marrëveshjet që arrihen, por gjithashtu të vendoset edhe stabiliteti në veriun e Kosovës, banuar kryesisht nga serbët./Zëri.ai/
