BRITANI E MADHE- Tre persona janë arrestuar në Angli, mes tyre edhe një person i marrë peng. Sipas mediave të huaja, Mohamed Abdu, 27 vjeç dhe Levi Senior, 26 vjeç mbajtën në një furgon në zonën e Bedfordit për rreth 18 orë në tetor 2022 një bashkëpunëtor droge, shqiptarin Florian Cani. Ata kërkuan 30,000 £ nga të afërmit e Canit dhe e kërcënuan se do ta dëmtonin nëse nuk do të paguanin për dëmin që shqiptari u kishte bërë.
Megjithatë Policia britanike arriti që të shpëtonte shqiptarin, i cili gjithashtu përfundoi në pranga. Provat nga telefonat e sekuestruar treguan se Abdu dhe Cani, ishin përfshirë në një komplot për të shpërndarë drogë.
Gjatë një gjyqi shtatë-javor në Gjykatën e Luton Croën juristëve iu tha se Cani kishte ardhur në Bedford në tetor 2022 me tren për të takuar Abdu. Por kur mbërriti, Abdu e mori me makinë dhe e ndaloi në një vend rural ku e kërcënoi dhe e goditi përpara se ta transferonte në pjesën e pasme të një furgoni. Furgoni u dërgua në një garazh ku shqiptari u udhëzua të telefononte familjen e tij. Rrëmbyesit e tij kërcënuan se do t’i prisnin një gisht për çdo orë që kalonte. Rreth orës 22:30 ata u larguan nga garazhi dhe më pas u zhvendosën në disa vende të tjera përreth Bedford.
Abdu dhe Senior u dënuan të dy për shantazh. Abdu, i cili u dënua gjithashtu për komplot për furnizimin e kokainës, u burgos për një total prej 11 vitesh e gjysmë në Gjykatën e Kurorës Luton të premten më 19 korrik. Bashkëpunëtori i tij Levi Senior u dënua me 6 vjet. Ndërsa Cani, i cili u ul në bankën e të akuzuarve së bashku me pengmarrësit e tij u dënua me 8 vite e gjysmë heqje lirie./ZËRI
