TIRANË- Të gjithë besimtarët myslimanë në Shqipëri dhe në botë festojnë sot Fitër Bajramin, pasi kanë përmbyllur muajin e Ramazanit.
Mijëra qytetarë e kryen faljen e namazit që nisi në orën 06:55 në të gjitha qytetet nëpër xhami e sheshe kryesore. Në Tiranë edhe këtë vit, falja u krye në sheshin Skënderbej, ku është vënë re një pjesëmarrje mjaft e madhe e qytetarëve.
Kreu i Komunitetit Mysliman të Shqipërisë, Bujar Spahia, bëri thirrje për më shumë tolerancë mes njerëzve.
“Gëzuar festën e Fitër Bajramit, kjo festë qoftë një. Paqe mirësi e begati në familjet tona. Lutjet shkojnë për një Shqipëri sa më të mirë dhe të begatë. I lutem Zotit që vendimet tonë t’i sjellë begati dhe anë e kënd botës paqe dhe drejtësi. Sot kemi të drejtën për të gëzuar dhe festuar dhe për ta ndarë këtë mirësi e begati që Zoti na ka dhënë pas këtij përkushtimi, ta ndajmë me familjen e shoqërinë. Gëzuar shqiptarëve e popujt anë e kënd botës”, u shpreh kreu i KMSH-së pas faljes së Namazit.
Spahia foli dhe për hapjen e xhamisë së re, e cila vonon prej shumë kohësh.
“Bajramet janë festa që duhen falur nëpër sheshe. Shpresojmë që edhe ajo xhami do mbarojë dhe do falemi edhe aty. Sheshet janë të dendura, nuk ka xhami në asnjë vend të botës që t’i zërë njerëzit”, tha Spahia.
Kremtimet e Fitër Bajramit shënojnë edhe fundin e muajit të shenjtë të Ramazanit, ku familjarë e miq mblidhen bashkë për lutje dhe për të ngrënë drekën e Fitër Bajramit.
Për shumë besimtarë muaji i shenjtë i Ramazanit përbën në vetvete një kohë reflektimi dhe lutjesh.
Agjërimi, tipari kryesor i tij, është një prej 5 shtyllave të Islamit dhe një moment shpirtëror për myslimanët anembanë botës që të fokusohen tek vetëpastrimi, qetësia, durimi dhe përkushtimi ndaj Zotit./ZËRI
