BELGJIKË- Seanca e radhës është mbajtur sërish sot në Belgjikë në kuadër të megaprocesit “Sky ECC”, ku janë marrë 124 të pandehur. Mes tyre është edhe vlonjati Eridan Munoz Guerrero, i cili është akuzuar për trafik kokaine nga Amerika Latine dhe kultivim kanabisi. Midis nëntë të pandehurve të dëgjuar të martën përpara gjykatës penale të Brukselit, tre u shfaqën për rolin e tyre të dyshuar si “kopshtarë” në një plantacion kanabisi.
Mes tyre ishte edhe Murat E., dyshohet se është një nga drejtuesit e organizatës kriminale që qëndron pas këtij trafiku droge. Ai kundërshtoi akuzat kundër tij, por pranoi se ishte përdorues i tre telefonave të pajisur me softuer komunikimi të koduar "Sky ECC".
"Në kafenetë ku punoja në Holandë, kjo ishte e zakonshme,"-tha ai sipas mediave të huaja. I pandehuri holandez ka shpjeguar se ka marrë pjesë në mirëmbajtjen e një plantacioni në Belgjikë, pa e pasur mendimin sesa serioze ishte situata. Kjo pasi në Holandë lejohen që të kultivohen deri në 5 bimë kanabisi.
I dyshuari i dytë, Leonard Z., dyshohet se mbante bimë kanabisi dhe u arrestua në tetor 2022, 4 ditë pas mbërritjes së tij në Belgjikë. Burri pranoi se misioni i tij konsistonte në ujitjen e bimëve, por mohoi të ishte pronar i GSM Pixel (telefon i popullarizuar në qarqet kriminale) i gjetur në xhepin e tij gjatë arrestimit të tij.
Në fund, Artjol M. u arrestua një muaj e gjysmë pas mbërritjes në Belgjikë. Numri i tij i telefonit ishte përdorur në një prej plantacioneve të kanabisit. Ky numër figuronte në përdorim të Gentian S., po ashtu i akuzuar në këtë çështje. I pyetur në lidhje me pamjet e gjetura në celularin e tij që tregonin një kafene të vendosur në Schaerbeek, i pandehuri shpjegoi se kjo ishte pika e mbërritjes në Belgjikë për të cilën ishte informuar kur u largua nga Shqipëria. Ky lokacion del rregullisht në këtë dosje. Por nuk dihet përse është përdorur./ZËRI
